Әмәкдашлыг руһани инкишафа зәмин јарадыр
ӘМӘКДАШЛЫГ руһу аиләнин руһән инкишаф етмәси үчүн чох ваҹибдир. Јеһова илк инсан ҹүтүнү јараданда әмәкдашлығын зәрурилијини вурғулады. Мүнасиб бир «көмәкчи» кими Һәвва Адәмлә чијин-чијинә чалышмалы иди (Јар. 2:18). Никаһ әрлә арвадын ики әмәкдаш кими бирҝә чалышдығы вә бир-биринә арха олдуғу бир гурулуш олмалы иди (Ваиз 4:9-12). Јеһованын валидејнләрә вә ушаглара тапшырдығы вәзифәни јеринә јетирмәк үчүн дә әмәкдашлыг тәләб олунур.
Аиләви ибадәт
Берри илә Һејдинин беш өвлады вар. Онларын фикринҹә, Мүгәддәс Китабын мүнтәзәм аиләви өјрәнмәси аиләнин инкишафына көмәк едир. Берри дејир: «Вахташыры ушаглара әввәлҹәдән кичик тапшырыглар верирәм. Бәзән онлара “Ојанын!” журналындан мүәјјән мәгаләләри охумағы вә өјрәндикләрини аиләви өјрәнмә заманы бөлүшмәји тапшырырам. Биз һәмчинин тәгдимәләри бирҝә мәшг едирик ки, ушагларымыз хидмәтдә истифадә едә билсинләр». Һејди әлавә едир: «Һәр биримиз гаршымыза гојдуғумуз руһани мәгсәдләри сијаһыја алмышыг вә вахташыры бу мәгсәдләри нәзәрдән кечиририк ки, инкишафын һансы пилләсиндә олдуғумузу ҝөрәк». Бу әр-арвад һәмчинин фикир вермишдир ки, бәзи ахшамлар телевизору јандырмамаг бүтүн аиләнин сәссиз шәраитдә охумасына имкан јарадыр.
Јығынҹаг ҝөрүшләри
Мајк вә Дениз дөрд ушаг бөјүдүб боја-баша чатдырмышлар. Гаршылыглы әмәкдашлыг онларын аиләсинә һансы фајданы ҝәтирди? Мајк дејир: «Јығынҹаға вахтында ҝәлмәк үчүн ишләримизи нә гәдәр јахшы планлашдырсаг да, бәзән бу баш тутмурду, лакин өз тәҹрүбәмиздән ҝөрдүк ки, әмәкдашлыг сајәсиндә буна наил олмаг мүмкүндүр». Дениз әлавә едир: «Ушаглар бөјүдүкҹә онлара ев ишләрини ҝөрмәји тапшырырдыг. Гызымыз Ким јемәк биширмәјә вә сүфрәни ачмаға көмәк едирди». Онларын оғлу Мајкл хатырлајыр: «Чәршәнбә ахшамлары евимиздә јығынҹаг ҝөрүшү кечирилирди. Биз отағы сәлигәјә салыр, дөшәмәни тозсоранла тәмизләјир вә стуллары дүзүрдүк». Диҝәр оғуллары Метју дејир: «Јығынҹаг кечирилән ахшамлар атам ишдән тез ҝәлмәјә чалышырды ки, һазырлыг ишиндә бизә көмәк етсин». Бу һансы бәһрәләри ҝәтирди?
Бүтүн ҹәһдләрә дәјәр
Мајк дејир: «1987-ҹи илдә биз Денизлә пионер хидмәтинә башладыг. О заман ушагларымыздан үчү һәлә бизимлә јашајырды. Онлардан икиси пионер хидмәтинә башлады, диҝәрләри исә Бет-Елләрин тикинтисиндә иштирак едирди. Аиләмизә севинҹ ҝәтирән шејләрдән бири дә 40 нәфәрин һәјатыны Јеһоваја һәср етмәсинә вә вәфтиз олмасына көмәк етмәјимиздир. Бизә һәмчинин аиләликҹә бир чох тикинтиләрдә, о ҹүмләдән хариҹи өлкәләрдә һәјата кечирилән тикинти ишләриндә иштирак етмәк шәрәфи нәсиб олду».
Бәли, аиләдә әмәкдашлыг бүтүн ҹәһдләрә дәјәр. Нәјә ҝөрә аилә үзвләринизлә башга һансы саһәләрдә әмәкдашлыг едә биләҹәјинизин үзәриндә дүшүнмәјәсиниз? Сиз әмин ола биләрсиниз ки, әмәкдашлыг руһу аиләнизин руһани ҹәһәтдән даһа чох инкишаф етмәсинә көмәк едәҹәк.
[28-ҹи сәһифәдәки шәкил]
Тәгдимәләри мәшг етмәк хидмәтдә тәрәгги етмәјә көмәк едир