«Өзүнүзү Аллаһын мәһәббәтиндә сахлајын»
«Әбәди һәјата ҝәтирәҹәк олан Рәббимиз Иса Мәсиһин мәрһәмәтини ҝөзләјәрәк, өзүнүзү Аллаһын мәһәббәтиндә сахлајын» (ЈӘҺУДА 21).
1, 2. Јеһова бизә олан мәһәббәтини неҹә ҝөстәриб вә һарадан билирик ки, О, бизи автоматик олараг Өз мәһәббәтиндә сахламајаҹаг?
ЈЕҺОВА АЛЛАҺ бизә олан мәһәббәтини сајсыз-һесабсыз үсулларла ҝөстәрир. Шүбһәсиз, Јеһованын мәһәббәтинин ән бөјүк сүбуту Онун тәгдим етдији фидјә гурбанлығыдыр. Онун бәшәријјәтә олан мәһәббәти о гәдәр бөјүкдүр ки, һәтта севимли Оғлуну бизим уғрумузда өлмәк үчүн јер үзүнә ҝөндәрди (Јәһ. 3:16). Јеһова буну бизим әбәди јашамағымыз үчүн етди вә О истәјир ки, биз Онун мәһәббәтиндән әбәдијјән фајдаланаг!
2 Һәр нә етсәк дә, Јеһованын автоматик олараг бизи Өз мәһәббәтиндә сахлајаҹағыны дүшүнмәјимиз дүзҝүн олардымы? Хејр. Чүнки Јәһуда 21 ајәсиндә белә бир чағырышы охујуруг: «Сизи әбәди һәјата ҝәтирәҹәк олан Рәббимиз Иса Мәсиһин мәрһәмәтини ҝөзләјәрәк, өзүнүзү Аллаһын мәһәббәтиндә сахлајын». «Өзүнүзү Аллаһын мәһәббәтиндә сахлајын» ифадәси ҝөстәрир ки, биздән мүәјјән аддымлар атмаг ҝөзләнилир. Белә исә, Аллаһын мәһәббәтиндә галмаг үчүн биз нә етмәлијик?
Аллаһын мәһәббәтиндә неҹә гала биләрик?
3. Исанын сөзләринә әсасән, Атасынын мәһәббәтиндә галмаг үчүн ондан нә тәләб олунурду?
3 Бу суалын ҹавабыны Исанын јерүзү һәјатынын сонунҹу ҝеҹәсиндә сөјләдији сөзләрдә тапа биләрик. О демишди: «Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз» (Јәһ. 15:10). Бу ајәдән ҝөрүндүјү кими, Иса Атасы илә јахшы мүнасибәтләри горумаг үчүн Онун әмрләринә риајәт етмәјин сон дәрәҹә ваҹиб олдуғуну билирди. Беләликлә, әҝәр Аллаһын камил Оғлундан буну етмәк ҝөзләнилирдисә, онда бунун биздән дә ҝөзләнилмәси нә гәдәр јәгиндир?!
4, 5. а) Јеһованы севдијимизи, әсасән, неҹә ҝөстәрә биләрик? б) Нәјә ҝөрә Јеһованын әмрләринә итаәт етмәкдән бојун гачырмаг үчүн һеч бир әсасымыз јохдур?
4 Биз Јеһованы севдијимизи, әсасән, Она итаәт етмәклә ҝөстәририк. Һәвари Јәһја буну белә ифадә етмишдир: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһ. 5:3). Гејд етмәк лазымдыр ки, итаәткарлыг буҝүнкү дүнјада бир о гәдәр дә дәбдә дејил. Ҝәлин «Онун әмрләри исә ағыр дејилдир» сөзләринә диггәт јетирәк. Јеһова биздән нә исә ағыр бир шеј тәләб етмир.
5 Буну баша дүшмәк үчүн бир нүмунәни нәзәрдән кечирәк. Сән јахын достундан ҝүҹү чатмајан шејләри дашымағы хаһиш едәрдинми? Әлбәттә ки, јох. Јеһова биздән гат-гат хејирхаһдыр вә ҝүҹүмүзүн мәһдуд олдуғуну биздән даһа јахшы билир. Мүгәддәс Китаб бизи әмин едир ки, Јеһова «торпагдан дүзәлмәјимизи унутмур» (Мәз. 103:14). О, һеч вахт биздән ҝүҹүмүз чатмајан шејләри тәләб етмәз. Буна ҝөрә дә, Јеһованын әмрләринә итаәт етмәкдән бојун гачырмаг үчүн һеч бир әсасымыз јохдур. Әксинә, биз баша дүшүрүк ки, итаәткарлыг бизә сәмави Атамызы һәгигәтән дә севдијимизи вә Онун мәһәббәтиндә галмаг истәдијимизи ҝөстәрмәк үчүн ҝөзәл имкан јарадыр.
Јеһованын бәхш етдији хүсуси әнам
6, 7. а) Виҹдан нәдир? б) Виҹданын Аллаһын мәһәббәтиндә галмаға неҹә көмәк етдијини нүмунә әсасында ҝөстәрин.
6 Јашадығымыз мүрәккәб дүнјада гәбул етдијимиз бир чох гәрарлар Аллаһа итаәтли олмағымызла бағлыдыр. Бу гәрарларын Аллаһын ирадәсинә ујғун олуб-олмадығына неҹә әмин ола биләрик? Јеһова итаәткарлыг мәсәләсиндә бизә бөјүк көмәји дәјән әнам бәхш етмишдир. Бу әнам виҹдандыр. Бәс виҹдан нәдир? Бу, һәрәкәтләримизи, бахышларымызы вә сечимләримизи гијмәтләндирән хүсуси габилијјәтдир. Виҹдан дахили һаким кими, бизи гәрарларымыз вә ја һәрәкәтләримиз үзәриндә дүшүнмәјә вадар едәрәк онларын пис вә ја јахшы, доғру вә ја сәһв олдуғуна даир һөкм чыхарыр. (Ромалылара 2:14, 15 ајәләрини оху.)
7 Виҹдан бизә неҹә көмәк едә биләр? Белә бир нүмунә. Сәјаһәтчинин јолу уҹсуз-буҹагсыз бир сәһрадан кечир. Орада нә из, нә јол, нә дә јол ҝөстәриҹиси вар. Буна бахмајараг, о, гәтијјәтлә өз мәгсәдинә доғру ирәлиләјир. Неҹә? О, өзү илә компас ҝөтүрүб. Компас — дөрд әсас истигамәти ҝөстәрән вә магнитләшдирилмиш әгрәби шимала јөнәлмиш сиферблатлы бир ҹиһаздыр. Компас олмадан сәјаһәтчи тамамилә итиб-батарды. Ејнилә, инсанларда да виҹдан олмасајды, онлар дүзҝүн, һәмчинин әхлаги вә мәнәви мәсәләләрә даир гәрарлар гәбул едә билмәздиләр.
8, 9. а) Виҹданымызын һансы мәһдудијјәтләри олдуғуну јадда сахламалыјыг? б) Виҹданымызын бизә һәгигәтән дә фајда ҝәтирдијинә неҹә әмин ола биләрик?
8 Лакин компас кими, виҹданын да имканлары мәһдуддур. Сәјаһәтчи компасын јанына магнит гојса, әгрәб артыг шималы ҝөстәрмәјәҹәк. Әҝәр биз дә арзуларымызын гәрарларымыза тәсир етмәсинә јол верәриксә, бу, нә илә нәтиҹәләнәҹәк? Худбин арзуларымыз виҹданымызы тамамилә сәһв истигамәтә јөнәлдә биләр. Мүгәддәс Китаб бизи хәбәрдар едир ки, «инсан үрәји һәр шејдән һијләҝәрдир, сағалмаз хәстәлији вар» (Јер. 17:9; Сүл. мәс. 4:23). Бундан әлавә, әҝәр сәјаһәтчинин әлинин алтында дәгиг, етибарлы хәритәси олмаса, компасын она чох аз, јахуд да һеч бир фајдасы олмајаҹаг. Ејнилә, әҝәр биз Аллаһын Кәламындакы дүзҝүн вә дәјишилмәз рәһбәрлијә архаланмасаг, виҹданымыз, демәк олар ки, фајдасыз олаҹаг (Мәз. 119:105). Тәәссүф ки, бу дүнјада чохлары үрәјин арзуларына һәддән артыг чох әһәмијјәт вердикләри һалда, Аллаһын Кәламында јазылан нормалара аз, ја да һеч әһәмијјәт вермирләр. (Ефеслиләрә 4:17-19 ајәләрини оху.) Елә буна ҝөрә дә бу гәдәр инсан виҹданы ола-ола, белә дәһшәтли ишләр ҝөрүр (1 Тим. 4:2).
9 Биз гәтијјән белә олмаг истәмирик! Әксинә, ҝәлин Аллаһын Кәламынын виҹданымыза тәлим-тәрбијә вермәсинә јол верәк ки, онун бизә әсил фајдасы дәјсин. Худбин арзуларын бизи үстәләмәсинә јол вермәк әвәзинә, Мүгәддәс Китаб әсасында тәрбијә едилмиш виҹданымызын сәсинә гулаг асмалыјыг. Ејни заманда, биз әзиз руһани баҹы-гардашларымызын виҹданына һөрмәт етмәјә чалышмалыјыг. Ола биләр, һәмиманлыларымызын виҹданы бизимкиндән һәссас олсун вә һәр шејә јол вермәсин. Буну јадда сахлајараг, әлимиздән ҝәлән һәр шеји едирик ки, онлары бүдрәтмәјәк (1 Кор. 8:12; 2 Кор. 4:2; 1 Пет. 3:16).
10. Һәјатын һансы үч саһәсинә тохунаҹағыг?
10 Ҝәлин һәјатын һансы үч саһәсиндә итаәткарлыг ҝөстәрмәклә Јеһоваја мәһәббәтимизи ҝөстәрә биләҹәјимизи нәзәрдән кечирәк. Сөзсүз ки, һәр үч һалда виҹданын өз ролу вар, лакин виҹдана илк нөвбәдә вә ән әсасы, Мүгәддәс Китабын Аллаһдан илһам алмыш давраныш нормалары тәсир етмәлидир. Јеһоваја мәһәббәтдән ирәли ҝәләрәк итаәткарлыг ҝөстәрә биләҹәјимиз үч саһә бунлардыр: 1) биз Јеһованын севдији инсанлары севирик, 2) үзәримиздә башчылыг едәнләрә һөрмәт едирик вә 3) Аллаһын ҝөзүндә тәмиз галмаға чалышырыг.
Јеһованын севдији инсанлары севирик
11. Нәјә ҝөрә биз Јеһованын севдији инсанлары севмәлијик?
11 Биринҹиси, биз Јеһованын севдији инсанлары севмәлијик. Сөһбәт достлугдан ҝедәндә адамлар бир нөв сүнҝәрә бәнзәјирләр. Биз әтрафымызда олан һәр шеји ҹанымыза чәкмәјә, јәни мәнимсәмәјә мејиллијик. Јараданымыз достлуғун гејри-камил инсанлар үчүн нә дәрәҹәдә тәһлүкәли, һәм дә фајдалы ола биләҹәјини јахшы билир. Буна ҝөрә дә О, бизә бу мүдрик мәсләһәти верир: «Һикмәтли илә отуруб-дуран һикмәт газанар, ахмагларла ајаглашан бәдбәхт олар» (Сүл. мәс. 13:20; 1 Кор. 15:33). Бизләрдән һеч кәс ‘бәдбәхт олмаг’ истәмәзди, чүнки ‘һикмәт газанмаг’ һәр биримизин амалыдыр. Һеч кәс Јеһованы нә олдуғундан мүдрик едә биләр, нә дә ки Ону поза биләр. Бунунла белә, достлуға ҝәлдикдә О, бизим үчүн ҝөзәл нүмунә гојур. Дүшүнүн: Јеһова гејри-камил инсанлардан кимләри Өзүнә дост сечир?
12. Јеһова неҹә инсанлары Өзүнә дост сечир?
12 Јеһова Ибраһими ‘досту’ адландырмышды (Јешаја 41:8). Бу адам бөјүк имана саһиб, салеһ вә итаәткар бир инсан иди (Јаг. 2:21-23). Јеһова Өзүнә мәһз белә достлар сечир. О, бу ҝүн дә белә адамларла достлуг едир. Әҝәр Јеһова белә достлар сечирсә, гејри-камил олан бизләр һикмәт газанмаг үчүн һикмәтли инсанлардан дост сечмәли дејиликми?
13. Дүзҝүн дост сечиминдә бизә нә көмәк едә биләр?
13 Бу саһәдә дүзҝүн сечим етмәкдә бизә нә көмәк едә биләр? Мүгәддәс Китаб нүмунәләрини арашдырмаг. Рутла гајынанасы Наоми, Давудла Јонатан, Тимотејлә Павел арасындакы достлуг һаггында дүшүнәк (Рут 1:16, 17; 1 Шам. 23:16-18; Филип. 2:19-22). Онларын арасындакы достлуг һәр шејдән әввәл бир сәбәбә ҝөрә чичәкләнирди: бу достлуг Јеһоваја олан һәгиги мәһәббәтә әсасланмышды. Өзүнә Јеһованы сәнин тәк севән дост тапа биләрсәнми? Әмин ол ки, мәсиһчи јығынҹағында чохлу белә достлар тапмаг олар. Бу достлар сәни руһани учурума сүрүкләмәјәҹәкләр. Әксинә, онлар сәнә Јеһоваја итаәт етмәјә, руһән јеткинләшмәјә вә руһ үчүн әкмәјә көмәк едәҹәкләр. (Галатијалылара 6:7, 8 ајәләрини оху.) Онлар һәмчинин сәнә Аллаһын мәһәббәтиндә галмаға көмәк едәҹәкләр.
Үзәримиздә башчылыг едәнләрә һөрмәт едирик
14. Үзәримиздә башчылыг едәнләрә һөрмәт етмәјә һансы амилләр манечилик төрәдә биләр?
14 Јеһоваја мәһәббәтимизи ифадә етмәјин икинҹи үсулу башчылыг едән адамларла бағлыдыр. Биз үзәримиздә башчылыг едәнләрә һөрмәтлә јанашмалыјыг. Бәс нәјә ҝөрә һәрдән буну етмәк чәтин олур? Сәбәбләрдән бири одур ки, сәлаһијјәтли адамлар гејри-камилдирләр. Үстәлик, биз өзүмүз дә гејри-камилик вә үсјана анаданҝәлмә мејилимизлә мүбаризә апарырыг.
15, 16. а) Јеһованын Өз халгынын гајғысына галмағы һәвалә етдији инсанлара һөрмәт етмәк бизим үчүн нәјә ҝөрә ваҹибдир? б) Исраиллиләрин Мусаја гаршы галдырдыглары үсјана Јеһованын мүнасибәтиндән өзүмүзә һансы ваҹиб дәрси ҝөтүрүрүк?
15 Сиз дүшүнә биләрсиниз: әҝәр башчылыг едәнләрә һөрмәт бәсләмәк белә чәтиндирсә, онда буну етмәк нәјә лазымдыр? Ҹаваб һөкмранлыға даир мүбаһисәли мәсәлә илә бағлыдыр. Сән кими өзүнә һөкмдар вә рәһбәр сечәҹәксән? Бир һалда ки Јеһованы өзүмүзә Һөкмдар сечирик, онда Онун һакимијјәтинә һөрмәт етмәлијик. Һөрмәт етмириксә, онда Ону өз рәһбәримиз адландырмаға һаггымыз вармы? Бундан башга, Јеһова Өз рәһбәрлијини, адәтән, халгынын гајғысына галмағы һәвалә етдији гејри-камил инсанлар васитәсилә һәјата кечирир. Һәмин адамлара гаршы үсјан галдырсаг, Јеһова буна неҹә бахаҹаг? (1 Салоникилиләрә 5:12, 13 ајәләрини оху.)
16 Мәсәлән, исраиллиләр Мусаја гаршы дејиниб үсјан едәндә, Јеһова буну шәхсән Өзүнә гаршы галдырылмыш үсјан кими гијмәтләндирди (Сај. 14:26, 27). Аллаһ дәјишилмәјиб. Әҝәр биз Аллаһын сәлаһијјәт вердији адамлара гаршы үсјан галдырсаг, Аллаһын Өзүнә гаршы үсјан галдырмыш оларыг!
17. Мәсиһчи јығынҹағында мәсул мөвге тутанлара гаршы һансы дүзҝүн мүнасибәти инкишаф етдирмәлијик?
17 Һәвари Павел мәсиһчи јығынҹағында мәсул мөвге тутанлара гаршы дүзҝүн мүнасибәт бәсләмәли олдуғумузу ачыглајыр. О јазыр: «Өз рәисләринизә итаәт един, онлара табе олун; чүнки һесабат верәҹәк оланлар кими, онлар һәр заман сизин ҹанларынызын гејдинә галырлар. Онлара табе олун ки, онлар буну ҹан чәкә-чәкә дејил, севинҹлә етсинләр. Чүнки әҝәр буну ҹан чәкә-чәкә етсәләр, сизә фајда олмаз» (Ибр. 13:17). Дүздүр, белә итаәткарлыг вә табечилик үчүн чохлу сәј тәләб олунур. Анҹаг унутмајаг ки, биз өзүмүзү Аллаһын мәһәббәтиндә сахламаға чалышырыг. Бу мәгсәдә чатмаг үчүн әлимиздән ҝәләни етмәјә дәјмәзми?
Јеһованын ҝөзүндә тәмиз галмаға чалышырыг
18. Јеһова нәјә ҝөрә бизим һәмишә тәмиз олмағымызы истәјир?
18 Јеһоваја мәһәббәтимизи ҝөстәрмәјин үчүнҹү үсулу Онун ҝөзүндә тәмиз галмаға чалышмагдыр. Адәтән, валидејнләр чалышырлар ки, ушаглары тәмиз вә сәлигәли олсун. Нәјә ҝөрә? Сәбәбләрдән бири одур ки, тәмизлик ушағын сағламлығынын рәһнидир. Үстәлик, тәмиз ушаг аиләјә башуҹалығы ҝәтирир, валидејнләрин мәһәббәтинә вә диггәтинә дәлаләт едир. Ејни сәбәбләрә ҝөрә Јеһова бизим дә тәмиз олмағымызы истәјир. О, тәмизлијин бизим фираванлығымыз үчүн зәрури олдуғуну билир. О һәм дә билир ки, тәмизлијимиз Она, сәмави Атамыза шәрәф ҝәтирир. Бу, чох бөјүк әһәмијјәт кәсб едир, чүнки әтрафымыздакылар бизим бу позғун дүнјадакы инсанлардан фәргләндијимизи ҝөрүб Аллаһа хидмәт етмәк истәјә биләрләр.
19. Физики тәмизлијин ваҹиб олдуғуну һарадан билирик?
19 Һансы саһәләрдә тәмиз галмалыјыг? Әслиндә, һәјатын һәр бир саһәсиндә. Гәдим Исраилдә Јеһова халгына ајдын ҝөстәрди ки, физики тәмизлик чох ваҹибдир (Лев. 15:31). Мусанын Ганунунда туллантылара, габларын тәмизләнмәсинә, әл-ајағын вә палтарларын јујулмасына даир ҝөстәришләр варды (Чых. 30:17-21; Лев. 11:32; Сај. 19:17-20; Ганун. т. 23:13, 14). Исраиллиләрә хатырладылырды ки, онларын Аллаһы Јеһова мүгәддәсдир, јәни тәмиз, пак вә үлвидир. Мүгәддәс Аллаһын хидмәтчиләри дә мүгәддәс олмалыдырлар. (Левилиләр 11:44, 45 ајәләрини оху.)
20. Биз һансы саһәләрдә тәмиз галмалыјыг?
20 Буна ҝөрә биз һәм хариҹи, һәм дә дахили ҹәһәтдән тәмиз олмалыјыг. Чалышмалыјыг ки, фикирләримиз тәмиз олсун. Дүнјада һөкм сүрән әхлаги позғунлуға бахмајараг, биз сәдагәтлә Јеһованын әхлаги тәмизлијә даир нормаларына риајәт едирик. Ән ваҹиби, ибадәтимизи јалан динлә мурдарламамаға чалышараг тәмиз сахлајырыг. Јешаја 52:11 ајәсиндә јазылан Аллаһдан илһам алмыш хәбәрдарлығы һәмишә јадда сахлајырыг: «Чәкилин, чәкилин, орадан чыхын, мурдар шејләрә тохунмајын, орадан чыхыб тәмизләнин». Бу ҝүн биз сәмави Атамызын руһани мәнада натәмиз һесаб етдији шејләрә һәтта тохунмамагла белә өзүмүзү руһани ҹәһәтдән тәмиз сахлајырыг. Елә буна ҝөрә дә биз бу дүнјада мәшһур олан јалан дини бајрамларда вә мәрасимләрдә иштирак етмирик. Дүздүр, тәмиз галмаг чәтиндир. Анҹаг Јеһованын халгы буна ҹан атыр, чүнки бу, онлара Аллаһын мәһәббәтиндә галмаға көмәк едир.
21. Аллаһын мәһәббәтиндә галдығымыза неҹә әмин ола биләрик?
21 Јеһова истәјир ки, биз әбәдијјән Онун мәһәббәтиндә галаг. Лакин һәр биримиз Аллаһын мәһәббәтиндә галмаг үчүн әлимиздән ҝәләни етдијимизә әмин олмалыјыг. Биз буна Исанын нүмунәсини тәглид етмәклә вә Јеһованын әмрләринә итаәт едиб мәһәббәтимизи ҝөстәрмәклә наил ола биләрик. Бунун сајәсиндә әмин ола биләрик ки, бизи һеч нә «Аллаһын мәһәббәтиндән мәһрум етмәјә гадир олмајаҹагдыр» (Ром. 8:38, 39).
Јадыныздадырмы?
• Виҹданымыз Аллаһын мәһәббәтиндә галмаға бизә неҹә көмәк едә биләр?
• Нәјә ҝөрә биз Јеһованын севдији инсанлары севмәлијик?
• Нәјә ҝөрә үзәримиздә башчылыг едәнләрә һөрмәт етмәк зәруридир?
• Аллаһын халгы үчүн тәмиз галмаг нә дәрәҹәдә ваҹибдир?
[20-ҹи сәһифәдәки чәрчивә/шәкил]
ЈАХШЫ ДАВРАНЫША ТӘШВИГ ЕДӘН КИТАБ
2008-2009-ҹу илин вилајәт конгресләриндә «Өзүнүзү Аллаһын мәһәббәтиндә сахлајын» адлы 224 сәһифәли китабын бурахылышы һаггында елан олунду. Бу јени китаб һансы мәгсәдә хидмәт едир? Бу китаб мәсиһчиләрин Јеһованын нормаларыны өјрәнмәсинә вә севмәсинә көмәк етмәк вә диггәти, әсасән, мәсиһчи давранышына ҹәмләшдирмәк үчүн нәзәрдә тутулуб. «Өзүнүзү Аллаһын мәһәббәтиндә сахлајын» китабыны диггәтлә өјрәнмәјин сајәсиндә Јеһованын нормаларына мүвафиг јашамағын инди ән јахшы һәјат јолу олдуғуна, ҝәләҹәкдә исә әбәди һәјата апардығына әминлијимизи мүтләг артыраҹаг.
Бундан әлавә, бу китаб Јеһоваја итаәткарлығын ағыр јүк дејил, әксинә, Јеһоваја Ону нә гәдәр чох севдијимизи ҝөстәрмәјин үсулу кими бахмаға көмәк едир. Беләликлә, бу нәшр бизи нөвбәти суал үзәриндә дүшүнмәјә сөвг едәҹәк: «Мән нә үчүн Јеһоваја итаәткарлыг ҝөстәрирәм?»
Инсанларын Јеһованын мәһәббәтиндән узаглашараг сәһв аддым атмаларынын сәбәби чох вахт Мүгәддәс Китаб тәлимләри илә јох, јанлыш һәрәкәтлә бағлы олур. Буна ҝөрә дә Јеһованын ҝүндәлик һәјатымызда бизә јол ҝөстәрән ганун вә принсипләринә олан мәһәббәтимизи вә онлара ҝөрә миннәтдарлығымызы артырмаг неҹә дә ваҹибдир! Әминик ки, бу јени нәшр Јеһованын бүтүн дүнјадакы һәлим хидмәтчиләринә һаггын тәрәфини мөһкәм тутмаға, Шејтанын јаланчы олдуғуну сүбут етмәјә вә һәр шејдән әлавә, Аллаһын мәһәббәтиндә галмаға көмәк едәҹәк! (Јәһуда 21).
[18-ҹи сәһифәдәки шәкил]
«Мән Атамын әмрләрини јеринә јетириб Онун мәһәббәтиндә галырам. Әҝәр сиз дә Мәним әмрләрими јеринә јетирсәниз, Мәним мәһәббәтимдә галаҹагсыныз»