Тәшәббүскарлыг јахшы нәтиҹәләр ҝәтирир
ЈЫҒЫНҸАҒЫНЫН әразисиндә тәблиғ етмәк үчүн ҝөзләнилмәдән јарана биләҹәк һәр һансы бир имкандан истифадә етмәјә һазырсанмы? Финландијанын тарихи дәниз лиманы олан Туркуда гардашларымызын тәшәббүскарлығы јахшы нәтиҹәләрә сәбәб олду.
Бир мүддәт әввәл Туркуда јашајан гардашлар диггәт јетирдиләр ки, јерли тәрсанәдә тикилән нәһәнҝ ҝәминин үзәриндә апарылан ишләри битирмәк мәгсәдилә Асијадан бир груп инсан ҝәлиб. Сонра бир гардаш һәмин фәһләләрин һансы меһманханада галдыгларыны өјрәнди. Һәмчинин о, фәһләләрин сәһәр тездән галдыглары јердән лимана автобусларла ҝетдикләриндән хәбәр тутду. О, дәрһал бу хәбәри Туркуда инҝилисдилли јығынҹагда олан гардашлара чатдырды.
Һәмин јығынҹағын ағсаггаллары баша дүшдүләр ки, бу гәдәр әҹнәбиләрин ора ҝәлмәси онлара Падшаһлыг хәбәрини тәблиғ етмәк үчүн ҝөзләнилмәз имкан ачыр. Буна ҝөрә дә онлар бу инсанлара тәблиғ етмәк үчүн һансы тәдбирләри ҝөрмәли олдугларыны тез бир заманда гәрарлашдырдылар. Елә һәмин һәфтәнин базар ҝүнү сәһәр саат једдидә он тәблиғчи автобус дајанаҹағынын јахынлығында ҝөрүшдү. Әввәлҹә орада бир нәфәр дә олсун фәһлә јох иди. Гардашлар: «Ҝеҹикмишик? Бәлкә, онлар артыг Туркудан ҝедибләр?» — дејә тәәҹҹүблә бир-бириндән сорушурдулар. Чох кечмәди ки, иш палтарында олан бир фәһләнин күчәнин тининдән чыхдығыны ҝөрдүләр. Онун ардынҹа диҝәрләри дә бир-бир ҝәлирдиләр. Чох кечмәди ки, дајанаҹағын јанында бир дәстә ишчи топлашды. Тәблиғчиләр инҝилис дилиндә олан журналларла тәблиғ етмәјә башладылар. Хошбәхтликдән, ишчиләрин автобусда јер тапмаларына бир саата јахын вахт ҝетди. Бунун сајәсиндә гардашлар онларын әксәријјәти илә сөһбәт едә билдиләр. Автобуслар јола дүшәндә артыг фәһләләрдә 126 брошүра вә 329 журнал вар иди!
Әлдә едилән јахшы нәтиҹәләр гардашлары нөвбәти һәфтә рајон нәзарәтчисинин баш чәкдији мүддәтдә ејни шеји тәкрарламаға тәшвиг етди. Јағышлы бир ҝүн иди. Сәһәр саат једдинин јарысында рајон нәзарәтчисинин кечирдији тәблиғ ҝөрүшүндән сонра 24 тәблиғчи автобус дајанаҹағына тәрәф јолланды. Бу дәфә исә онлар өзләри илә тагалог дилиндә әдәбијјат ҝөтүрмүшдүләр, чүнки әҹнәбиләрин әксәријјәтинин Филиппиндән олдуғуна диггәт јетирмишдиләр. О ҝүн автобус лимана доғру јола дүшәндә гардашлар фәһләләрә 7 китаб, 69 брошүра вә 479 журнал вермишдиләр. Бу кампанијада иштирак едән баҹы-гардашларын севинҹини вә кечирдикләри һәјәҹаны бир тәсәввүр ет!
Фәһләләрин өз вәтәнләринә гајытмаларындан әввәл гардашлар онларын галдыглары меһманханада бәзиләринә баш чәкмәјә вә Падшаһлыг хәбәри илә бағлы әтрафлы мәлумат вермәјә мүвәффәг олдулар. Фәһләләрин бәзиләри дүнјанын башга јерләриндә дә Јеһованын Шаһидләринә раст ҝәлдикләрини дедиләр. Онлар Финландијада галдыглары мүддәтдә гардашларын онларла данышмаг үчүн тәшәббүс ҝөстәрдикләринә ҝөрә миннәтдарлыгларыны билдиләр.
Бәс сән јығынҹағынын әразисиндә ҝөзләнилмәдән јарана биләҹәк имканлара һазырсанмы? Мүхтәлиф мәншәли инсанлара тәблиғ етмәк үчүн тәшәббүсү өз үзәринә ҝөтүрүрсәнми? Әҝәр беләдирсә, онда сән дә Туркудан олан гардашларымызын кечирдикләри һиссләри дујаҹагсан.
[32-ҹи сәһифәдәки хәритә/шәкил]
(Хәритәјә нәшрдә бахын)
ФИНЛАНДИЈА
ҺЕЛСИНКИ
Турку