Мүгәддәс хидмәтдән өјрәндијимиз «сирр»

Нәгл етди Оливје Рандриамора

«Мән корлуг чәкмәјин дә, фираван јашамағын да нә олдуғуну билирәм. Мән һәр шејдә вә һәр шәраитдә тох вә аҹ олмағын... сиррини өјрәнмишәм. Чүнки мәнә гүввәт верәнин сајәсиндә һәр шејә ҝүҹүм чатыр» (Филип. 4:12, 13).

ҺӘВАРИ ПАВЕЛИН бу сөзләри артыг нечә илләрдир ки, мәнә вә арвадым Улијә бөјүк дәстәкдир. Мадагаскарда Јеһоваја хидмәт етдијимиз мүддәтдә Она тамамилә ҝүвәнмәклә, Павел кими, биз дә бу «сирри» өјрәндик.

1982-ҹи илдә Јеһованын Шаһидләри Улинин анасы илә Мүгәддәс Китабы өјрәнмәјә башлајанда Ули вә мән нишанлы идик. Мән дә Мүгәддәс Китабы өјрәнмәк гәрарына ҝәлдим, сонрадан Ули дә мәнә гошулду. Биз 1983-ҹү илдә евләндик, 1985-ҹи илдә вәфтиз олдуг вә бундан дәрһал сонра көмәкчи пионер хидмәтини ҝөтүрдүк. 1986-ҹы илин ијул ајында даими пионер хидмәтинә башладыг.

1987-ҹи илин сентјабр ајында бизи хүсуси пионер тәјин етдиләр. Илк тәјинатымыз Мадагаскарын шимал-гәрбиндә јерләшән вә бир дәнә дә олсун јығынҹағы олмајан кичик бир шәһәрә иди. Бурада тәхминән 18 әсас етник груп, һәмчинин сајсыз-һесабсыз тајфалар јашајыр. Онларын адәт-әнәнәләри әһәмијјәтли дәрәҹәдә фәргләнир. Мадагаскарын рәсми дили малагаси дили олса да, һәр әразидә сакинләр өзүнәмәхсус диалектдә данышырлар. Она ҝөрә дә биз тәјин олундуғумуз әразинин диалектини өјрәнмәјә башладыг вә бу, бизә јерли әһали тәрәфиндән даһа јахшы гәбул олунмағымыза көмәк едирди.

Илк вахтлар мән һәр базар ачыг мәрузә сөјләјирдим, сонда исә Ули адәт үзрә әл чалырды. Јығынҹаг ҝөрүшләриндә јалныз икимиз иштирак едирдик. Үстәлик, биз Теократик Хидмәт Мәктәбинин бүтүн бәндләрини кечирирдик, Ули, санки, ев саһибинә тәблиғ едирмиш кими сәһнәҹик гурурду. Бизә баш чәкән рајон нәзарәтчиси ҝөрүшләримизин кечирилмәсиндә дәјишиклик етмәји тәклиф едәндә ишимиз неҹә дә јүнҝүлләшди!

Почт хидмәти пис ишләдијиндән ајлыг мүавинәтимизи вахтлы-вахтында ала билмирдик. Беләликлә биз аза гане олмағы өјрәндик. Бир дәфә 130 километр узаглыгда кечирилән рајон конгресинә ҝетмәк үчүн кифајәт гәдәр јол пулумуз јох иди. Һәмин ан бир гардашын вердији јахшы мәсләһәт јадымыза дүшдү. О демишди: «Проблемләринизи Јеһоваја данышын. Ахы сиз Онун ишини ҝөрүрсүнүз». Дуа етдикдән сонра биз пијада ҝетмәк гәрарына ҝәлдик. Евдән чыхмаға һазырлашырдыг ки, бир гардаш ҝөзләнилмәдән бизә баш чәкди вә һәдијјә олараг бизә пул верди. Бу, јол хәрҹләримизи өдәмәк үчүн кифајәт едирди!

СӘЈЈАР ХИДМӘТ

1991-ҹи илин феврал ајында мән рајон нәзарәтчиси тәјин олундум. Артыг о вахт бизим кичик групумуз бөјүмүшдү вә тәблиғчиләрин сајы 9-а чатмышды, онлардан 3-ү вәфтиз олунмушду вә орта һесабла, јығынҹаг ҝөрүшләриндә 50 нәфәр иштирак едирди. Тәлим алдыгдан сонра биз пајтахт Антананаривуја тәјин едилдик. 1993-ҹү илдә бизи башга теократик рајона — өлкәнин шәргиндә јерләшән әразијә ҝөндәрдиләр. Бурада һәјат шәраити шәһәрдәкиндән олдугҹа фәргләнирди.

Јығынҹаглара вә уҹгар әразиләрә сәпәләнән груплара баш чәкмәк үчүн бәзән сых мешәли дағлардан кечән 145 километрәдәк јолу пијада ҝетмәли олурдуг. Чалышырдыг ки, јүкүмүз мүмкүн гәдәр аз олсун. О вахтлар бәзән рајон нәзарәтчиләринин ачыг мәрузәләринә слајд ҝөстәрмәк дә дахил иди, бу заман јүкүмүз бир аз ағырлашырды. Ули слајд ҝөстәрән апараты, мән исә 12 волтлуг машын аккумулјаторуну дашыјырдым.

Нөвбәти јығынҹаға баш чәкмәк үчүн биз чох вахт ҝүн әрзиндә 40 километр јол ҝедирдик. Јолумуз енишли-јохушлу дағлардан, чајлардан вә палчыглы, кәлә-көтүр јоллардан кечирди. Һәрдән јол гырағында ҝеҹәләмәли олурдуг, анҹаг адәтән, чалышырдыг ки, ҝеҹәни кечирмәк үчүн бир кәнд тапаг. Бәзән вәзијјәт елә ҝәтирирди ки, танымадығымыз инсанлардан бизә бир ҝеҹәлик јер вермәји хаһиш етмәли олурдуг. Башымызы гојмаға јер тапдыгдан сонра јемәк биширмәјә башлајырдыг. Ули ев јијәсиндән бир газан истәјиб јахынлыгда ахан чајдан вә ја ҝөлдән су ҝәтирмәјә ҝедирди. Бу арада мән оҹаг галамаг үчүн ев јијәсиндән балта ҝөтүрүб одун доғрајырдым. Һәрдәнбир тојуг алырдыг вә ону өзүмүз кәсиб тәмизләмәли олурдуг. Бир сөзлә, һәр шеј вахт апарырды.

Сүфрәни јығышдырандан сонра чиммәк үчүн су дашыјырдыг. Бәзән мәтбәхдә јатырдыг. Јағыш јағанда јалныз дивара сөјкәниб јатмаг мүмкүн иди, чүнки әкс һалда дамдан сызан јағыш дамҹылары үстүмүзү ислада биләрди.

Биз һәмишә галдығымыз евин сакинләринә тәблиғ едирдик. Мәнзилбашына чатанда баҹы-гардашларымыз бизи бөјүк гонагпәрвәрлик вә хејирхаһлыгла гаршылајырдылар. Һәмиманлыларымызын башчәкмәләримизи үрәкдән гијмәтләндирдикләрини ҝөрәндә јолда үзләшдијимиз нараһатчылыглары унудурдуг.

Баҹы-гардашларымызын евләриндә галанда мәмнунијјәтлә онлара ев ишләриндә көмәк едирдик. Бунун сајәсиндә онларын бизимлә хидмәтә чыхмалары үчүн вахтлары олурду. Биз баҹы-гардашларымызын имканларынын јол вермәдији дәбдәбәли шәраити јарадаҹагларыны вә сүфрәјә хүсуси тәамлар дүзәҹәкләрини уммурдуг.

УЗАГ ӘРАЗИЛӘРДӘКИ ГРУПЛАРА БАШ ЧӘКИРИК

Узаг әразиләрдәки груплара баш чәкмәк бизим чох хошумуза ҝәлирди. Јерли гардашлар бизи севинҹлә гаршылајырдылар вә демәк олар ки, хидмәт ҹәдвәлимиздә бош јер гојмурдулар. Чох надир һалларда бир аз динҹимизи ала билирдик (Марк 6:31). Јығынҹагларын биринә баш чәкәндә бир әр-арвад Мүгәддәс Китабы өјрәтдикләри инсанларын һамысыны — онларын сајы исә нә аз, нә чох 40 нәфәр иди — евләринә дәвәт етмишди ки, онларын дәрсини кечәк. Баҹы Ули илә бирҝә 20 нәфәрә, гардашла мән исә јердә галан 20 нәфәрә дәрс кечдик. Биринин дәрсини гуртаран кими ара вермәдән башгасынын дәрсинә башлајырдыг. Бир гәдәр сонра јығынҹаг ҝөрүшү кечирмәк үчүн фасилә ҝөтүрдүк, сонра исә инсанларын дәрсини кечмәјә давам етдик. Бу кими ҝүнләримиз, адәтән, ахшам саат сәккиздән сонра баша чатырды.

Гоншу кәнддә јерләшән башга група баш чәкмәк үчүн исә һамымыз тәхминән сәһәр саат сәккиздә јола дүшдүк. Һамымыз әјнимизә көһнә палтар ҝејинмишдик. Мешә илә узун јол ҝетдикдән сонра тәхминән ҝүнорта саатларында һәмин јерә ҝәлиб чатдыг. Биз тәмиз палтарларымызы ҝејиниб дәрһал евдән-евә тәблиғ етмәјә башладыг. Евләр тәблиғчиләрин сајына нисбәтән аз иди. Буна ҝөрә дә һәмин әразини 30 дәгигәјә ишләјиб гуртардыг вә нөвбәти кәндә ҝетдик. Бурада да тәблиғимизи баша вурандан сонра ҝәлдијимиз о узун јолла евә гајытмалы идик. Дүзүнү десәк, бир аз мәјус олмушдуг. Евдән-евә вур-тут бир саат тәблиғ етмәк үчүн биз хејли вахт вә ҝүҹ сәрф етмишдик. Буна бахмајараг, јерли баҹы-гардашлар ҝилеј-ҝүзар етмәдиләр. Онлар руһ јүксәкликләрини горујуб сахламышдылар.

Тавиранамбо шәһәриндәки бир груп дағын башына јахын олан бир әразидә јерләширди. Орада биротаглы евдә јашајан һәмиманлыларымыздан ибарәт бир аилә вар иди. Јахынлыгдакы балаҹа бир тикили јығынҹаг ҝөрүшләринин кечирилмәси үчүн истифадә олунурду. Бирдән гардаш уҹа сәслә: «Еһеј, гардашлар!» — дејә гышгырмаға башлады. Гоншу дағын башындан кимсә: «Нәдир?» — дејә сорушду. Гардаш јенә дә уҹа сәслә деди: «Рајон нәзарәтчимиз ҝәлиб!» Ҹавабында һәмин адам: «Ура!» — дејә гышгырды. Бу хәбәр илдырым сурәти илә узагда јашајанлара да чатдырылды. Тезликлә инсанлар топлашмаға башладылар вә ҝөрүшдә 100-дән чох адам иштирак етди.

НӘГЛИЈЈАТЛА БАҒЛЫ ЧӘТИНЛИКЛӘР

1996-ҹы илдә бизи јени рајона тәјин етдиләр. Бу, Антананаривуја јахын бир јердә, мәркәзи дағлыг бөлҝәдә јерләширди. Бу рајонун һәм дә өзүнәмәхсус чәтинликләри варды. Һәмин чәтинликләрдән бири узаг әразиләрә ишләјән мүнтәзәм иҹтимаи нәглијјатын олмамасы иди. Бир дәфә Антананаривудан тәхминән 240 километр узаглыгда јерләшән Беанкана (Басака) шәһәриндәки група баш чәкмәли идик. Һәмин истигамәтдә ҝедән кичик јүк машынынын сүрүҹүсү илә бир аз сөһбәт етдикдән сонра о, бизи апармаға разы олду. Машын ағзынаҹан долу иди, орада 30-а јахын сәрнишин вар иди: онлар машынын ичиндә, чөлүндә, дамында отурмушдулар, бәзиләри исә архадан саллашмышдылар.

Белә һалларда тез-тез олдуғу кими, машын тезликлә сырадан чыхды вә биз јолумуза пијада давам етдик. Бир нечә саат јол ҝетдикдән сонра ҝөрдүк ки, бизә тәрәф бөјүк јүк машыны ҝәлир. Инсанларын вә јүкүн әлиндән машында бош јерин олмамасына бахмајараг, сүрүҹү јенә дә машыны сахлады. Биз машына миндик, амма ајаг үстә ҝетмәли олдуг. Сонра биз бир чаја чатдыг, лакин көрпү тәмирә бағланмышды. Јенә дә јолумузу пијада давам етдирмәли олдуг вә нәһајәт, бир нечә хүсуси пионерин јашадығы балаҹа бир кәндә ҝәлиб чатдыг. Һәмин кәндә баш чәкмәк планымыза дахил олмаса да, көрпү тәмир олунана кими вә һәмин әразидән бизә лазым олан истигамәтдә ҝедән нәглијјат васитәси кечәнә гәдәр онларда галыб тәблиғ етдик.

Нәглијјат васитәси бир һәфтәдән сонра о тәрәфләрдән кечди вә биз јолумузу давам етдирдик. Јол чала-чухурлу иди. Дизимизә гәдәр палчыг ичиндә вә јыхыла-јыхыла тез-тез чухурларда илишиб-галан машыны итәләјәрәк чыхартмалы олурдуг. Дан јери сөкүлмәмиш балаҹа бир кәндә ҝәлиб чатанда машындан дүшдүк. Әсас јолдан чыхыб дүјү плантасијалары илә белимизә гәдәр палчыглы сујун ичи илә пијада јолумуза давам етдик.

Бу, һәмин әразијә илк сәфәримиз иди. Буна ҝөрә дә дүјү плантасијасында ишләјән кәндлиләрә тәблиғ етмәк вә јерли Јеһованын Шаһидләринин һарада јашадыгларыны сорушмаг гәрарына ҝәлдик. Һәмсөһбәтләримизин руһани гардашларымыз олдуғуну биләндә чох севиндик!

БАШГАЛАРЫНЫ ТАММҮДДӘТЛИ ХИДМӘТӘ ТӘШВИГ ЕДИРИК

Илләр кечдикҹә баҹы-гардашлары таммүддәтли хидмәтә тәшвиг етмәјимизин бәһрәләрини ҝөрмәк бизә бөјүк севинҹ бәхш едирди. Доггуз даими пионери олан бир јығынҹаға баш чәкәндә онлары тәшвиг етдик ки, һәр бири гаршысына бир тәблиғчијә пионерләрин ҹәрҝәсинә гошулмаға көмәк етмәк мәгсәдини гојсун. Алты ајдан сонра һәмин јығынҹаға јенидән баш чәкәндә даими пионерләрин сајы инанылмаз дәрәҹәдә артараг 22-јә чатмышды. Ики пионер баҹы јығынҹагда ағсаггал кими хидмәт едән аталарыны даими пионер олмаға тәшвиг етмишди. О гардашлар исә, өз нөвбәсиндә, үчүнҹү ағсаггалы онлара гошулмаға тәшвиг етмишдиләр. Гыса мүддәтдән сонра һәмин ағсаггал хүсуси пионер тәјин олунду. Сонра бу гардаш арвады илә бирҝә сәјјар хидмәтә башлады. Бәс диҝәр ики ағсаггалла нә баш верди? Онлардан бири рајон нәзарәтчиси, о бириси исә Падшаһлыг залларынын тикинтисиндә көнүллү кими хидмәт едир.

Елә ҝүн олмур ки, Јеһоваја бизә көмәк етдији үчүн миннәтдарлығымызы билдирмәјәк. Биз дәрк едирик ки, Онун ҝүҹү олмасајды, биз һеч бир ишин өһдәсиндән ҝәлә билмәздик. Дүздүр, биз һәрдән јорулуруг вә хәстәләнирик, анҹаг хидмәтимиздә әлдә етдијимиз нәтиҹәләр үзәриндә дүшүнәндә үрәјимиз севинҹлә долур. Јеһова Өз ишинин ирәлиләмәсинин гајғысына галыр. Биз чох хошбәхтик ки, һал-һазырда хүсуси пионер кими хидмәтимизи давам етдиририк вә бу ишдә, азаҹыг да олса, бизим дә пајымыз вар. Бәли, Ули илә мән бизә гүввәт верән Јеһоваја бел бағламағын сиррини өјрәндик.

[6–ҹы сәһифәдәки јазы]

Биз Јеһоваја бел бағламағын сиррини өјрәндик

[4–ҹү сәһифәдәки хәритә/шәкил]

Чох вахт Бөјүк Гырмызы ада адландырылан Мадагаскар әразисинә ҝөрә дүнјанын 4-ҹү бөјүк адасыдыр. Торпағы гырмызы рәнҝдә олан бу ада надир һејван вә биткиләрлә зәнҝиндир

[5–ҹи сәһифәдәки шәкил]

Јол гаршылашдығымыз ән бөјүк чәтинликләрдән бири иди

[5–ҹи сәһифәдәки шәкилләр]

Инсанлара Мүгәддәс Китабы өјрәтмәк бизә севинҹ верир