Oxucularımız soruşur...
Nə üçün Allah insanlara əbədi həyat verməyi vəd edir?
▪ Müqəddəs Kitabda deyilir ki, Allah bizə ‘əbədi həyat’ vəd edir (Yəhya 6:40). Bəs insanlara bu cür imkanı verməyə Onu nə təşviq edir? O, bunu sadəcə ədalət naminəmi edir?
Ədalət insanlarla düzgün və layiq olduqları tərzdə davranmağı tələb edir. Bəs demək olarmı ki, biz əbədi həyata layiqik? Xeyr. Müqəddəs Kitab deyir: «Yer üzündə elə saleh adam yoxdur ki, yalnız yaxşılıq edib heç bir günah etməsin» (Vaiz 7:20). Günaha görə cəza verilir. Allah ilk insan Adəmi xəbərdar etmişdi ki, o günah işlətdiyi gün mütləq öləcək (Yaradılış 2:17). Sonralar həvari Pavel Allahdan ilham alaraq yazmışdır: ‘Günahın əvəzi ölümdür’ (Romalılara 6:23). Buna görə də əgər Adəmin bütün övladları haqlı olaraq ölümə layiqdirlərsə, bəs onda nə üçün Allah onlara əbədi yaşamaq imkanı verir?
Əbədi həyat bizə «müftə» təklif olunur. Bu, Allahın məhəbbətinin və mərhəmətinin nə qədər böyük və zəngin olduğunun göstəricisidir. Müqəddəs Kitabda deyilir: «Hamı günah işlətmiş və Allahın izzətindən məhrum qalmışdır. Onlar Onun lütfü ilə, İsa Məsihin verdiyi nicatla bəraəti müftə aldılar» (Romalılara 3:23, 24).
Bütün insanların ölümə layiq olmasına baxmayaraq, Allahın fikri var ki, Onu sevənlərə əbədi həyat versin. Bəs buna ədalətsizlik demək olarmı? Müqəddəs Kitabda deyilir: «İndi nə deyək? Məgər Allahın yanında haqsızlıqmı var? Əsla! Çünki O, Musaya deyir: “Kimə mərhəmət edirəmsə, edəcəyəm; kimə rəhm edirəmsə, edəcəyəm”... Bəs sən, ey insan, kimsən ki, Allah ilə mübahisəyə girişirsən?» (Romalılara 9:14—20).
Dünyanın bəzi yerlərində dövlətin səlahiyyətli məmurunun və ya hakimin ağır cəzaya layiq olan cinayətkarı əfv etməyə hüququ çatır. Əgər cinayətkar hakimin tələbini canla-başla yerinə yetirərsə, hərəkət və davranışı ilə dəyişildiyini göstərərsə, hakim yaxud prezident onun cəza müddətini azalda ya da tamamilə əfv edə bilər. Bu hərəkət mərhəmətin təzahürüdür.
Eynilə, Yehova bütün günahkarları layiq olduqları hökmlə cəzalandırmamaq qərarına gələ bilər. Bunun əvəzinə, məhəbbətdən irəli gələrək, Allah Onu sevənlərə və əmrlərinə uyğun yaşayanlara əbədi həyatı bəxş edə bilər. Müqəddəs Kitabda deyilir: «Allah insanların kimliyinə baxmaz. Amma hər xalqdan olub, Ondan qorxan və haqq iş görən Ona məqbuldur» (Həvarilərin işləri 10:34, 35).
Yehovanın bizə məhəbbətinin ən böyük təzahürü Oğlunu bizim uğrumuzda əzab çəkərək ölməyə göndərməsidir. İsa Atası haqda demişdi: «Allah dünyanı elə sevdi ki, vahid Oğlunu ona verdi; bunu ona görə etdi ki, Ona iman edənlərin heç biri həlak olmasın, hamısının əbədi həyatı olsun» (Yəhya 3:16).
Yehovanı sevməyə və Onun iradəsini yerinə yetirməyə can atanların hamısı, keçmişdə kim olmalarından asılı olmayaraq, Allah tərəfindən eyni dərəcədə bəyənilir. Beləliklə, əbədi həyat ümidi ilk növbədə Allahın mərhəmətinin və böyük məhəbbətinin sübutudur.
[15-ci səhifədəki şəkil]
Bu, ilk növbədə, Allahın mərhəmətinin və böyük məhəbbətinin sübutudur