Fəsil 23

Kapernahumda digər möcüzələr

BƏLİ, İsa Məsih Peteri, Andreası, Yaqubu və Yəhyanı şagirdliyə çağırır; növbəti şənbə onlar birlikdə Kapernahumdakı sinaqoqa gedirlər. Orada İsa təlim verir, camaat onun öyrətmək tərzinə heyran qalır, çünki İsa din xadimləri kimi yox, hakimiyyət sahibi kimi öyrədir.

Həmin vaxt orada cinə tutulmuş bir adam olur. Birdən o qışqırır: «Ey nazaretli İsa! Bizdən nə istəyirsən? Bizi məhv etməyə gəlmisən? Sənin kim olduğunu yaxşı bilirəm, sən Allahın Müqəddəsisən».

Bu adamdakı cin Şeytanın tabeliyində olan cin mələklərindən biridir. İsa Məsih həmin cinə zəhmlə deyir: «Səsini kəs və ondan çıx».

Bu an cin həmin adamı qıc edir və bağırıb ondan çıxır. Lakin o adama heç bir xətər dəymir. Hamı heyrətdən donub qalır. Sonra bir-birindən: «Bu nədir belə? — deyə soruşurlar. — Bu adam hətta murdar ruhlara hökm edir, onlar da itaət edirlər!» Onun sorağı tez bir zamanda bütün ətrafa yayılır.

Sinaqoqdan çıxandan sonra İsa şagirdlərlə birgə Şimon Peterin evinə gedir. Bu vaxt Peterin qayınanası qızdırma içində yatır. İsadan xahiş edirlər ki, qadına yardım göstərsin. İsa onu əlindən tutub qaldırır. Qadın o saat sağalır və durub onlara qulluq etməyə başlayır.

Axşam düşəndə adamlar hər yerdən öz xəstələrini Peterin evinə gətirirlər. Tezliklə bütün şəhər ora toplaşır. İsa hər cür xəstəliyi sağaldır, hətta cinə tutulmuş adamları azad edir. Onun qovduğu cinlər adamlardan çıxanda qışqırırlar: «Sən Allahın Oğlusan!» Amma İsa onlara danışmağı qəti qadağan edir, çünki cinlər onun Məsih olduğunu bilirlər. Mark 1:21—34; Luka 4:31—41; Matta 8:14—17.

▪ İsa Məsih şənbə günü sinaqoqda olanda nə edir?

▪ İsa sinaqoqdan çıxandan sonra hara gedir və orada hansı möcüzəni göstərir?

▪ Həmin axşam daha nələr olur?