Bizi birləşdirən məhəbbət. İllik görüş haqqında hesabat

NYU-CERSİ ştatının (ABŞ) Cersi-Siti şəhərindəki Yehovanın Şahidlərinin Konqres Zalında sevindirici ab-hava hökm sürürdü. 2009-cu il 3 oktyabr səhəri 5 000-dən çox adam Gözətçi Qülləsi, Müqəddəs Kitab və Traktatlar Cəmiyyətinin (Pensilvaniya) 125-ci illik görüşünə toplaşmışdı. Minlərlə insan isə Birləşmiş Ştatlardakı Bet-Elin üç kompleksində və Kanada Bet-Elində audio- videoəlaqə vasitəsilə proqrama qulaq asır və ya baxırdı. Üç saat davam edən bu görüşdən Yehovaya məhəbbətin birləşdirdiyi 13 235 insan faydalanmışdır.

Görüşə Rəhbərlik Şurasının üzvü Cefri Cekson sədrlik edirdi. O, görüşü yeni mahnı kitabından nəğmələr ifa edən Bet-El xorunu təqdim etməklə açdı. Xorun rəhbəri Rəhbərlik Şurasının digər üzvü Devid Spleyn idi. O, musiqinin təmiz ibadətdə oynadığı vacib rolu qısaca müzakirə etdi. Qardaş auditoriyanı yeni üç mahnını oxumağa dəvət etdi; əvvəlcə mahnını xor ifa edir, sonra isə xorla birgə auditoriya oxuyurdu. Xor yalnız bu xüsusi görüş üçün təşkil olunmuşdu — bu o demək deyil ki, yığıncaq və konqreslərdə də bu kimi xorlar təşkil edilməlidir.

Filialların hesabatı

Görüşdə iştirak edən filialların Komitə üzvləri beş filialın hesabatını təqdim etdilər. Kennet Littl qeyd etdi ki, tezliklə ABŞ və Kanada üçün nəzərdə tutulan jurnalların əksər hissəsini Kanada filialı çap etməyə başlayacaq və nəticədə filialın işi onqat artacaq. Bunun üçün təzə alınmış çap maşını ikinövbəli iş rejimində gündə 16 saat işləyəcək.

Rayner Tompson Padşahlıq işinin Dominikan Respublikasındakı gedişatından, Albert Oli isə Nigeriyadakı fəaliyyətimizdən danışdı. Mozambik filialının Komitə üzvü Emil Kritsinger Yehovanın Şahidlərinin bu ölkədə onilliklər ərzində təqib olunduqdan sonra 1992-ci ildə qeydiyyata alındığını dedi. Bu üç ölkənin hər birində son vaxtlar təbliğçilərin sayı xeyli artmışdır. Avstraliya filialında xidmət edən Viv Morits bu filialın nəzdində olan Şərqi Timordakı nailiyyətlərimizdən söz açdı.

Rəhbərlik Şurasının komitələri

1976-cı ildən etibarən Yehovanın Şahidlərinin bütün fəaliyyəti Rəhbərlik Şurasının altı komitəsinin nəzarəti altında həyata keçirilir. Bir qədər sonra başqa qoyunların üzvləri onlara kömək üçün təyin edildi. Hal-hazırda bu köməkçilərin sayı 23 nəfər təşkil edir. Onların altısından müsahibə götürüldü. Ümumi götürdükdə, onların hamısı 341 il, orta hesabla isə, hər biri 57 il tammüddətli xidmətdə olmuşdur.

1943-cü ildə Bet-Eldə xidmət etməyə başlayan Don Adams izah etdi ki, Koordinatorlar komitəsi qalan beş komitənin koordinatorlarından təşkil olunub və onun məqsədi — bütün komitələrin nizamlı və effektiv şəkildə fəaliyyət göstərməsini təmin etməkdir. Bu komitə bütün dünyada fövqəladə hallar, təqiblər, təbii fəlakətlər zamanı zərər çəkən, eləcə də məhkəmə işləri və bu kimi çətinliklərlə bağlı Yehovanın Şahidlərinə yardım göstərilməsinə cavabdehdir.

Den Molxan bütün dünyada 19 851 bet-ellinin ruhani və fiziki firavanlığının qeydinə qalan Kadrlar komitəsinin fəaliyyətindən bəhs etdi. Devid Sinkler Nəşriyyat komitəsinin filialların material və avadanlıqla təchiz olunmasına necə nəzarət etdiyi haqda danışdı. Sonra təxminən 60 il Bet-Eldə xidmət edən Robert Uollen Xidməti komitənin Yehovanın xalqının təbliğ xidmətinə və yığıncaq fəaliyyətinə nəzarət etməsindən söz açdı. Uilyam Malenfant konqres proqramlarının hazırlanmasında Təlim komitəsinin çəkdiyi əməkdən danışdı. Sonda Con Vişuk Yazı komitəsinin nəşrlər üçün materialların hazırlanmasına nəzarət etməsindən bəhs etdia.

2010-cu ilin illik ayəsi məhəbbət haqqındadır

Növbəti üç məruzəni Rəhbərlik Şurasının üzvləri təqdim etdi. Qerit Löş nitqinə: «Başqalarının sizi sevməsini istəyirsinizmi?» — sualı ilə başladı. Qardaş izah etdi ki, hər bir kəsin məhəbbətə ehtiyacı var və məhəbbət insanı, sanki, çiçəkləndirir. Biz məhəbbət sayəsində mövcuduq, çünki Yehova bizi təmənnasız məhəbbətdən irəli gələrək yaradıb. Təbliğ və təlim işində iştirak etməyimizin əsas səbəbi də Yehovaya məhəbbətdir.

Müqəddəs Kitab prinsiplərinə əsaslanan məhəbbəti yalnız yaxınlarımıza deyil, düşmənlərimizə də təzahür etdirməliyik (Mat. 5:43—45). Qardaş dinləyiciləri İsanın bizim uğrumuzda nələrdən keçdiyi üzərində düşünməyə təşviq etdi: o döyüldü, istehzalara məruz qaldı, üzünə tüpürüldü və bədəni deşildi. Buna baxmayaraq, İsa onu edam edən əsgərlər üçün dua etdi. Məgər bu, bizi onu daha çox sevməyə təşviq etmirmi? Löş qardaş 1 Korinflilərə 13:7, 8 ayələrinə əsaslanan 2010-cu ilin illik ayəsini elan etdi: ‘Məhəbbət hər şeyə tab gətirər. Məhəbbət əsla tükənməz’. Bizim nəinki əbədi yaşamaq ümidimiz, həm də əbədiyyən sevib-sevilmək imkanımız var.

Yanacaq bakın doludurmu?

Samuel Herd nitqinə əyani nümunə ilə başladı. Təsəvvür et ki, dostunla maşında gedirsən və siz 50 kilometr yol qət etməlisiniz. Birdən göstəricidə yanacağın bitmək üzrə olduğunu görürsən. Dostuna bu haqda xəbər verəndə o deyir ki, narahat olmağa dəyməz, çünki hələ dörd litr var. Ancaq çox keçmir ki, qalan benzin də qurtarır. Yanacağın yarı yolda qurtaracağını və yolda qalmaq ehtimalının olduğunu bildiyin halda yola davam etmək müdriklik olardımı? Bakı müntəzəm olaraq doldurmaq daha yaxşı olmazdımı? Məcazi dillə desək, bakımızı daim yanacaqla dolu saxlamalıyıq; yanacaq — Yehova haqqında bilikdir.

Bunun üçün «bakımızı» müntəzəm olaraq doldurmalıyıq. Bunun dörd üsulu var. Birincisi, biz şəxsi öyrənmə ilə məşğul olmalı və Müqəddəs Kitabı yaxşı bilmək üçün onu hər gün oxumalıyıq. Sadəcə üzdən oxumaq kifayət deyil, oxuduqlarımızın mahiyyətinə varmalıyıq. İkincisi, ailəvi ibadət axşamlarını səmərəli keçirmək lazımdır. Biz hər həftə dayanıb bilik «bakımızı» qədərincə doldururuq, yoxsa azca doldurmaqla kifayətlənirik? Üçüncüsü, yığıncaq görüşləri də daxil olmaqla, Padşahlıq Zalında keçirilən bütün tədbirlərdə iştirak etməliyik. Dördüncüsü, sakit və rahat bir şəraitdə Yehovanın yolları üzərində dərindən düşünməliyik. Məzmur 143:5 ayəsində deyilir: «Qədim dövrlər yadıma düşür, Sənin bütün işlərini dərindən düşünürəm».

«Salehlər... günəş kimi parlayacaqlar»

Con Barr üçüncü və yekun məruzə ilə çıxış edərək İsanın dəlicə və buğda məsəlini izah etdi (Mat. 13:24—30, 38, 43). Bu məsəldə «biçin» zamanı ‘Səmavi Səltənətin oğullarının’ yığımı və dəlicələrin ayrılıb yandırılmasından bəhs edilir.

Barr qardaş aydın göstərdi ki, yığım sonsuzadək davam etməyəcək. O, Matta 24:34 ayəsini əsas gətirdi: «Bütün bu şeylər baş verincəyə qədər, bu nəsil keçib getməyəcəkdir». O, növbəti sözləri iki dəfə oxudu: «Görünür, İsa demək istəyirdi ki, 1914-cü ildə əlamət aydın olan zaman onu görən məsh olunmuşların həyatı ilə böyük məşəqqətin başlanğıcını görəcək məsh olunmuşların həyatı qismən kəsişəcək». ‘Bu nəslin’ nə qədər davam edəcəyini bilmirik, amma bu nəsil həyatları müəyyən vaxt ərzində kəsişən iki qrup insanlardan ibarətdir. Məsh olunmuşların yaşı müxtəlif olsa da, nəsli təşkil edən bu iki qrup son günlər ərzində yaşayan bir dövrün adamlarıdır. Necə də təsəllivericidir ki, 1914-cü ildə əlamət aydın olan zaman onu dərk edən məsh olunmuşları görən yaşca kiçik məsh olunmuşların hamısı böyük məşəqqətə qədər ölməyəcək!

‘Səmavi Səltənətin oğulları’ böyük səbirsizliklə səmavi mükafatlarını gözləyirlər. Bununla belə, hər birimizdən sonadək günəş kimi parlayaraq sadiqliyimizi qorumaq tələb olunur. Bu gün ‘buğda’ yığımının şahidi olmaq bizim üçün necə də böyük şərəfdir!

Axırıncı nəğmə ifa edildikdən sonra Rəhbərlik Şurasının üzvü Teodor Yaraç dua ilə görüşə yekun vurdu. İllik görüşün proqramı həqiqətən də çox ruhlandırıcı oldu!

[Haşiyə]

[5-ci səhifədəki çərçivə]

AĞSAQQALLAR ÜÇÜN MƏKTƏB

Rəhbərlik Şurasının üzvü Entoni Moris illik görüş zamanı elan etdi ki, yığıncaq ağsaqqalları üçün təlim proqramı təşkil olunacaq. ABŞ-dan olan ağsaqqallar üçün məktəb 2008-ci ilin əvvəllərində Patersondakı (Nyu–York ştatı) tədris mərkəzində fəaliyyət göstərməyə başlayıb. 72-ci sinfi təzəcə sona çatan bu məktəbdə indiyə qədər 6 720 ağsaqqal təlim alıb. Lakin görüləsi işlər hələ çoxdur. Təkcə ABŞ-da 86 000-dən çox ağsaqqal var. Buna görə də Rəhbərlik Şurası 2009-cu il dekabr ayının 7-dən başlayaraq Bruklində (Nyu–York) əlavə məktəbin keçirilməsinə razılıq verib.

İki ay ərzində dörd səyyar nəzarətçi Patersonda müəllim kimi təlim alıb. Onlar təlim vermək üçün Bruklinə köçüb, bundan savayı, daha dörd qardaş təlim keçib. Sonra onlar Bruklindəki məktəbdə, ilk dörd qardaş isə Konqres və Padşahlıq Zallarında təlim verməyə başlayıb. ABŞ-da hər həftə ingilis dilində altı məktəb keçirmək üçün 12 qardaş, ispan dilində məktəb keçirmək üçün isə daha dörd qardaş təlim alıb. Bu məktəb Padşahlıq Xidməti Məktəbini əvəz etməyəcək, onun məqsədi ağsaqqallara həqiqətdə tərəqqi etməyə kömək etməkdir. Bütün dünyada isə filiallar bu məktəbi 2011-ci xidmət ilində Konqres və Padşahlıq Zallarında keçirməyə başlayacaqlar.

[4-cü səhifədəki şəkillər]

İllik görüş «Yehovanı nəğmələrdə tərənnüm edin» adlı yeni mahnı kitabından ifa olunan nəğmələrlə açıldı