Ailədə üzləşdiyiniz müqavimətlərə müdriklik və anlayışla tab gətirin
1 İstehzalar, zorakılıq, həbs cəzası, təbliğ xidmətinin, məsihçi görüşlərinin, həmçinin həmimanlılarla ünsiyyətin qadağan olunması, Müqəddəs Kitabın və ona əsaslanan ədəbiyyatların müsadirəsi — bu kimi xəbərləri eşidərkən, adətən bacı-qardaşlarımızın sıxışdırıldığı ölkələri xatırlayırıq. Bəs siz heç düşünmüsünüzmü ki, yığıncaqda daim ünsiyyətdə olduğumuz bir çox bacı-qardaşlarımız hal-hazırda, imanlarına şərik olmayan həyat yoldaşları tərəfindən buna oxşar təzyiqlərə mə’ruz qalırlar?
2 Əlbəttə, həyat yoldaşları məsihçi olmayanların hamısı bu cür şiddətli müqavimətlərlə üzləşmir. Lakin buna baxmayaraq, onların imanı ciddi sınaqlara mə’ruz qalır (Yəh. 15:20; 1 Kor. 7:12-26). Çətinliklərə tab gətirə bilmələri üçün bizim köməyimizə və ruhlandırmağımıza ehtiyacları vardır (İbr. 10:24, 25). Xüsusilə ağsaqqallar onlar üçün təravət və rəhbərlik mənbəyi olmalıdırlar (Yeşaya 32:1, 2).
Müqavimətlərin səbəbi nədir və onların qarşısını almaq üçün nə etmək olar.
3 Hətta məsihçi olmayan həyat yoldaşının müqaviməti sərtləşdikdə belə, ümidsizliyə qapılmağa dəyməz (1 Kor. 13:7). Məsələn, əvvəllər həyat yoldaşına müqavimət göstərən bir çoxları indi Yehovaya xidmət edirlər. Daxili mə’yusluq və qorxu hissi özünü çox vaxt müqavimət, qəzəb, hətta zorakılıq vasitəsilə büruzə verir. Ərin müqavimət göstərməsinin səbəbi sadəcə olaraq həqiqəti xoşlamaması deyil, məsihçi fəaliyyətinin arvadının daha çox diqqətini və vaxtını alıb ondan uzaqlaşdıracağından, onların münasibətlərinə zərər gətirəcəyindən və ailənin dağılmasından qorxması ola bilər. Və ya həyat yoldaşının ona əvvəlki qədər diqqət yetirməyəcəyi fikri onu hiddətləndirir, yaxud o, başqalarının qarşısında pərt olmaqdan qorxur. Müqavimətlərin səbəbini başa düşməyə çalışmaqdan əlavə, imanlı bir qadın kimi, müdrik davranmaq üçün nə edə bilərsən?
4 Müqavimətlərin səbəbini başa düşdükdə, müqəddəs ruhun səmərəsini təzahür etdirmək asan olacaq (Qalat. 5:22). Yoldaşınla öz imanını bölüşməyə münasib vaxt seçərkən yadda saxla ki, çox vaxt hörmətcil sükut və məsihçiyə layiq davranış daha yaxşı nəticə verir. Beləliklə, müdrik qadın heç vaxt məsihçi olmayan həyat yoldaşını, Müqəddəs Kitabdan yerli-yersiz söz salmaqla əsəbiləşdirməyəcək (1 Pet. 3:1-6). Sən həyat yoldaşınla vaxt keçirdikdə, məsihçi normaları çərçivəsində ona kömək etdikdə və əməksevərlik göstərdikdə ona aydın olacaq ki, məsihçi olmaq ailəyə və evə laqeyd yanaşmağa gətirib çıxarmır, əksinə, ərə və ya qadına öz vəzifəsini daha yaxşı yerinə yetirməkdə kömək edir və evdə dolğun, isti ailə atmosferi yaradır.
5 Əgər münasibdirsə, imkan yarandıqda məsihçi olmayan həyat yoldaşını bə’zi bacı-qardaşlarla tanış et. Bə’zən başqaları imanlı ailə üzvündən daha çox şey edir, hətta onunla Müqəddəs Kitab öyrənməsini belə başlaya bilirlər. Əvvəllər həqiqətə müqavimət göstərənlərin bir çoxu, məhz yığıncağın digər üzvləri ilə tanış olub, onların həyat tərzinə hörmət etdikləri üçün Müqəddəs Kitabı öyrənməyə başlamışlar.
6 Biz məsihçilər, ailə üzvlərindən və ya həyat yoldaşından artıq Allaha itaət etməliyik. Lakin bununla yanaşı müqavimətlərlə üzləşən hər kəs sözündə və davranışında gözəl nümunə verərək xoşbəxt, isti ailə atmosferi yaratmaq üçün əlindən gələni etməlidir. Bununla o, Allahı izzətləndirir (Həv. iş. 5:29; 1 Kor. 7:16).