Yehovanın yaşlı xidmətçilərini qiymətləndir
1 Dul olmasına və yaşının ötməsinə baxmayaraq 84 yaşlı Anna “mə’bəd ərazisindən heç ayrılmaz” idi. Sadiqliyinə görə Yehova ona xüsusi xeyir-dua verdi (Luka 2:36-38). Bu gün çox bacı-qardaşlar müxtəlif çətinliklərə baxmayaraq, Annaya bənzər tərzdə, gözəl ruh təzahür etdirirlər. Allahın sadiq xidmətçiləri xəstələnəndə və ya yaşlı olduqları üçün əvvəllər etdiyi qədər xidmət edə bilməyəndə, onlar ruhdan düşə bilərlər. Gəlin onları ruhlandırmağa və ruhani fəaliyyət üçün yaxşı qrafik tutmaqda kömək etməyə dair bir neçə praktiki imkanı nəzərdən keçirək.
2 Yığıncaq görüşləri və təbliğ xidməti. Qayğıkeş qardaşlar yaşlı bacı-qardaşları görüş keçirilən yerə nəqliyyatla gətirəndə, yığıncaq görüşlərində müntəzəm olaraq iştirak etmək onlara bir qədər asan olur. Bu, həm onları — Yehovaya uzun illər sədaqətlə xidmət edən yaşlıları, həm də yığıncağın digər üzvlərini ruhən möhkəmləndirir. Sən yaşlı insanlara bu cür yaxşılıq etmisənmi? (İbr. 13:16).
3 Təbliğ xidmətində müntəzəm iştirak etmək məsihçilərə sevinc və məmnunluq gətirir. Lakin yaşlı və zəiflər üçün bu iş çox çətindir. Elə etmək olmazmı ki, yaşlı olan əziz bacı-qardaşlarımız xidmətin bə’zi növlərində sənin ‘əməkdaşların’ olsunlar? (Rom. 16:3, 9, 21). Onları birlikdə telefonla şəhadətlik etməyə, kimə isə təkrar baş çəkməyə və ya Müqəddəs Kitab öyrənməsi keçirməyə də’vət etmək olar. Əgər yaşlı bacı-qardaşlarımız evdən çıxa bilmirlərsə, Müqəddəs Kitabı öyrənən adam onun evinə gələ bilməzmi?
4 Öyrənmə və ünsiyyət. Hərdənbir bə’ziləri yaşlı bacı-qardaşları özlərinin ailəvi öyrənmələrinə də’vət edir, digərləri isə bu cür öyrənməni həmin bacı-qardaşların evində keçirirlər. Bir ana iki uşağı ilə “Mənim Müqəddəs Kitab hekayələri kitabım” nəşrini öyrənmək üçün yaşlı bacının evinə gedir. Bu cür ünsiyyət isə qarşılıqlı ruhlandırılmaya səbəb olur. Yaşlıları nahar yeməyinə və ya birlikdə vaxt keçirməyə də’vət etdikdə də minnətdarlıq hissi duyurlar. Əgər yaşlı bacı və ya qardaş özünü pis hiss edirsə və uzun sürən ziyarətlər arzu olunmazdırsa, onlarla birlikdə nə isə oxumaq, dua etmək və ya ruhlandırıcı hadisələrlə bölüşmək üçün onlara sadəcə olaraq zəng vurmaq və ya qısa müddət üçün baş çəkmək olar (Rom. 1:11, 12).
5 Yehova, yaşlı xidmətçilərini qiymətləndirir (İbr. 6:10, 11). Əgər biz də onları qiymətləndirər və ruhani fəaliyyət üçün yaxşı qrafikə əsasən yaşamaqda onlara kömək edəriksə, Yehovanı təqlid edə bilərik.