Bu ən’amı sığışdır
1 Bir dəfə İsa şagirdləri ilə nikah haqqında söhbət edərkən, subaylığı ən’am adlandırdı. O dedi: “Bunu sığışdıra bilən sığışdırsın” (Mat. 19:10-12, YD). Bir neçə ildən sonra həvari Pavel subaylığın üstün cəhətlərindən yazmışdır və başqalarını da özü kimi subay qalmağa təşviq etmişdir (1 Kor 7:7, 38). Bu gün bir çoxları subaylıq ən’amını ‘sığışdırmış’ və onun üstün cəhətlərindən faydalanmışlar. Bu cəhətlərdən bə’ziləri hansılardır?
2 Yayınmadan xidmət etmək. Pavel demək istəyirdi ki, subay qalaraq o, Yehovaya “fikrini dağıtmayaraq”, yə’ni yayınmadan xidmət edə bilir. Bu gün də eyni tərzdə subay qardaş, məsələn, Xidməti Təkmilləşdirmə Məktəbində tə’lim almaq üçün sə’y göstərə bilər. Ümumiyyətlə, pioner xidmətinə başlamaq, başqa dili öyrənmək, tələbat olan yerə köçmək, Beyt-Eldə xidmət etmək və ya xidmətini daha necəsə genişləndirmək subay bacı-qardaşlar üçün daha asandır. Onların, Müqəddəs Kitabı dərindən tədqiq etmək, üzərində düşünmək və səmimi duada Yehovaya müraciət etmək üçün daha çox vaxtları və imkanları var. Adətən evli olmayanlar başqalarına daha çox kömək edə bilirlər. Bunların hamısı subaylığın gətirdiyi ‘xeyirdir’ (1 Kor. 7:32-35; Həv. iş. 20:35).
3 Allaha yayınmadan xidmət etmək bol-bol xeyir-dualar gətirir. Keniyada 27 il xidmət etmiş bir subay bacı yazır: “Orada mənim çoxlu dostlarım vardı və mən olduqca çox təbliğ edirdim! Biz hər şeyi birlikdə edir və bir-birimizə qonaq gedirdik... Subaylıq mənə daha çox azadlıq verirdi, mənə heç nə mane olmurdu, hər zaman xidmət etməklə məşğul idim və bundan böyük sevinc duyurdum”. O əlavə edir: “Həmin illər ərzində mən Yehovaya daha çox yaxınlaşdım”.
4 Bu ən’amı necə ‘sığışdırmalı’? İsa demişdi ki, subaylıq “göylərin Padşahlığı uğrunda” olmalıdır (Mat. 19:12, İ–93). Subaylıq sevinc və məmnunluq gətirsin deyə, hər bir hədiyyə ilə olduğu kimi, onu layiqli şəkildə istifadə etmək lazımdır. Subaylığın təqdim etdiyi imkanlardan istifadə edərək, Yehovadan hikmət və qüvvət diləyərək, bir çox subay məsihçilər bu ən’amı sığışdırmağın nə dərəcədə qiymətli olduğunu dərk etmişlər.