Müqəddəs Kitabı öyrənənlərə ruhən böyüməkdə kömək edirik. VI hissə.

Öyrənən adam suallar verəndə nə etmək lazımdır?

¹ Müntəzəm olaraq Müqəddəs Kitab öyrənməsi keçirilirsə, bir mövzudan o biri mövzuya keçmək əvəzinə, Müqəddəs Kitabın tə’limlərini ardıcıl surətdə müzakirə etmək daha yaxşı olardı. Bunun sayəsində, öyrənən insan dəqiq biliyin təməlini qoyacaq və ruhən inkişaf edəcək (Kolos. 1:9, 10). Lakin öyrənənlər çox vaxt məşğələ zamanı müxtəlif suallar verirlər. Belə halda nə etməli?

² Dərrakəli ol. Öyrənilən materialın müzakirəsinə aid olan suallara dərhal cavab vermək olar. Lakin əgər verilən sual növbəti dərslərdə müzakirə ediləcəksə, bunu sadəcə qeyd etmək kifayət edər. Amma verilən sual öyrənilən materiala aid deyilsə, yaxud düzgün cavab vermək üçün tədqiqat aparmaq lazım gəlirsə, həmin sualı öyrənmədən sonra və ya başqa vaxt müzakirə etmək daha yaxşı olar. Bə’zi təbliğçilər aşkar etmişlər ki, öyrənənin verdiyi sualları yazanda, o əmin olur ki, onun suallarına ciddi yanaşılır və bu, öyrənilən mövzudan kənara çıxmamağa kömək edir.

³ Müqəddəs Kitabın bir çox tə’limləri öyrənmə üçün əsas götürülən nəşrlərdə qısaca müzakirə edilir. Bəs əgər öyrənən müəyyən tə’limi qəbul etməkdə çətinlik çəkirsə və ya yalan e’tiqada tərəfdardırsa, onda nə etmək olar? Bu zaman Müqəddəs Kitabın həmin mövzuya dair dediklərini müzakirə etmək üçün öyrənənlə əlavə mə’lumatı nəzərdən keçirmək faydalı ola bilər. Əgər öyrənən adam yenə də öz fikrində qalarsa, mövzunun müzakirəsini başqa vaxta keçir və onunla öyrənməni davam etdir (Yəh. 16:12). O, Müqəddəs Kitabdan daha çox bilik əldə etməklə və ruhani cəhətdən inkişaf etməklə, həmin tə’limi özü başa düşə bilər.

⁴ Təvazökar ol. Əgər sən öyrənən adamın verdiyi sualın cavabını dəqiq bilmirsənsə, şəxsi fikrini deməkdən qaçın (1 Pet. 4:11; 2 Tim. 2:15). Başa sal ki, sən bu sualı araşdıracaqsan, cavabını isə gələn dəfə verəcəksən. Hətta fürsətdən istifadə edərək, ona necə tədqiqat aparmağı da öyrədə bilərsən. Yehovanın təşkilatının təqdim etdiyi müxtəlif araşdırma vəsaitlərindən necə istifadə etməyi tədricən göstər. Bu üsul, vaxtilə öz suallarına sərbəst cavab tapmaqda ona kömək edəcək (Həv. iş. 17:11).