Təbliğ xidməti mətanətli olmağımıza kömək edir
1 Allahın Kəlamı bizi təşviq edir ki, «qarşımıza qoyulan yarışda mətanətlə qaçaq» (İbr. 12:1). Yarışda qələbə qazanmaq üçün qaçışçıya mətanətli olmaq tələb olunduğu kimi, əbədi həyat ən’amına nail olmaq üçün bu keyfiyyət bizə də lazımdır (İbr. 10:36). Məsihçi xidməti sona qədər mətanətli qalmağımıza necə kömək edir? (Mat. 24:13).
2 Ruhən möhkəmlənirik. Müqəddəs Kitabdan ədalətli yeni dünya haqqındakı gözəl xəbəri bəyan etməklə öz ümidimizi də möhkəmləndiririk (1 Salon. 5:8). Müntəzəm olaraq təbliğ xidmətində iştirak etməyimiz Müqəddəs Kitabdan öyrəndiyimiz həqiqətləri başqaları ilə bölüşməyimizə kömək edir. Xidmət etdiyimiz zaman öz imanımızı qoruyur və ruhən möhkəmlənirik.
3 Başqalarını məharətlə öyrətməyi bacarmaq üçün Müqəddəs Kitab həqiqətlərini özümüz aydın başa düşməliyik. Müqəddəs Kitaba əsaslanan materialı araşdırmaq və onun üzərində düşünmək lazımdır. Belə sə’y göstərməyimiz sayəsində biliyimiz dərinləşir, imanımız möhkəmlənir və ruhən təravətlənirik (Sül. məs. 2:3-5). Beləliklə, başqalarına kömək etdiyimiz zaman özümüz də möhkəmlənirik (1 Tim. 4:15, 16).
4 Xidmətdə sə’ylə iştirak etməyimiz İblisin və cinlərin hücumlarına qarşı durmaq üçün tələb olunan ‘Allahın bütün zirehlərinin’ əsas bir hissəsidir (Efes. 6:10-13, 15). Müqəddəs xidmətlə məşğul olmağımız diqqətimizi ruhən inkişaf etdirən dəyərlərə mərkəzləşdirməyə və Şeytan dünyasının pozucu tə’sirindən qaçınmağa kömək edir (Kolos. 3:2). Başqalarına Yehovanın yolları ilə getməyi öyrədərkən, biz özümüz də nümunəvi həyat tərzi sürməyin necə vacib olduğunu unutmayacağıq (1 Pet. 2:12).
5 Allah bizi möhkəmləndirir. Bundan əlavə, təbliğ işində iştirak etməklə, hər şeydə Yehovaya güvənməyi öyrənirik (2 Kor. 4:1, 7). Allaha güvənməyi bacarmaq doğrudan da xeyir-duadır! Bu bizə yalnız xidmətimizi icra etməyə deyil, həmçinin gündəlik həyatda qarşılaşdığımız çətinliklərin öhdəsindən gəlməyə də kömək edir (Filip. 4:11-13). Həqiqətən də, mətanətli olmaq üçün, Yehovaya tam güvənməyimiz vacibdir (Məz. 55:22). Beləliklə, təbliğ bir çox sahələrdə mətanətli olmağımıza kömək edir.