Xidmətimizi genişləndirməyə sə’y göstərək
1 Həvari Pavel məsihçilərə Allahın yolu ilə getməyi və ‘bu yolda daha çox tərəqqi etməyi’ nəsihət etmişdi (1 Salon. 4:1). Biz bunu necə edə bilərik? Məsələn, ‘xidmətimizi tam şəkildə icra etməklə’ biz daima onu genişləndirməyə can atmalıyıq (2 Tim. 4:5).
2 Bizi nə təşviq edir? Xidmətimizi genişləndirmək istəyi Yaradanımıza daha çox qulluq etmək arzusundan irəli gəlir. Biz ruhani cəhətdən inkişaf etmək və xidmətimizi təkmilləşdirmək istəyirik. Yaxşı planlaşdırılmış gün və düzgün niyyət teokratik məqsədlərə nail olmağa kömək edəcək (Məz. 1:1, 2; Filip. 4:6; İbr. 10:24, 25).
3 Xidmətimizi genişləndirmək istəyiriksə, özümüzdə fədakarlığı və səxavətliliyi inkişaf etdirməliyik. Buna nail olmaq üçün dua edərək İsanın gözəl nümunəsi üzərində düşünməliyik (Mat. 20:28). İsa yer üzündə olanda başqalarına xidmət etməkdən böyük sevinc duyurdu (Həv. iş. 20:35). Biz insanlara canlı maraq göstərməklə və xidmətimizi genişləndirmək üçün imkanlar axtarmaqla İsanın nümunəsini təqlid edə bilərik (Yeşaya 6:8).
4 Valideynlərin rolu. Başqalarına xidmət etmək və xidməti genişləndirmək arzusunu uşaqlara lap körpəlikdən aşılamaq olar. Ailə üzvlərinin çalışqanlığı və daha çox xidmət etmək sə’yləri uşaqların nəzərindən qaçmayacaq. Bir qardaş uşaqlıqda babasına yığıncağın işlərində kömək edirdi. Babasının çalışqanlığını və xidmətdən duyduğu sevinci görmək, onda xidmətini genişləndirmək və qardaşlara daha çox xidmət etmək arzusu yaratdı. Hal-hazırda o, xidməti köməkçidir.
5 Qardaşlara tələbat. «Nəzarətçi olmağa həvəs göstərən, xeyirli bir iş arzu edir» (1 Tim. 3:1). Bu sözlər qardaşları Yehovanın təşkilatında xidmətdə üstünlüklər qazanmaq üçün müəyyən tələblərə müvafiq olmağa təşviq edir. Bunun üçün xüsusi qabiliyyət və ya iste’dad tələb olunmur. Xidmətini genişləndirmək istəyən qardaş Padşahlığın işini birinci yerə qoyacaq və sə’ylə təbliğ edəcək (Mat. 6:33; 2 Tim. 4:5). O çalışacaq ki, başqalarına yaxşı nümunə olsun.
6 Bütün dünyada. Yehova yığım işini sür’ətləndirir (Yeşaya 60:22). Xidmətlərini genişləndirməkdə İsanın nümunəsini təqlid edənlərə böyük ehtiyac var. 2006-cı xidmət ili üçün ümumdünya hesabatından görünür ki, həmin il 248 327 nəfər vəftiz olunub. Orta hesabla hər gün 680-dən çox adam həqiqətə gəlmişdir! Gəlin hamımız xidmətdə daha çox iştirak etmək imkanları axtarmağa davam edək.