Allahın gözündə necə insanam?
1. Hansı mənada Müqəddəs Kitab güzgüyə bənzəyir?
1 Güzgüyə tez-tez baxırsan? Əksəriyyətimiz güzgüyə tez-tez baxırıq, çünki bu, bizə xarici görünüşümüzə daim nəzər yetirməyə kömək edir. Müqəddəs Kitab güzgüyə bənzədilir. Allahın Kəlamını oxumaqla biz özümüzü, Yehovanın bizi gördüyü kimi, görürük (1 Şam. 16:7; Yaq. 1:22—24). Allahın Kəlamı «ürəyin düşüncə və niyyətlərini üzə [çıxara]» bilər (İbr. 4:12). Bəs Müqəddəs Kitabı hər gün oxuyub üzərində düşünmək daha səriştəli müjdəçi olmaq üçün möhkəmləndirməli olduğumuz cəhətləri görməyə necə kömək edə bilər? (Məz. 1:1—3).
2. Müqəddəs Kitab özümüzü yoxlamağa necə kömək edir?
2 Müqəddəs Kitabdan güzgü kimi istifadə et. Müqəddəs Kitabda qələmə alınan sadiq insanların nümunəsi Yehovanın hansı keyfiyyətlərdən razı qaldığını bizə öyrədir. Məsələn, Davud Allahın adının qeyrətini çəkirdi (1 Şam. 17:45, 46). Yeşaya gərgin mühitdə könüllü olaraq cəsarətlə təbliğ edirdi (Yeşaya 6:8, 9). Səmavi Atasına böyük məhəbbətdən irəli gələrək İsa xidmətə ağır yük kimi yox, sevinc və təravət mənbəyi kimi baxırdı (Yəh. 4:34). Birinci əsrdəki məsihçilər də canla-başla təbliğ edir, Yehovaya güvənir və təslim olmurdular (Həv. iş. 5:41, 42; 2 Kor. 4:1; 2 Tim. 4:17). Belə nümunələr üzərində düşünmək bizə çatışmayan cəhətlərimizi görməyə və müqəddəs xidmətə yararlı olmaq üçün lazımi keyfiyyətlər inkişaf etdirməyə kömək edir.
3. Nə üçün dəyişiklik etməyi təxirə salmamalıyıq?
3 Qüsurları düzəlt. Sözsüz ki, güzgüyə baxıb qüsurları görməməzlikdən gəlmək yaxşı olmazdı. Biz Yehovaya dua edə bilərik ki, bizə qüsurlarımızı görməyə və onları düzəltməyə kömək etsin (Məz. 139:23, 24; Luka 11:13). Vaxt azaldığı və həyat çətinləşdiyi üçün lazımi dəyişikliklər etməyi təxirə salmamalıyıq (1 Kor. 7:29; 1 Tim. 4:16).
4. Allahın Kəlamına diqqətlə baxan və ona uyğun davranan insan haqda nə demək olar?
4 Yehovanın gözündə insanın daxili aləmi zahirindən daha vacibdir (1 Pet. 3:3, 4). Bəs Allahın Kəlamına diqqətlə baxan və ona uyğun davranan insan haqda nə demək olar? O, «unutqan dinləyici olmayıb eşitdiklərini yerinə yetirdiyi üçün öz işində xoşbəxt olacaq» (Yaq. 1:25). Bəli, «Yehovanın calalını güzgü kimi əks [etdirdiyimiz]» üçün biz xoşbəxt və səriştəli təbliğçi olacağıq (2 Kor. 3:18).