Bizim üçün «Allaha yaxınlaşmaq xoşdur»!

1, 2. a) Kiminləsə yaxın dost olmaq üçün nə etmək lazımdır? b) Bu məqalədə nə müzakirə olunacaq?

SİZİN yaxın dostunuz var? Onunla necə dostlaşmısınız? Yəqin ki, onunla vaxt keçirmisiniz, həyatda hansı çətinliklərlə üzləşdiyini, nəyi sevib, nəyi sevmədiyini öyrənmisiniz. Ondakı dəyərli keyfiyyətləri görmüsünüz və ondan nümunə götürmək istəmisiniz. Beləcə, getdikcə onu daha çox sevmisiniz.

² Kiminləsə yaxın dost olmaq üçün vaxt və zəhmət tələb olunur. Yehova ilə dostlaşmaq üçün də bunları etmək lazımdır. Bu məqalədə Allaha yaxınlaşmağın yollarından və bunun faydalarından danışacağıq. Əvvəlcə, gəlin görək ən yaxşı Dostumuz Yehovaya yaxınlaşmağın hansı faydaları var.

3. Nəyə görə Yehovaya yaxınlaşmağın faydaları üzərində düşünməliyik? Nümunə çəkin.

³ Sözsüz ki, Yehovaya yaxınlaşmaq bizə xoşdur, bu bizim xeyrimizədir. Amma bunun nə dərəcədə xeyrimizə olduğu üzərində düşünsək, Ona daha da yaxınlaşmaq istəyəcəyik (Zəb. 63:6—8). Məsələn, hər birimiz bilirik ki, sağlam qidalanmaq, idmanla məşğul olmaq, kifayət qədər dincəlmək və yetərincə su içmək xeyrimizədir. Amma çoxları bunların xeyri barədə düşünmür, buna görə də sağlamlıqlarına fikir vermirlər. Bununla belə, yaxşı vərdişlərin bizə xeyri barədə nə qədər düşünsək, bir o qədər onlara əməl etmək istəyəcəyik. Eynilə, Yehovaya yaxınlaşmağın xeyrimizə olduğunu bilsək də, gərək bu barədə tez-tez düşünək. Onda Dostumuz Yehovaya yaxın olmağa həmişə can atacağıq (Zəb. 119:27—30).

4. Məzmurçunun keçirdiyi hisslər Zəbur 73:28 ayəsində necə təsvir olunub?

⁴ Zəbur 73:28 ayəsini oxuyun. 73-cü məzmurun yazarı lavili idi və Yehovanın məbədində musiqiçi kimi xidmət edirdi. Ehtimal ki, o, Yehovaya uzun illər idi sədaqətlə ibadət edirdi. Bununla belə, başa düşürdü ki, Allaha yaxınlaşmağın xoş olduğunu həm özünə, həm də başqalarına daima xatırlatmalıdır. Bəs biz Yehovaya yaxınlaşmağın hansı faydalarını özümüzə xatırlatmalıyıq?

«ALLAHA YAXINLAŞMAQ» BİZİ XOŞBƏXT EDİR

5. a) Nəyə görə Yehovaya daha da yaxın olmaq bizi xoşbəxt edir? b) Yehovanın verdiyi hikmət sizə necə kömək edib və qoruyub? (Məsəllər 2:6—16).

⁵ Yehovaya nə qədər yaxın olsaq, bir o qədər xoşbəxt olacağıq (Zəb. 65:4). Xoşbəxt olmağımız üçün çox səbəb var. Məsələn, Allahın Kəlamında yazılanlara əməl edəndə daha da hikmətli oluruq. Qazandığımız hikmət bizi pis təsirlərdən və ciddi səhvlərdən qoruyur. (Məsəllər 2:6—16 ayələrini oxuyun.) Elə buna görə də Müqəddəs Kitabda deyilir: «Xoşbəxt o kəsdir ki, hikmət tapıb, o kəsdir ki, bəsirətə nail olub» (Məs. 3:13).

6. Məzmurçunun sevincini itirməsinə səbəb nə idi?

⁶ Sözsüz ki, Yehovanın dostlarının da kədərə qərq olduğu vaxtlar olur. 73-cü məzmurun yazarı da mənfi düşüncələrə qapıldığından sevincini itirmişdi. Allahı veclərinə almayan, Ona itaət etməyən pis insanların güzəranının yaxşı olduğunu düşünməyə başlamışdı. Buna görə ürəyində qəzəb və paxıllıq hissi yaranmışdı. Məzmurçu yanlış olaraq belə qənaətə gəlmişdi ki, zorakı, lovğa insanlar var-dövlət içində, sağlam yaşayırlar, hətta dərd nədir bilmirlər (Zəb. 73:3—7, 12). Bu fikir ona o qədər əzab verirdi ki, hətta bir məqamda Yehovanın yolunda hədər yerə zəhmət çəkdiyini düşünmüşdü. Bu qəmgin məzmurçu belə sözlər demişdi: «Deməli, əbəs yerə ürəyimi saf etmişəm, əllərimi günahsızlıq suyunda yumuşam» (Zəb. 73:13).

7. Kədərli anlarımızda nə edə bilərik? (Həmçinin şəklə baxın.)

⁷ Lakin məzmurçu mənfi fikirlərin onun əlini-qolunu bağlamasına imkan vermədi. O, hərəkətə keçdi. «Allahın müqəddəs məkanına» girdi. Orada Yehova ona düzgün qənaətə gəlməyə kömək etdi (Zəb. 73:17—19). Biz də kədərli olanda ən yaxın Dostumuz Yehova bundan agah olur. Əgər Ona dua edib Kəlamı və yığıncaq vasitəsilə göstərdiyi köməyi qəbul etsək, kədərə üstün gəlməyə güc tapacağıq. Hətta problemlərin içində itib-batanda Yehova bizə sakitlik, qəlb rahatlığı verəcək (Zəb. 94:19)a.

«ALLAHA YAXINLAŞMAQ» HƏYATIMIZA MƏNA QATIR VƏ BİZƏ ÜMİD VERİR

8. Allaha yaxınlaşmaq hansı vacib sahələrdə bizim xeyrimizədir?

⁸ Allaha yaxınlaşmaq iki vacib sahədə bizim xeyrimizədir. İlk növbədə bu bizə mənalı həyat sürməyə kömək edir. İkincisi, Allaha yaxınlaşanda gözəl gələcəyə ümidimiz olur (Ərm. 29:11). Gəlin hər iki sahəni ətraflı araşdıraq.

9. Allaha yaxınlaşmaq həyatımıza necə məna qatır?

⁹ Allaha yaxınlaşmaq həyatımıza məna qatır. Bu gün çoxları Allahın varlığını inkar edir. Onlar düşünürlər ki, həyatın məqsədi, məramı yoxdur və gec-tez bəşəriyyətin mövcudluğu sona çatacaq. Lakin biz Müqəddəs Kitab əsasında əmin olmuşuq ki, Allah var və Onun yolunda etdiklərimiz əbəs deyil, çünki O «Onu cidd-cəhdlə axtaranlara mükafat» verir (İbr. 11:6). Yehova bizi Ona ibadət etmək təlabatı ilə yaradıb. Buna görə Ona ibadət edəndə əsl xoşbəxtlik duyuruq (Qan. 10:12, 13).

10. Zəbur 37:29 ayəsinə əsasən Yehova ümidini Ona bağlayanlara nə vəd edir?

¹⁰ Çoxlarının ümidi yalnız bu həyatla məhdudlaşır. Onlar işə gedib-gəlir, ailə, uşaq sahibi olur və təqaüdə çıxacaqları vaxt üçün pul yığırlar. İnsanlar Allahın gələcəklə bağlı vədlərindən bixəbərdirlər. Yehovanın xidmətçiləri isə ümidlərini Ona bağlayıblar (Zəb. 25:3—5; 1 Tim. 6:17). Biz Dostumuza, Allaha güvənirik. Bilirik ki, O, verdiyi vədləri yerinə yetirəcək. Bizi qarşıda saysız-hesabsız gözəl nemətlər gözləyir. Ən əsası isə Yehovaya Cənnətdə əbədiyyən qulluq edəcəyik. (Zəbur 37:29 ayəsini oxuyun.)

11. Yehova ilə dostluq etməyin hansı faydasını görürük və bu zaman Yehova hansı hissləri keçirir?

¹¹ Allaha yaxınlaşmağın bizə başqa sahələrdə də faydası var. Məsələn, Yehova Ona yaxın olan kəslərin günahını tövbə etdikləri təqdirdə bağışlayacağına söz verir (Əşy. 1:18). Bunun sayəsində biz keçmiş günahlarımıza görə artıq vicdan əzabı çəkmirik (Zəb. 32:1—5). Bundan əlavə, Yehovaya yaxınlaşmağımız Onun qəlbini şad edir (Məs. 23:15). Sözsüz ki, bunlar Yehova ilə dostluğun gətirdiyi nemətlərdən yalnız bir neçəsidir. Bəs Onunla dostluğunuzu möhkəmləndirmək üçün daha nə edə bilərsiniz?

ALLAHA YAXINLAŞMAĞA DAVAM EDƏK

12. Allaha daha da yaxınlaşmaq üçün nələr etmisiniz?

¹² Əgər siz vəftiz olunmuş məsihisinizsə, Yehovaya yaxınlaşmaq üçün artıq böyük yol qət etmisiniz. Siz Yehova Allahı və Məsih İsanı daha yaxından tanımısınız, keçmiş günahlarınızdan tövbə etmisiniz, imanınızın güclü olduğunu göstərmisiniz və Onun iradəsinə uyğun davranmaq üçün əlinizdən gələni etmisiniz. Amma Yehovaya daha da yaxın olmaq üçün bunları daima etməlisiniz (Kol. 2:6).

13. Yehova ilə münasibətimizi möhkəmləndirmək üçün hansı üç addımı atmalıyıq?

¹³ Yehova ilə münasibətlərinizi daha da möhkəmləndirmək üçün nə etmək lazımdır? 1) Allahın Kəlamını mütaliə edib araşdırmağa davam etməliyik. Bu zaman məqsədimiz sadəcə Yehova haqda ümumi məlumat əldə etmək olmamalıdır. Biz Yehovanın düşüncə tərzini, bizdən nə gözlədiyini başa düşməyə çalışmalıyıq və Kəlamındakı prinsiplərə uyğun yaşamalıyıq (Efes. 5:15—17). 2) İmanımızı möhkəmləndirməliyik. Bunun üçün Yehovanın bizi nə qədər çox sevdiyi, bunu müxtəlif yollarla necə göstərdiyi üzərində düşünməliyik. 3) Yehovaya ağır gedən hər şeyə nifrət etməliyik və bu cür işlərlə məşğul olan insanlarla dostluq etməməliyik (Zəb. 1:1; 101:3).

14. 1 Korinflilərə 10:31 ayəsinə əsasən gündəlik həyatda etdiyimiz hansı şeylər Yehovanı razı salır? (Həmçinin şəkillərə baxın.)

¹⁴ 1 Korinflilərə 10:31 ayəsini oxuyun. Yehovaya məqbul işlərlə məşğul olmaq çox vacibdir. Amma bu işlər yığıncaq və təbliğlə bitmir. Gündəlik həyatda məşğul olduğumuz işlərlə də Yehovanı razı salmalıyıq. Məsələn, hər sahədə dürüst olanda və sahib olduğumuz şeyləri başqaları ilə bölüşəndə Yehovanın qəlbini sevindiririk (2 Kor. 8:21; 9:7). Həmçinin Yehova istəyir ki, bizə verdiyi həyat ənamına yüksək dəyər verək. Buna görə də biz yemək-içmək məsələsində tarazlığı qoruyuruq və başqa üsullarla sağlamlığımızın qeydinə qalırıq. Hətta xırda görünən məsələlərdə belə Yehovanı razı salmağa çalışanda O bunu görür və bizə olan sevgisi daha da artır (Luka 16:10).

15. Yehova insanlarla necə rəftar etməyimizi istəyir?

¹⁵ Yehova həm salehlərə, həm də qeyri-salehlərə qarşı xeyirxahdır (Mət. 5:45). O bizim də başqaları ilə eyni cür rəftar etməyimizi istəyir. Məsələn, heç kəsin haqqında pis danışmamalıyıq, davakar olmamalıyıq və hamı ilə mülayim davranmalıyıq (Tit. 3:2). Bunu nəzərə alaraq kimsə sadəcə Yehovaya ibadət etmir deyə ona xor baxmayacağıq (2 Tim. 2:23—25). Biz həmişə hər kəslə xoş davrananda Yaradanımız Yehovaya yaxınlaşmaq üçün daha bir addım atmış oluruq.

SƏHVLƏRİMİZƏ RƏĞMƏN «ALLAHA YAXINLAŞMAQ» MÜMKÜNDÜR

16. Bir müddət Yehovaya xidmət edəndən sonra 73-cü məzmurun yazarı hansı hissləri keçirmişdi?

¹⁶ Səhvlərinizə görə Yehovanın məhəbbətinə layiq olmadığınızı düşünmüsünüz? Bu məqalədə qeyd olunduğu kimi 73-cü məzmurun yazarı da eyni hissləri keçirmişdi. O, təəssüflə demişdi: «Mənim ayaqlarım az qala sapmışdı, ayaqlarım az qalmışdı sürüşsün» (Zəb. 73:2). O, boynuna almışdı ki, qəlbi «acı zəhərlə dolmuşdu», Allahın nəzərində «ağılsız», «qanmaz heyvan kimi idi» (Zəb. 73:21, 22). Bəs o, elə düşünürdümü ki, xətalarına görə Yehova onu daha sevməyəcək və bağışlamayacaq?

17. a) Məzmurçu hətta həyatının ən zülmət çağında nə etmişdi? b) Onun nümunəsindən nə öyrənə bilərik? (Həmçinin şəkillərə baxın.)

¹⁷ Məzmurçu Yehovanın onu tərk etdiyini düşünsə də, görünür, bu hisslər çox qısa çəkmişdi. Həyatının ən zülmət çağında məzmurçu Allaha yaxınlaşmağın vacibliyini anlamışdı. Bunu onun dediyi sözlərdən görmək olar: «Amma indi həmişəlik Səninləyəm [Yehova], mənim sağ əlimdən tutmusan. Öyüd-nəsihətinlə mənə yol göstərirsən, sonra da məni şan-şöhrətə yüksəldəcəksən» (Zəb. 73:23, 24). Biz də özümüzü zəif hiss edəndə və ya səhvlərimizə görə ruhdan düşəndə qayamız Yehovaya sığınmalıyıq (Zəb. 73:26; 94:18). Hətta bir anlıq ayaqlarımız sapsa da, Yehovaya geri qayıda bilərik və əmin ola bilərik ki, O bizi bağışlayacaq (Zəb. 86:5). Xüsusilə də həyatımızın ən zülmət çağlarında Allaha daha da yaxınlaşmalıyıq (Zəb. 103:13, 14).

ƏBƏDİYYƏN ALLAHA YAXINLAŞIN

18. Nəyə görə Yehovaya yaxınlaşmağın sərhədi yoxdur?

¹⁸ Yehovaya yaxınlaşmağın və Onu tanımağın sərhədi yoxdur. Müqəddəs Kitabda deyilir ki, Yehovanın yolları, hikməti və biliyi «tədqiqolunmazdır» (Rom. 11:33). Biz Onun haqqında yeni şeylər öyrənməyə əbədiyyən davam edəcəyik.

19. «Zəbur» kitabında bizə əminlik verən hansı sözlər var?

¹⁹ Zəbur 79:13 ayəsində yazılıb: «Biz, Sənin xalqın, örüşünün sürüsü, əbədi Sənə şükür edərik, mədhini nəsildən-nəslə ucaldarıq». Daima Allaha yaxınlaşın, onda əbədiyyən nemətlər alacağınıza sizdə də əminlik olacaq və qətiyyətlə deyəcəksiniz: «Qəlbimin qayası Allahdır, nəsibim əbədiyyən Odur» (Zəb. 73:26).