Qiymətlərim pisdirsə, nə edim?

«Bəzi sinif yoldaşlarım dərsdə dəftər-kitabsız oturur, müəllim dərsi izah edəndə qulaqcığı taxıb musiqiyə qulaq asır. Sonra da şikayətlənirlər ki, qiymətləri niyə aşağıdır. Mən isə kitabı əlimdən yerə qoymuram, bütün günü oxuyuram, amma yenə də, testdən pis qiymət alıram. Baş açmıram, niyə belə olur. Bütün həftəni gecə-gündüz oxuyasan, axırda da pis qiymət alasan. Adam yanıb-tökülür» (Yolanda).

Yolandanın hissləri sənə tanışdır? Razılaşarsan ki, pis qiymət alanda, özü də bu, dalbadal olanda adamın əhvalı təmiz korlanır.

Bəzi gənclər məktəbdə aşağı qiymət alanda həvəsdən düşürlər və qiymətlərini yaxşılaşdırmaq istəmirlər. Hətta bəziləri məktəbə getmir. Düzdür, bu, çıxış yolu kimi görünə bilər, amma problemi həll etməyin başqa yolu da var. Gəl görək hansı beş addımın sayəsində qiymətlərini yaxşılaşdıra bilərsən.

• Nə edə bilərsən?

• Həmyaşıdların nə deyir?

Nə edə bilərsən?

• Bütün dərslərə gir. Yəqin deyəcəksən ki, “bunu hamı bilir”. Amma çox dərs buraxsan, bu, mütləq qiymətlərinə təsir edəcək.

  «Məktəbimizdə qiymətləri vecinə olmayan uşaqlar, adətən, dərsi buraxan uşaqlardır. Bu isə onların öz zərərinədir» (Metyu).

  Müqəddəs Kitab məsləhəti: «İnsan nə əkərsə, onu da biçəcək» (Qalatiyalılara 6:7).

• Dərsi qavramağa çalış. Dərsə girmək ilk addımdır. Lakin səndən başqa şey də tələb olunur, çalış dərsdə bacardığın qədər çox şey öyrənəsən. Dolğun qeydlər apar. Müəllimin dediklərinin məğzini anlamağa çalış. İcazə verilirsə, dərs vaxtı suallar ver.

  «Dərs vaxtı çoxlu suallar verirəm. Çünki müəllim görəndə ki, kimsə dərsi yaxşı başa düşmür, daha yaxşı izah eləyir» (Oliviya).

  Müqəddəs Kitab məsləhəti: «Necə qulaq asdığınıza fikir verin» (Luka 8:18).

• Aldatma. Bu, nadürüstlükdür. Şagirdlər müəllimləri çox şeydə aldadır. Başqasından köçürmək də bura daxildir. Köçürməyin bir pis tərəfi də odur ki, bununla sən heç bir şey öyrənmirsən.

  «Nəyisə başa düşməmisənsə, cavabı başqalarından köçürmə. Aldatmaq sənə heç nə verməyəcək. Problemləri özün həll etməyi öyrənməkdənsə, həmişə kiminsə sənə kömək etməsini gözləyəcəksən» (Conatan).

  Müqəddəs Kitab məsləhəti: «Hər sahədə dürüst olmaq istəyirik» (İbranilərə 13:18).

• Əvvəlcə ev tapşırıqlarını et. Mümkündürsə, əvvəlcə ev tapşırıqlarını et, digər işlərini və əyləncəni isə sonraya saxlaa. Ev tapşırığını yerinə yetirəndən sonra istirahət sənə ləzzət edəcək.

  «Əvvəlcə ev tapşırıqlarını edirdim, bunun sayəsində qiymətlərim yaxşılaşmışdı. Evə gələndə elə ürəyimdən keçirdi ki, bir az yuxumu alım, ya da musiqiyə qulaq asım. Amma çalışırdım əvvəlcə ev tapşırıqlarını edim, sonra dincəlim» (Kelvin).

  Müqəddəs Kitab məsləhəti: «Daha vacib şeyləri ayırd etməyi bacar» (Filippililərə 1:10).

• Kömək istə. Başqalarından kömək istəməyə çəkinmə. Valideynlərindən məsləhət al. Qiymətlərini yaxşılaşdırmaq üçün müəllimindən kömək istə. Bəzən əlavə müəllim yanına getməyin köməyi dəyə bilər.

  

  «Birbaşa müəlliminə müraciət et. Mövzunu başa düşmək və qiymətlərini yaxşılaşdırmaq üçün kömək istə. Sənin yaxşı oxumaq istəyin çox yəqin ki, müəllimin xoşuna gələcək və sənə kömək edəcək» (Deyvid).

  Müqəddəs Kitab məsləhəti: «Məsləhət verən çox olarsa, uğur olar» (Məsəllər 15:22).