Dünyanı dəhşətə salan cinayətlər. Müqəddəs Kitabda bu barədə nə deyilir?

2022-ci ilin iyul ayında dünyanı dəhşətə salan çoxlu silahlı cinayətlər baş verib:

• «Cinayətkarlığın aşağı səviyyədə, silah üzərində nəzarətin isə ciddi olduğu Yaponiya kimi bir ölkədə məşhur siyasətçinin [sabiq Baş nazir Şinzo Abenin] qətlə yetirilməsi ölkəni sarsıtdı və bütün dünyanı şoka saldı» («The Japan Times», 10 iyul 2022-ci il).

• «Kopenhagendə ticarət mərkəzində silahlı şəxsin 3 nəfəri öldürməsi Danimarkanı şoka saldı» («Reuters», 4 iyul 2022-ci il).

• «Cənubi Afrikanın Soveto qəsəbəsində silahlı şəxslər bara hücum edərək 15 nəfəri qətlə yetirib» («The Guardian», 10 iyul 2022-ci il).

• «4 iyul [Müstəqillik Günü] ilə əlaqədar tətil günlərində ABŞ-da 220-dən çox atışma və ölüm hadisəsi qeydə alınıb» («CBS News», 5 iyul 2022-ci il).

Sizcə cinayətkarlığın nə vaxtsa bitəcəyinə ümid edə bilərik? Müqəddəs Kitabda bu barədə nə deyilir?

Cinayətkarlığa son qoyulacaq

Müqəddəs Kitabda yaşadığımız dövr «axırzaman» adlanır və deyilir ki, bu dövrdə insanlar zalım, qəddar və amansız olacaqlar (2 Timutiyə 3:1, 3). Bu cür insanların sayı artdığı üçün hamı qorxu içində yaşayır (Luka 21:11). Amma bu belə davam etməyəcək. Müqəddəs Kitabda vəd olunur ki, bir gün cinayətkarlığa son qoyulacaq və insanlar «dinclik hökm sürən yurdlarda, təhlükəsiz yerlərdə, sakit məkanlarda yaşayacaq» (Əşiya 32:18). Cinayətkarlığa necə son qoyulacaq?

Allah bütün zalım insanları və silahları məhv edəcək

• «Pislərin... kökü yer üzündən kəsiləcək» (Məsəllər 2:22).

• «[Allah] Yerin bir ucundan o biri ucunadək döyüşləri kəsir, kamanı qırır, nizəni sındırır, cəng arabalarını oda atır» (Zəbur 46:9).

Allah insanlara sülhdə yaşamağı öyrədərək cinayətkarlığa gətirib çıxaran bütün səbəbləri aradan qaldıracaq

• «Müqəddəs dağımın heç bir yerində onlardan xətər gəlməyəcək, heç nəyi tələf etməyəcəklər. Çünki sular dənizi doldurduğu kimi, dünya başdan-başa Yehova barədə biliklə dolacaq» (Əşiya 11:9).

• Artıq indidən Allah bütün insanları cinayətkarlıqdan çəkindirir və onlara məcazi mənada «qılınclarından gavahın, nizələrindən oraq» düzəltməyi öyrədir (Mikə 4:3).

Müqəddəs Kitabda qorxusuz həyatla bağlı verilən vəd haqqında daha ətraflı məlumat almaq üçün «Qorxusuz dünya» (rus.) adlı məqaləyə baxın.

Cinayətkarlığın birdəfəlik həlli ilə bağlı daha ətraflı məlumat almaq üçün «Nəhayət dünya sülh içindədir!» (türk.) adlı məqaləyə baxın.