«Müqəddəs Kitabla tanışlıq» bölməsindən istifadə edərək söhbətə başla
1. Xidmət üçün hansı yeni vəsaitimiz var?
1 Müqəddəs Kitabda «Müqəddəs Kitabla tanışlıq» adlı bölmə var. Təqdimə hazırlayarkən bu yeni vəsaitdən necə istifadə edə bilərik? Burada «Mülahizə» kitabında olduğu kimi, müxtəlif mövzular altında ayələr gətirilir. Buna görə də bu vəsait söhbətə başlamaq üçün faydalıdır.
2. «Müqəddəs Kitabla tanışlıq» bölməsindən xidmətdə necə istifadə edə bilərik?
2 Səkkizinci mövzunu seçib demək olar: «Biz qonşuluqdakı adamlarla ayaqüstü söhbət edirik. Çünki bir çoxlarında sual yaranır ki, görəsən, dünyadakı əzablar Allahdandır, ya yox. [Bəzi yerlərdə mövzunun adını sakinə göstərmək daha yaxşıdır.] Siz bu haqda nə fikirləşirsiniz? [Cavabını gözlə.] Müqəddəs Kitab bu suala məntiqli cavab verir. Sitat gətirilmiş bir və ya bir neçə ayəni birbaşa Müqəddəs Kitabdan oxu və müzakirə et. Əgər ev sakini maraq göstərirsə, girişdəki 20 mövzunu ona göstər və növbəti dəfə müzakirə etmək üçün birini seçməyi xahiş et. Yaxud da araşdırdığınız mövzuya aid daha çox məlumat verilən dərs vəsaitlərindən birini ona təklif et.
3. Qeyri-xristian dininə mənsub olan insanların yaşadığı ərazidə söhbətə başlamaq üçün «Müqəddəs Kitabla tanışlıq» bölməsindən necə istifadə etmək olar?
3 4-cü və 13-dən 17-dək mövzular qeyri-xristian dinlərə mənsub olan insanların yaşadığı ərazidə təbliğ etmək üçün xüsusilə faydalıdır. Misal üçün, 17-ci mövzudakı məlumatdan istifadə edib deyə bilərsən: «Biz insanlarla ailədəki problemlər barədə qısaca söhbət edirik. Yəqin razılaşarsınız ki, bu gün ailələr çoxlu çətinliklərlə üzləşirlər. [Cavabını gözlə.] Bir çox ər-arvadlara bu hikmətli sözlər kömək etmişdir: “Arvad da ərinə dərin hörmət bəsləsin”. [Bu sözlərin Efeslilərə 5:33 ayəsindən olduğunu deməyə ehtiyac yoxdur. Əgər qadınla söhbət edirsinizsə, onda Efeslilərə 5:28 ayəsini sitat gətirmək olar.] Sizcə, bu məsləhətə əməl edilsə, ailə xoşbəxt olmaz?»
4. Qeyri-xristian dininə mənsub olan insanla söhbətin sonunda nə etmək olar?
4 Söhbətin sonunda müzakirəni gələn dəfə davam etdirmək üçün vaxt təyin et. Mövzudakı ayələrdən başqa biri haqda danışmağı planlaşdıra bilərsən. Münasib vaxtda sakinə bildir ki, bölüşdüyün hikmətli kəlamlar Müqəddəs Kitabdandır. Əvvəlki müzakirələrinizi və insanın Müqəddəs Kitaba baxışını nəzərə alaraq, ona münasib nəşr təklif et. («Müqəddəs ibadətimiz»in 2013-cü il dekabr sayındakı əlavə vərəqəyə bax.)