Иосия Алла Ҡанунын яратҡан

Ио́сия һигеҙ йәшендә Йәһүҙә́ батшаһы булып киткән. Ул ваҡытта кешеләр сихыр менән булышҡан һәм боттарға табынған. 16 йәшендә Ио́сия Йәһүәгә дөрөҫ ғибәҙәт ҡылыу хаҡында уйлана башлаған. 20 йәшендә ул бөтә ил буйынса боттарҙы һәм ҡорбан килтереү урындарын емерергә ҡушҡан. Ә 26 йәшендә Ио́сия Йәһүә ғибәҙәтханаһын төҙәтергә булған.

Баш рухани Хилҡыя́ ғибәҙәтханала Алла Ҡануны яҙылған төргәкте таба. Уны, бәлки, Муса́ үҙе яҙған булғандыр. Батша сәркәтибе Шафа́н төргәкте Ио́сия батшаға алып килә лә ҡысҡырып уҡый башлай. Шунда Ио́сия халыҡтың инде күп йылдар буйы Йәһүәгә буйһонмағанын аңлай. Ул Хилҡыяға́: «Йәһүә беҙгә ныҡ асыулана. Бар, унан һора, беҙгә нимә эшләргә икән», — ти. Йәһүә Өлдә́ исемле пәйғәмбәр ҡатын аша былай тип яуап бирә: «Йәһүҙә́ халҡы мине ҡалдырҙы. Мин уларҙы язаға тартам. Әммә быны Ио́сия көндәрендә эшләмәйем, сөнки ул Ҡанун буйынса үҙгәрештәр яһарға әҙер».

Быны ишетеү менән, Ио́сия батша ғибәҙәтханаға килә. Ул Йәһүҙә́ халҡын йыйырға ҡуша һәм бөтә кеше алдында Йәһүә Ҡанунын ҡысҡырып уҡый. Ио́сия һәм Йәһүҙә́ халҡы бөтә йөрәктән Йәһүәгә буйһонорға вәғәҙә итә.

Йәһүҙә́ халҡы Ҡотҡарылыу байрамын инде күптән үткәрмәгән булған. Әммә Ҡанундан был байрамдың йыл һайын үткәрелергә тейешлеге хаҡында уҡығас, Ио́сия йәһүдтәргә: «Беҙ Йәһүә ҡушҡанса Ҡотҡарылыу байрамы үткәрербеҙ», — ти. Шунан ул, ғибәҙәтханала йырлаһындар өсөн, хорға йырсылар йыя һәм күп итеп ҡорбан әҙерләй. Халыҡ Ҡотҡарылыу байрамын, ә унан һуң тағы ете көн буйы Сөсө күмәс байрамын үткәрә. Ҡотҡарылыу байрамы Самуи́л көндәренән бирле былай үткәрелмәгән ине. Эйе, Ио́сия ысынлап та Алла Ҡанунын яратҡан. Ә һин Йәһүә тураһында белем алырға яратаһыңмы?