«Үлемгә илтеүсе ете гонаһ» бармы ул?
Изге Яҙманан яуап
Изге Яҙмала «үлемгә илтеүсе ете гонаһ» тигән төшөнсә юҡ. Әммә, гонаһҡа батыу арҡаһында кеше ҡотҡарылыу өмөтөнән мәхрүм булырға мөмкин, тиелә. Мәҫәлән, Изге Яҙма енси әхлаҡһыҙлыҡ, боттарға табыныу, ярһыу һәм эскелек кеүек етди гонаһтарҙы «гонаһлы тәбиғәттең [«тәндең», ЯДТ] ҡылған эштәре» тип атай. Һәм: «Бындай юлға баҫыусылар Алла Батшалығын мираҫ итеп алмаясаҡ», — тип өҫтәй (Ғалаттарға 5:19—21)a.
Изге Яҙмала «Алла нәфрәт иткән» ете нәмә хаҡында әйтелмәйме ни?
Эйе, әйтелә. Ғибрәтле һүҙҙәр 6:16-ла: «Раббы алты нәмәгә нәфрәтләнә, Ул ете нәмәнән ерәнә», — тиелә. Әммә Ғибрәтле һүҙҙәр 6:17—19-ҙа гонаһтарҙың тулы исемлеге килтерелмәгән. Был аяттарҙа фәҡәт гонаһтың төп төрҙәренең уй-фекерҙәрҙә, һүҙҙәрҙә һәм эштәрҙә сағылышы ғына һанап кителгәнb.
«Үлемгә килтереүсе гонаһ» тигән һүҙҙәр нимәне аңлата?
Ҡайһы бер тәржемәләрҙә 1 Яхъя 5:16-ла «үлемгә килтереүсе гонаһ бар» тигән һүҙбәйләнеш ҡулланыла. «Үлемгә килтереүсе гонаһ» менән «үлемгә килтермәгән гонаһ» араһында ниндәй айырма бар?
Изге Яҙманан күренеүенсә, һәр гонаһ үлемгә килтерә. Әммә беҙ Ғайса Мәсихтең йолом ҡорбаны нигеҙендә гонаһтан азат була алабыҙ (Римдарға 5:12; 6:23). Тимәк, «үлемгә килтереүсе гонаһ» — ул Ғайсаның ҡорбаны ҡапламай торған гонаһ. Ундай кеше гонаһлы эштәргә шул тиклем әүәҫләнгән һәм бер ваҡытта ла үҙенең тормош рәүешен үҙгәртмәйәсәк. Изге Яҙмала, ундай гонаһ «кисерелмәҫ», тиелгән (Матфай 12:31; Лука 12:10).
a Ғалаттарға 5:19—21-ҙә килтерелгән 15 етди гонаһ исемлеген тулы тип әйтеп булмай, сөнки Изге Яҙмала уларҙы һанап сыҡҡандан һуң, «һәм башҡа шундай яманлыҡтар», тип өҫтәп ҡуйылған. Тимәк, быны уҡыған кешегә «башҡа шундай яманлыҡтар» үҙ эсенә тағы нимәне ала икәне хаҡында уйланырға тәҡдим ителгән.
b Ғибрәтле һүҙҙәр 6:16-ла икенсе һандың беренсеһенә ҡарағанда күпкә мөһимерәк икәнен күрһәтеүсе боронғо еврей телендәге һүҙ уйнатыу алымы ҡулланылған. Бындай алымды Изге Яҙмала йыш ҡына осратырға була (Әйүп 5:19; Ғибрәтле һүҙҙәр 30:15, 18, 21).