Bera Ba Sãa Gusunɔn Bɔrɔba?

Yesu Kirisi sãawa Yehofan Bii tɔn durɔ ma u maa sãa win bɔrɔ wi U kĩ too too. U sere wãaru di temɔ nde tɔnu, u raa wãa wɔllɔ nde hunde damgii. (Yohanu 17:5) Ma u na temɔ u tɔmbu gee sɔ̃ɔsi Gusunɔ sɔɔ. (Yohanu 18:37) U maa win tɔnun wãaru kã u ka tɔn be ba mɛm nɔɔmɔ faaba ko durum ka gɔɔn di. (Romu 6:23) Yesu sãa tɛ̃ Gusunɔn Bandun Sunɔ, wɔllun ban dii teera te ta koo tem mɛ gɔsia Alusanna.—Kãsiru 19:16.

Maleeka ba maa sãawa ben tii Gusunɔn bɔrɔba. Maleeka ba ǹ wãaru dire temɔ nde tɔmbu. Ba be taka kua wɔllɔ Gusunɔ u sere tem kua. (Yoobu 38:4-7) Maleekaba yako dabinu ba wãa. (Daniɛli 7:10) Gusunɔn bɔrɔ wɔrukobe ba kĩ tɔmbu ba gee gia Yehofa sɔɔ.—Kãsiru 14:6,  7.

Gusunɔ u maa bɔrɔba mɔ temɔ; u ra be soku win seeda diobu. Siri yerɔ seeda dio u ra gere ye u yɛ̃ goo sɔɔ ǹ kun mɛ gãanu sɔɔ. Yehofan Seeda diobu ba ra tɔmbu gari sɔ̃ ye ba yɛ̃ Yehofa sɔɔ ka win himba sɔɔ. (Esai 43:10) Nde Maleekaba, Seeda dioba kĩ bu nun somi a ka gee gia Yehofa sɔɔ. Ba kĩ wunɛn tii a n sãa Gusunɔn bɔrɔ.