Amɔsunwa Kaa Ka Sãa Geegiru Wa

À n kĩ a n sãa Gusunɔn bɔrɔ, n weenɛ a sãaru ko te ta ra Gusunɔ dore. Yesu nɛɛ “sãɔ geobu” ba ko n Gusunɔ sãamɔ ka “gem.” (Yohanu 4:23, 24) Swaa tia dege degewa ya wãa su ka Gusunɔ sã dee dee. (Efesu 4:4-6) Sãa geegiru ta ra n wãaru te ta ku ra kpe kparamɔ, ma sãa weesugiru ta ra n kam koo yerɔ kparamɔ.—Mateu 7:13, 14.

Kaa kpĩ a sãa geegiru tubu à n tɔn be ba sãa te mɔ mɛɛra. Yehofa sãawa geo, yen sɔ̃na tirasiwa be ba sãa win sãɔ geobu, ba sãawa tɔn geobu. Nge mɛ demunu dãa geeru ta ra demunu geenu ma, nge mɛya sãa geegiru ta ra tɔn geobu ma.—Mateu 7:15-20.

Yehofan bɔrɔ ba ra Bibeli bɛɛrɛ doke too too. Ba yɛ̃ ma Bibeli ya weewa saa Gusunɔn min di. Ba ra ben tii deri ye ya wãa ye sɔɔ ya be kpara ben wãaru sɔɔ, ya ka be yakia saa ben wahalaban di, kpa ya ka be somi bu ka gia Gusunɔ sɔɔ. (2 Timɔte 3:16) Ba ra kookari ko bu ka ko ye ba waasu kua.

Yehofan bɔrɔ ba ra kĩanɛ. Yesu u sɔ̃ɔsi mɛ u tɔmbun kĩru mɔ sanam mɛ u be keu sɔ̃ɔsimɔ Gusunɔ sɔɔ, ma sanam mɛ u barɔbu bɛkia. Be ba sãa geegiru swĩi ba ra ben tii gabun kĩru sɔ̃ɔsi. Nde Yesu, ba ku ra masaasiba ǹ kun mɛ bwese tukurugibu kam mɛɛri. Yesu nɛɛ ma tɔmbu ba koo win bwãabu tubu domi ba ra kĩru sɔ̃ɔsinɛ.—Yohanu 13:35.

Gusunɔn bɔrɔ ba Gusunɔn yĩsiru, Yehofa, bɛɛrɛ wɛ̃ɛmɔ. Goo ù n yinamɔ u wunɛn yĩsiru dendi, yɛ̃ro kon sãa wunɛn bɔrɔ kĩnasi ro? Aawo! Sanam mɛ sa n bɔrɔ mɔ, sa ra win yĩsiru dendi kpa su gabu bɔrɔ win gea sɔ̃. Yen sɔ̃na be ba kĩ ba n sãa Gusunɔn bɔrɔba, n weenɛwa bu win yĩsiru dendi kpa bu gabu sɔ̃ wi sɔɔ. Yehofa u kĩ su ko nde mɛsu.—Mateu 6:9 (saa Léonard GORAGUI tubusiarun di); Romu 10:13, 14.

Nde Yesu, Gusunɔn bɔrɔ ba tɔmbu keu sɔ̃ɔsimɔ Gusunɔn Bandu sɔɔ. Gusunɔn Bandu ta sãawa wɔllun ban diru te ta koo tem gɔsia alusanna. Gusunɔn bɔrɔ ba ra Gusunɔn Bandun labaari gea gabu nɔɔsie.—Mateu 24:14.

Yehofan Seeda diobu ba ra n kookari mɔ̀ ba n ka sãa Gusunɔn bɔrɔba. Ba ra Bibeli bɛɛrɛ doke ma ba ra ben tii tiinɛ kĩru mɔɔsinɛ. Ba ra maa Gusunɔn yĩsiru dendi kpa ba te bɛɛrɛ wɛ̃ kpa ba gabu keu sɔ̃ɔsi Gusunɔn Bandu sɔɔ. Yehofan Seeda dio ba ra sãa geegiru mɔ̀ temɔ gisɔ.