Mba N Ra Tɔnu Deemɛ U N Gu?

Gɔɔ ya ǹ sãa wãaru pai. Gɔɔ sãawa nde dom mɔndu. (Yohanu 11:11-14) Gɔriba kun kpɛ̃ bu gãanu nɔɔ, ǹ kun mɛ bu wa, ǹ kun mɛ bu gere, ǹ kun mɛ bu bwisiku. (Waasu kowo 9:5, 10) Sãa weesugira ta ra n sɔ̃ɔsimɔ ma gɔriba ra de hunden dunia sɔɔ ba n ka wãa ka ben sikadobu. Ya ǹ sãa ye Bibeli ya gerua.

Be ba gu ba n kpɛ̃ ba sun somi, kpa ba ǹ kpɛ̃ ba sun kɔ̃sa kua. Tɔn dabina ba ra gɔɔ yãki yãki ka yãkunu ko yen sɔ̃ ba tamaa sãa ya koo be ba gun gɔ̃ɔru dorasia. Ye ya ǹ Gusunɔ doremɔ domi ya weewa saa Setam weesun di. Ya ǹ maa kpɛ̃ ya n gɔribu dore, domi wãaru sari be sɔɔ. Ya ǹ weenɛ sa n gɔribun bɛrum mɔ ǹ kun mɛ su be sã. N weenɛ su Gusunɔ tɔna sã.—Mateu 4:10.

Gɔribu ba koo kpam wãaru di. Yehofa u koo gɔribu yamia saa gɔɔn di wãaru sɔɔ alusannan temɔ. Tɔ̃ru te U koo ye ko ta koo na sian saa sɔɔ. (Yohanu 5:28, 29; Gɔrobun kookoosu 24:15) Gusunɔ koo kpĩ u be ba gu yamia fɛɛ nde mɛ kaa kpĩ a wi u do yamia.—Maaku 5:22, 23, 41, 42.

Ba nɛɛ tɔnu ku ra gbi, weesa Setam Diabelu ra n kparamɔ. Setam ka win wɛrɛkunu ba tɔmbu wiru dokeamɛ ma gɔribun hunde ba wasi kpa ba ra maa tɔmbu barasie ma ba ra be wahala doke. Setam ra tɔmbu nɔni wɔ̃kumɔ, gasɔ ka dosinu ka maa kãsinu. Yehofa u ra be ba kĩ bu ka gɔribu gari ko taarɛ wɛ̃.—Sɔ̃ɔsiru 18:10-12.