A N Kĩ A Bɔrɔ Nɛni, N Weenɛ Wunɛn Tii A N Sãa Bɔrɔ

Bɔrɔnun nuuru ta sãawa kĩru. À n gia a sosi Yehofa sɔɔ, wunɛn kĩru win sɔ̃ ta koo kpɛ̃a n sosi. Wunɛn Gusunɔn kĩru tà n kpɛ̃a, kaa n kĩ a nùn sã a sosi. Ya koo nun bɔria a ka gɔsia Yesun bɔ̃ɔ. (Mateu 28:19) À n ka Yehofan Seeda dio doo nɔɔrugibu da, kaa kpĩ a ka Gusunɔ bɔrɔnu di baadomma. Mba n weenɛ a ko?

N weenɛ a Gusunɔn woodaba mɛm nɔɔwa a ka wunɛn kĩru sɔ̃ɔsi te a mɔ win sɔ̃. “Sà n Gusunɔ kĩ sa ko maa win wooda nɛnɛ. Win wooda kun maa sɛ̃.”—1 Yohanu 5:3.

Ye a mɛɛra a ye ko. Yesu u gari gerua ye ya sun ye sɔ̃ɔsi. Durɔ bwisigii goo u win diru bana kpee saaran wɔllɔ. Durɔ gari bɔkɔ u win diru bana yani sɛɛrin wɔllɔ. Sanam mɛ guru woo bɔkɔ ga tunuma, diru te ba bana kpee saaran wɔllɔ ta ǹ wɔrumɛ, adama diru te ba bana yani sɛɛrin wɔllɔ ta wɔruma ma ten wɔrumaa kpɛ̃a. Yesu nɛɛ be ba ye u sɔ̃ɔsimɔ nua ma ba ra ye ko ba sãawa nde durɔ bwisigii wi u bana kpee saaran wɔllɔ. Adama be ba ye u sɔ̃ɔsi swaa daki ma ba ǹ ye kue ba kon sãawa nde durɔ gari bɔkɔ wi u bana yani sɛɛrin wɔllɔ. Durɔ ben wara a kĩ a ka weena?—Mateu 7:24-27.

Tii wɛ̃ɛbu. Yen tubusiawa a ka Gusunɔ turuku kua kanaru sɔɔ kpa a nùn nɔɔsia ma a kĩ a win gɔ̃run kĩru ko sere ka baadommaɔ. À n Gusunɔn gɔ̃run kĩru mɔ̀ a sɔ̃ɔsimɔwa ma a sãa Yesu Kirisin bɔ̃ɔ.—Mateu 11:29.

Batɛmu. ‘Bu nun batɛmu kua, kpa a wobe a dɛɛra wunɛn toranun di a n Yinnin yĩsiru sokumɔ.’—kookoosu 22:16.

A n giro sãa wunɛn Gusunɔn sãaru sɔɔ. “Ye i mɔ̀ kpuro i ye koowo ka kĩru, kpa n sãa nge Yinniwa i kuammɛ, n ǹ mɔ tɔmbu.”—Kolose 3:23.