Somi terà bɛsɛn tem kãa bɔnun kparobu ba ra sun kɛ̃?

Gusunɔn Garin bɔnu ye ba yorua ka Gɛrɛkim, ba Baanabasi ka Gɔro Pɔlun gari kua nɔn dabinu. Kparo be, ba ra raa wusu ka wusu de, bu ka tɔmbu bera yigbɛnu sɔɔ. Mba guro guro be, ba naa swĩi? Ba ben kĩnasibun naanɛ dokebun wuswaa daabu kĩ too. Pɔlu u win kpaasi sɔ̃ɔwa u nɛɛ u kĩ “bu kpam wura bu naanɛ dokeobu bera . . . kpa bu wa nge mɛ ba ka wãa.” U raa kpeere u sĩ nge kilo wunɔbun saka u ka bu dam kɛ̃. (Gɔrobun kookoosu 15:36) Bwisiku nin bwesera bɛsɛn kparo be ba ra yigɛnu bere ba mɔ gisɔn tii.

Ba ra nɛ bu sun dam kɛ̃. Tem kãa bɔnun kparo baawure ra yigbɛnu nge 20 n saka sikerenɛ. U ra arusuma tia ko ka yigbɛru baatere, nɔn yiru wɔ̃ɔ baagere. Sa ko kpĩ su arufaani baka wa saa kĩnasi be ka ben kurɔbun yɛ̃run di, bà n kurɔbu mɔ. Ba ra kã bu yigbɛrun tɔmbu kpuro gia, bibu, aluwaasi ka wɔndiaba ka maa be ba bukure. Ka nuku doba ba ra maa kã bu sun yɔ̃siri waasu sɔɔ ka Bibelin keu ni sa mɔ̀ sɔɔ. Kparo be ka yigbɛ guro gurobu ba ra gabu bere bu ka be dam kɛ̃. Ba ra maa bɛsɛn naanɛ dokebu dam sosi saa ben samaan garin di mɛnnɔ ka mɛnnɔ bakasu sɔɔ.—Gɔrobun kookoosu 15:35.

Ba ra sɔ̃ɔsi ma ba tɔmbu kpuron arufaani kasu. Yigbɛrun wuswaa daabu ra n tem kãa bɔnun kparo nɛni too. Ba ra waanɛ ka yigbɛ guro guro ka sɔm kowo dɛrobu bu ka wa mɛ yigbɛ ta ka sĩi sinamɔ kpa u maa ka be bwisi kɛ̃ sɔmbu te ba mɔ̀ yigbɛru sɔɔn sɔ̃. Ba ra maa swaa gbiiyobu somi ben sɔmburu tu ka wɛ̃ɛ nɔɔ gea wa, ba ra maa kã bu tɔn kpaobu be ba ka sun mɛnnamɔn wuswaa daabun labaari nɔɔ. Kĩnasi ben baawure u ra tii wɛ̃ɛwa ka nuku dobu nge “beruse wi u ka . . . [sun] sɔmburu mɔ̀.” (2 Korinti 8:23) N weenɛ su ben naanɛ dokebu ka ben tii wɛ̃ɛbu Gusunɔ sɔɔ saari.—Heberu 13:7.

• Mban sɔ̃na tem kãa bɔnun kparobu ba ra yigbɛnu bere?

• Mba n weenɛ a ko a ka ben berabun arufaani di?