Amɔsunwa sa ra ka bɛsɛn kĩnasi be gbee swãanu nu deema somi?

Sanam mɛ kari baka gaa kua, Yehofan Seeda Dio ba ra mɛnnɛwa mii mii bu ka wa swɛɛ yi ba ko ka ben kĩnasibu somiru daawa. Kookari bɛkɛ yi sa ra ko yi sɔ̃ɔsimɔ ma sa kĩi geeru mɔɔsinɛ. (Yohanu 13:34, 35; 1 Yohanu 3:17, 18) Amɔsunwa sa ra ka somi te wɛ̃ɛsinɛ?

Sa ra gobi mɔrisie. Sanam mɛ gɔ̃ɔ bakara na Yudean temɔ, Kirisigii gbiikobu Antiɔsiɔ, ba gobi mɔrisiawa bu ka ben kĩnasibu somi. (Gɔrobun kookoosu 11:27-30) Nge mɛya, ma sa nua ma bɛsɛn kĩnasibu tem gam ba nɔni sɔ̃ɔre, sa ra kɛ̃ru mɔrisie saa bɛsɛn yigbɛrun di, bu ka yèn bukata ba mɔ dwe.—2 Korinti 8:13-15.

Sa ra maa de su be nɔma kɛ̃. Yigbɛrun guro guro be ba wãa mi kari ye ya kua, ba ra ben yigbɛrun tɔn baawure kasu bu wa bà n wãa alafia sɔɔ. Somi kɛ̃obun wirugibu ba koo kpĩ bu gere mɛ ba koo ka dĩanu, nim nɔruram, yãnu, mi ba koo kpuna ka maa tibu bɔnu koosina. Seeda Dio dabina ba ra wure bu da, ka ben tiin gobi, bu tɔmbu faaba ko, kpa bu be dera bu ka yɛnusu ka Bandu Yenu sɔmɛ. Yèn sɔ̃ sa nɔɔ tia mɔ bɛsɛn yigbɛru sɔɔ, ma sa ra yigbɛrun sɔma ko sannu, ya dera ya ku ra n sun sɛ̃sie su ka somiobu wa tamma tamma, nɔni swaarun saa sɔɔ. Be sa ka naanɛ doke teebu mɔ, sa ra be somi, yen biru sa ra maa gabu nɔma kɛ̃ ayeru tà n wãa, baa bà kun sãa bɛsɛgibu naanɛ dokebu sɔɔ.—Galati 6:10.

Sa ra Bibelin somiru kɛ̃, sa maa bwɛ̃ra yɛmiasiamɔ. Be gbee swãara deema ba gɔ̃ru yɛmiasiabun bukata mɔ too. Saa yen bweseru sɔɔ, sa ra dam wa Yehofan mi, wi u sãa “Yinni Yesu Kirisin Baaba wi u ra tɔmbu wɔnwɔndu kue.” (2 Korinti 1:3, 4) Ka nuku doba sa ra Bibelin nɔɔ mwɛɛnu bɔnu ko ka be ba yĩiyɔbu kpuro bia. Nɔɔ mwɛɛ ni, nu sun yĩiyɔbu kɛ̃mɔ ma saa fiiko sɔɔ, Gusunɔn Banda koo gãa ni nu sun nɔni sɔ̃ɔmɔ kpuro kpeerasia.—Kãsiru 21:4.

• Mba n da de Yehofan Seeda Diobu bu kpĩ bu ka ben kĩnasibu somiru daawa tamma, nɔni swãarun saa sɔɔ?

• Gɔ̃ru yɛmiasia biràn bwesera sa ko kpĩ su ka be ba yakiabu wa saa kari baka sɔɔn di bɔnu ko?