Mba ba ra ko bɛsɛn gbankɔkɔban kãasi sɔɔ?

Betɛlin yɛnugibun sɔma waa dabi, ma ba ni kpuro mɔ̀ waasu kobun sɔ̃ tem tém sɔɔ ǹ kun mɛ tem dabinu sɔɔ. Ba koo kpĩ bu sɔmburu ko barum tusiobun wuunu sɔɔ, mi ba ra tirenu yare masini sɔɔn di, tire yinubun swaa sɔɔ, ǹ kun mɛ tire beru yerɔ, gabu maa dɔsa ka fideo kobun beragia, ǹ kun maa mɛ bu sɔmburu ko swɛɛ gɛɛ sɔɔ.

Gbankɔkɔn Bwĩira ta ra n sɔma kpare. Sina Asakpɔra gbankɔkɔ baageren sɔma yen Bwĩiru nɔmu sɔndia. Gbankɔkɔn Bwĩi baatere sɔɔ, ba guro guro yeburobu ita ǹ kun mɛ ba n kere mɛ swĩi. Bwĩi baatere ta ra Sina Asakpɔru nɔɔsie mɛ sɔma ka sĩi sĩnamɔ tem mi ba kpare sɔɔ, ka wahala yi ba wa yi koo ra tera. Ben baawuren gere ya koo Sina Asakpɔru somi, tu ka tubu sɔ̃ɔsi nira, ba koo ra yara tirenu sɔɔ, ǹ kun mɛ yigbɛrun mɛnnɔ ka mɛnnɔ bakasu sɔɔ. Gasɔ ka gasɔ, Sina Asakpɔru ta ra tɔmbu gɔri bu ka gbankɔkɔn kãasi yi bera, bu ka ten Bwĩi baatere bwisi kɛ̃ mɛ ta koo ka ten sɔmburu koosina sɔɔ. (Mɔnnu 11:14) Saa ye sɔɔ, ba ra kpunaa yi kpa kĩnasi wi Sina Asakpɔra gɔrima, u samaan gari di, yu ka be ba wãa tem mi gbankɔkɔn kãasa ya kpare dam kɛ̃.

Gbankɔkɔn kãasa ya ra yigbɛ ni nu wãa tem mi ya kpare dam kɛ̃. Guro guro be ba wãa kãasa ye sɔɔ, ba ra wure bu yigbɛ kpaanu swĩi. Kĩnasi be, ba ra maa swaa gbiiyobu, ka swaa gbiiyo be ba mɔrisia tem gam, ka tem kãa bɔnun kparobun sɔma nɔni doke. Ba ra mɛnnɔ bɔkɔ baageren tɔ̃ru yi, kpa bu Bandu Yee kpaanun banan gari daari, kpa bu maa wa, bà n kpara ni sa loo mɔ̀ mɔrisia dee dee yigbɛ ni nu ni bikia sɔɔ. Ye ba mɔ̀ gbankɔkɔ baagere sɔɔ kpuro waasu kobun sɔmburu tu ka wuswaa dan sɔ̃na.—1 Korinti 14:33, 40.

• Mba gbankɔkɔban Bwĩi nu mɔ̀, nu ka Sina Asakpɔru nɔma kɛ̃mɔ?

• Sɔm nɛnɛnka nirà ba mɔ̀ gbankɔkɔn kãasaɔ?