SƆ̃ƆSIRU 10
Amɔsunwa Kaa Kpĩ a sãa Geeru Tubu?
1. Sãa gee teeru dege degewa ya wãa ro?
“I laakari koowo ka sɔmɔ weesugibu.”—MATEU 7:15.
Sãa teeru dege degewa Yesu u win bwãabu sɔ̃ɔsi, sãa geeru. Sãa te ta sãawa nge swaa ye ya dɔɔ wãaru te ta ku ra kpe ɔ. Yesu u nεε: ‘Ba ǹ dabi be ba swaa ye waamɔ.’ (Mateu 7:14) Sãa te ta wee win Gari gemgia tɔnan diya Gusunɔ u ra wure. Sãɔ geobu kpuro ba mεnnεwa naanε doke teebu sɔɔ.—A Yohanu 4:23, 24; 14:6; Efesu 4:4, 5 gario.
A fideo ye ba mɔ̀ Sãaru kpurowa Gusunɔ wuramɔ ro? mɛɛrio
2. Mba Yesu u gerua Kirisigii weesugibu sɔɔ?
“Ba gerumɔ ka nɔɔ ba Gusunɔ yɛ̃, adama ben kookoosu ben gari siki.”—TITU 1:16.
Yesu u raa kirɔ kua ma sɔmɔ weesugibu ba koo win sãa te u yi, sanku. À n be wa, ba ra n ka sãɔ geobu weenεwa. Ba ra n tii kparamɔ nge Kirisigibu. Adama, kaa kpĩ a tubu ye ba sãa ka gem. Amɔsun? Sãa geeru tɔnawa ta ra Kirisigii geobu ko ka ben daa ka kookoo geesu.—A Mateu 7:13-23 gario.
3. Amɔsunwa kaa kpĩ a sãɔ geobu tubu?
A yĩrenu nɔɔbu ni ni laakari dokeo:
Sãɔ geobu ba ra Bibeli bεεrε wɛ̃ nge Gusunɔn Gari. Ba ra hania ko bu ka yen woodaba swĩi ben wãaru sɔɔ. Yen sɔ̃, sãa geeru ta wunanɛ ka sãa ni nu wee saa tɔmbun bwisikunun di. (Mateu 15:7-9) Sãɔ geobu ba ku ra gãanu kpare kpa bu garu ko.—A Yohanu 17:17; 2 Timɔte 3:16, 17 gario.
Be ba Yesu swĩi ka gem, ba ra Gusunɔn yĩsiru, Yehofa, bεεrε wɛ̃. Yesu u raa Gusunɔn yĩsiru bεεrε wɛ̃ saa ye u te tubusia. U tɔmbu somi bu ka Gusunɔ gia ma u be sɔ̃ɔsi bu kanaru kowo Gusunɔn yĩsiru tu dεεra. (Mateu 6:9) Mi a wãa, sãa terà ta ra Gusunɔn yĩsiru tubusie?—A Yohanu 17:26; Romu 10:13, 14 gario.
Kirisigii geobu ba ra Gusunɔn Bandu kpare. Gusunɔ u Yesu gɔra u Win Bandun Labaari gea kpara. Gusunɔn Bandu tɔnawa ta sãa handunian yĩiyɔbu. Yesu u raa yen gari gerumɔ sere ka win gɔɔn tɔ̃ru sɔɔ. (Luku 4:43; 8:1; 23:42, 43) U nεε win bwãabu ba koo ye kpara. Goo ù n nun susi u ka nun Gusunɔn Bandun gari ko, wunεn waaru sɔɔ, sãa teràn diya u ko n wee?—A Mateu 24:14 gario.
Yesun bwãabu ba ku ra ka handunia kɔ̃sa yeni mεnnε. Kaa kpĩ a be tubu domi ba ku ra nɔma doke politiki n kun mε wuun sannɔsu sɔɔ. (Yohanu 17:16; Yohanu 18:36) Ba ku ra maa handunian daa ka yen kookoo kɔ̃susu saari.—A Yakɔbu 4:4 gario.
Kirisigii geobu ba kĩanε ka kĩru te ta dam mɔ. Gusunɔn Gari ya be sɔ̃ɔsi ma n weenε bu bwesenu kpuro bεεrε wɛ̃. Baa sãa weesuginu ba n da ka handunian tabu yɔ̃re kiri kiri, sãɔ geobu ba ra yinε bu ye ko. (Misee 4:1-3) Adama, Kirisigii geobu ba ra bεεn wãaru ka bεεn yanu loo ko bu ka turobu somi kpa bu be dam kɛ̃.—A Yohanu 13:34, 35; 1 Yohanu 4:20 gario.
4. Kaa kpĩ a sãa geeru tubu ro?
Sãa teràn sɔ̃ɔsinuwa nu nin nuuru mɔ Gusunɔn Gari sɔɔ, ta Gusunɔn yĩsiru bεεrε wɛ̃εmɔ, ma ta Gusunɔn Bandu kparamɔ nge tɔmbun yĩiyɔ teebu dege dege? Yigbε terà ta ra kĩru sɔ̃ɔsi ma ta ra ten nɔma wĩε tabun di? Mba a bwisika?—A 1 Yohanu 3:10-12 gario.