Amɔsunwa Bibelin gee Kpεεkpεεkugii yi ra ka Sun Arufaani Naawε?

1. Mban sɔ̃na sa kparabun bukata mɔ?

Bεsεn Taka Kowo u sun bwisi kere. Nge Tundo kĩrugii u ra sun nɔɔri. U ǹ daa maa gɔ̃ru doke su tii kpara, ma ǹ kun mɔ ka win dam. (Yeremi 10:23) N mεn na, nge mε bii piibu u mɔwɔbun kparabun bukata mɔ, mεna bεsε kpuro sa Gusunɔn kparabun bukata mɔ. (Esai 48:17, 18) Bibelin gee kpεεkpεεkugii yi ra sun kpare ka Gusunɔn dam.​—A 2 Timɔte 3:16 gario.

Gisɔn tɔ̃ru, Yehofan wooda ka gee kpεεkpεεkugii yi ra sun somi su ka wãarun swaa ye ya buram bo wa. Yi ra maa sun sɔ̃ɔsi mεsum sa ko kpĩ su doma ni nu ku ra kpe wa, sian tɔ̃ru. Yen sɔ̃ Gusunɔ u sun taka kua, ya sãa dee dee su wura u sun kpara kpa su maa wi siara.​—A Womu 19:8, 12; Kãsiru 4:11 gario.

2. Mba n Bibelin gee kpεεkpεεkugii?

Bibelin gee kpεεkpεεkugii yi sãawa gee giri yi yi wãa sere ka baadommaɔ. Adama, woodaba yi koo kpĩ yi n sãa saa garu, bweseru garu, n kun mε wunanɔ gagun gia. (Sɔ̃ɔsiru 22:8) N weenε su bεsεn laakari loo ko su ka tubu amɔsunwa sa ko ka gem kpεεkpεεkugim gam sɔmburu ko saa gaa sɔɔ. (Mɔnnu 2:10-12) Nge weenasia, Bibeli ya gem kpεεkpεεkugim sɔ̃ɔsi mε mu tubusia ma wãaru ta sãawa Gusunɔn kɛ̃ru. Gem kpεεkpεεkugim nuurugim mεni koo kpĩ mu sun somi sɔmburu yerɔ, yεnuɔ ka sanam mε sa wuu dɔɔ. Mu ra de su laakari ko.​—A Gɔrobun kookoosu 17:28 gario.

3.Gee kpεεkpεεkugii yiru yirà yi sãa giri?

Yesu u gee kpεεkpεεkugii funεgii yirun gari kua. Gem kpɛɛkpɛɛkugim gbiikim mε mu sɔ̃ɔsi yen sɔ̃ tɔnu u wãa wãaru sɔɔ—u Gusunɔ gia kpa u wi sã ka naanε baka. N weenε gem kpεεkpεεkugim gbiikim mεni mu n sun kpare ye sa gɔ̃ru doke su ko kpuro sɔɔ. (Mɔnnu 3:6) Be ba gem kpεεkpεεkugim mε wura ben gɔ̃ru sɔɔ ba ra ka Gusunɔ bɔrɔnu di, bu doo nɔɔ geeru wa ka wãaru te ta ku ra kpe.​—A Mateu 22:36-38 gario.

Gem kpεεkpεεkugim yiruse mu ra sun kpare bɔri yεndu sɔɔ ka turobu. (1 Korinti 13:4-7) Sà n ka gem kpεεkpεεkugim yiruse mεni sɔmburu mɔ̀, sa ko Gusunɔ saari mε u ra ka tɔmbu suesinε sɔɔ.​—A Mateu 7:12; 22:39, 40 gario.

4. Amɔsunwa Bibelin gee kpεεkpεεkugii yi ra ka sun arufaani naawε?

Bibelin gee kpεεkpεεkugii yi sɔ̃ɔsimɔ ma n weenɛ yεnusu sun nɔɔ nε kĩru sɔɔ. (Kolose 3:12-14) Gusunɔn Gari ya maa yεnusu kɔ̃sumɔ ka gem kpεεkpεεkugim wirugim kpam mε mu sɔ̃ɔsi—ma n weenε suanaa ya n sãa baadommagia.​—A Torubu 2:24 gario.

Sà n Bibelin sɔ̃ɔsinu swĩi, sa ko kpĩ su bεsεn yãnu ka bεsεn gɔ̃run bwɛ̃ε dora kɔ̃su. Nge weenasia, yinni dabinu ba ra kã too bu sɔmburu ko ka sɔm kowobu, be ba sɔmburu mɔ̀ dee dee, ma ba ǹ yikuru mɔ, nde mε Bibelin gee kpεεkpεεkugii yi bikia. (Mɔnnu 10:4, 26; Heberu 13:18) Gusunɔn Gari ya sun sɔ̃ɔsi su turia ka yen sãa bεsεn bukata, kpa bεsεn bɔrɔnu ka Gusunɔ nu n sun nεni n kere gãa ni nɔni waamɔ.​—A Mateu 6:24, 25, 33; 1 Timɔte 6:8-10 gario.

Sà n ka Bibelin gee kpεεkpεεkugii sɔmburu mɔ̀ sa ko kpĩ su bεsεn bwãa dobu kɔ̃su. (Mɔnnu 14:30; 22:24, 25) Sà n Gusunɔn wooda ye wura, ya ko sun kɔ̃su saa bara gɔbunu ka mεεraban di. (Mɔnnu 23:20) Nge weenasia, Yehofa u wura su tam nɔ, adama ya n ka saka nε. (Womu 104:15; 1 Korinti 6:10) Gusunɔn gee kpεεkpεεkugii yi ra ka sun arufaani naawε saa yi sun sɔ̃ɔsi ma n ǹ mɔ su bεsεn kookoosu tɔna nεnε, adama bεsεn bwisikunun tii. (Womu 119:97-100) Ka mε, ǹ mɔ ben arufaani tɔnan sɔ̃na, Kirisigii geobu ba ra ye Gusunɔ u yi bεεrε doke. Ba ye mɔwa bu ka Yehofa yiiko wɛ̃.​—A Mateu 5:14-16 gario.