Mba n Labaari Gea Sãaru Sɔɔ?

1. Sãaru kpurowa ya wã ro?

Ba ra tɔn gɔ̃ru tiagibu wa sãanu kpuro sɔɔ. Labaari geawa ma Gusunɔ u tɔn be waamɔ, ma u ra be nɔɔri. Adama, sa waamɔ ka nuku sankiranu ma gaba sãaru dendimɔ bu ka kɔ̃sa ko. (2 Korinti 4:3, 4; 11:13-15) Sà n nua ye kparanu gerumɔ, sãa ganu nu mam nɔma doke dam di bakabu, bweseru garun tɔmbu kpuron goberu, tabu ka kɔ̃ɔ mεnnabu ka bibu sɔɔ. Akiika, ya ra Gusunɔn sãɔ gɔ̃ru tiagibu n nuki sanku too!​—A Mateu 24:3-5, 11, 12 gario.

Mi sãa geeru ta ra Gusunɔ bεεrε wɛ̃, miya sãa weesugiru ta ra win nuki sanku. Sãa weesugiru ta ra gari yi yi ǹ wãa Bibeli sɔɔ keu ko, nge sɔ̃ɔsi weesuginu Gusunɔ ka gɔribu sɔɔ. Adama, Yehofa u kĩ tɔmbu bu gem gia wi sɔɔ.​—A Esekiɛli 18:4 ; 1 Timɔte 2:3-5 gario.

2. Mba n labaari gea sãaru sɔɔ?

Sãa ni nu kparamɔ ma nu Gusunɔ kĩ, adama nu ka Setam handunia gbinnɛ, nu ǹ Gusunɔ nɔni wɔ̃kua. Ye nuku doba! (Yakɔbu 4:4) Gusunɔn Gari ya ra sãa weesugiru kpuro soku: “Babiloni Baka.” Babiloni raa sãa yellun wuu, mi sãa weesugiru ta torua Nɔwεn tɔ̃run Nim Yibu Bakaru ten biruɔ. Saa fiiko sɔɔ, Gusunɔ u koo sãa te ta tɔmbu nɔni wɔ̃kumɔ, ma ta be dam dɔremɔ kpeesia suaru sɔɔ.​—A Kãsiru 17:1, 2, 5, 16, 17; 18:8 gario.

Labaari gea ya maa tie. Yehofa u ǹ tɔn gɔ̃ru tiagibu be ba yarinε sãa weesuginun suunuɔ, tem gira sɔɔ duari. U tɔn ben bweseru gem sɔ̃ɔsimɔ bu mεnna bu ko turo.​—A Misee 4:2, 5 gario.

3. Mba n weenε tɔn gɔ̃ru tiagibu bu ko?

Yehofa u ra tɔn be ba ra gea ka buram kã, nɔɔri. U be suuru kanamɔ bu sãa weesugiru biru kisio. Tɔn be ba Gusunɔ kĩ ba ra wure bu gɔsia bu ka wi wɛ̃re.​—A Kãsiru 18:4 gario.

Wɔ̃su wunɔbu gbiikinu bεsεn saa sɔɔ, sanam mε tɔn gɔ̃ru tiagibu ba raa labaari gea nua saa Yesun Gɔrobun min di, ba ye wura ka nuku dobu. Ba raa wãarun swaa kpaa ye ya wee Yehofan min di mεεra, swaa yen doo nɔɔra buram kere, ka wãarun saabu ka maa yĩiyɔbu. Ba sun sãawe weenasia geebu, yen sɔ̃ ba sɔ̃ɔsi ma ba labaari gea wura, saa ba Yehofa gbiisia ben wãaru sɔɔ.​—A 1 Tɛsalonika 1:8, 9; 2:13 gario.

Yehofa u tɔn be ba sãa weesugiru biru kisi dam koosia win sãɔbun yigbεru sɔɔ. À n Yehofan soku kĩrugiru wura, kaa ka wi bɔrɔnu di, kaa Yehofan sãɔbun yigbε kpaaru ka ten kĩru wa, kpa a wãaru te ta ku ra kpen tubi di.​—A Maaku 10:29, 30; 2 Korinti 6:17, 18 gario.

4. Amɔsunwa Gusunɔ koo ka nuku dobu na tem baamεre sɔɔ?

Labaari geawa ma sãa weesugirun siribu bu sisi. Ya koo ka handunia gira kpuro baruka nawa saa dam dɔrebun di. Sãa weesuginu nu ǹ maa tɔmbun nɔni wɔ̃kumɔ, nu be karana, pai. Tɔn be ba wãa kpuro, ba koo mεnna bu nɔɔ tia ko Gusunɔ geo turo dege degen sãaru sɔɔ.​—A Kãsiru 18:20, 21; 21:3, 4 gario.