Mban Sɔ̃na Gusunɔ u Yigbεru Mɔ?

1. Mban sɔ̃na Gusunɔ u raa yellun Isireli mεnna nge yigbεru?

Gusunɔ u raa baasira Aburahamun bibun bweseru mεnna nge tem bweseru garu, ma u be wooda dabinu kã. U tem bwese te soka “Isireli” ma u te kua sãa geeru ka Win Garin kɔ̃so. (Womu 147:19, 20) Yen sɔ̃, bwesenu kpuron tɔmbu ba koo kpĩ bu domaru wa saa Isirelin di.​—A Torubu 22:18 gario.

Gusunɔ u raa Isireliba gɔsa ba n sãa win seeda diobu. Ben yellun kookoosun faagi ya sɔ̃ɔsi mεsum tɔmbu ba ra arufaani wa, bà n Gusunɔn woodaba mεm nɔɔwamε. (Sɔ̃ɔsiru 4:6) Mεna, saa Isireliban min di, turobu ba koo raa kpĩ bu Gusunɔ geo gia.​—A Esai 43:10, 12 gario.

2. Mban sɔ̃na Kirisigii geobu ba ra mεnnε yigbεru sɔɔ?

Saa gaa sɔɔ, Isireli ya Gusunɔn durom bia, ma Yehofa u bwese te kɔsa ka Kirisin yigbεru. (Mateu 21:43; 23:37, 38) Gisɔ, Isireliban ayerɔ, Kirisigii geobu ba Yehofa sãamɔ nge Win seeda diobu.​—A Gɔrobun kookoosu 15:14, 17 gario.

Yesu u raa be ba wi swĩi mεnna bu waasu ko, kpa bu bwesenu kpuro sɔɔ, bwãabu ko. (Mateu 10:7, 11; 24:14; 28:19, 20) Gisɔn tɔ̃ru, sɔmbu ten wɛ̃ε nɔsu su kpɛ̃a sere su ka tura yam kpuro sɔɔ, handunia yenin kpeerɔ. Yehofa u tɔn yakom sɔndiru mεnna win sãa geeru sɔɔ, yen bweseru kun da koore. (Kãsiru 7:9, 10) Kirisigii geobu ba ra mεnnε bu dam kɛ̃εna, kpa bu somina. Handunia gira kpuro sɔɔ, ba Bibelin sɔ̃ɔsirun kpunaa tia mɔ ben mεnnɔsu sɔɔ.​—A Heberu 10:24, 25 gario.

3. Gisɔn tɔ̃ru, amɔsunwa Yehofan Seeda Diobu ba torua?

Wɔ̃ɔ nɔrɔbu ka nɛnɛ ka wata ka wɔkuru (1870) ba n saa sɔɔ, Bibelin keu kowobun wuuru piibu ga torua, ga Bibelin gee yi yi raa biaran waabu wɔri. Ba gia ma Yesu u raa Kirisin Yigbεru mεnna bu ka waasu ko, mεna ba bwesenu kpuro sɔɔ Bandun garin waasu torua. Wɔ̃ɔ nɔrɔbu ka nɛnɛ ka wunɔbu ka tɛna ka tia (1931) sɔɔwa, ba yĩsi te ba mɔ̀ Yehofan Seeda Diobu sua.​—A Gɔrobun kookoosu 1:8; 2:1, 4; 5:42 gario.

4. Amɔsunwa Yehofan Seeda Diobu ba mεnnε Yigbεru sɔɔ?

Wɔ̃su wunɔbu gbiikinu bεsεn waati sɔɔ, Kirisin yigbεnu tem dabinu sɔɔ, nu raa arufaani wa saa yigbεrun sina asakpɔru te ta ni kparen di, ma yigbεrun sina asakpɔ te, ta Yesu wura nge Yigbεrun Wirugii. (Gɔrobun Kookoosu 16:4, 5) Mεna maa gisɔ, Yehofan Seeda Diobu handunia gira kpuro sɔɔ, ba arufaani waamɔ saa Yigbεrun Sina Asakpɔrun guro guro bwisigibun di. Ta maa Yehofan Seeda Diobun gbankɔkɔban kãasi kparamɔ, yi yi tusiaru mɔ̀, tirenu yaramɔ ma yi Bibelin sɔ̃ɔsinun yanu bɔnumɔ barum nde nata (600) ka sɔndiru sɔɔ. Mεna Yigbεrun Sina Asakpɔru ta koo kpĩ tu yigbεnu nde nɔrɔbun suba wunɔbu (100 000) ka sɔndiru handunia gira kpuro sɔɔ dam kɛ̃, kpa tu ni kpara ka yori yi yi wee saa Bibelin di. Yigbε baatere sɔɔ, tɔn durɔbu be ba bwisi ka yɛ̃ru tura, ba sɔmburu mɔ̀ nge guro gurobu n kun mε kparobu. Tɔn be, ka kĩra ba Gusunɔn yaa gɔ̃ɔ nɔɔrimɔ.​—A 1 Piɛɛ 5:2, 3 gario.

Yehofan Seeda Diobu ba mεnnε yigbεru sɔɔ bu ka labaari gea kpara, kpa bu bwãabu ko. Nge Gɔrobu, sa waasu mɔ̀ yεnu ka yεnu sɔɔ. (Gɔrobun Kookoosu 20:20) Sa maa Bibelin keu mɔ̀ ka tɔn be ba gɔ̃ru tia mɔ, ba gem kĩ. Adama, Yehofan Seeda Diobu ba ǹ sãa Yigbεru tɔna. Sa sãawa yεnu tian tɔmbu ka bɛsɛn Tundo kĩrugii. Sa sãawa nge mεro turon bibu, sa ra nɔɔrinε. (2 Tɛsalonika 1:3) Nge mε Yehofan tɔmba mεnnε yigbεru sɔɔ bu ka Gusunɔ wɛ̃re, kpa bu ka gabu somi, ba gɔsia yεnu ge ga doo nɔɔru bo tem sɔɔ.​—A Womu 33:12; Gɔrobun kookoosu 20:35 gario.