Mban Sɔ̃na n Weenε a n Bɔ?

1. Arufaani yerà kaa wa ma a bɔ a Bibeli mεεrimɔ?

Sika sari, ye sa wa Bibelin sɔ̃ɔsi kpεεkpεεkuginu sɔɔ, ya wunεn kĩru Yehofa sɔɔ dam kã. N weenε sa n kĩru te kpɛ̃asiamɔ baadomma. (1 Piɛɛ 2:2) Wunεn wãaru te ta ku ra kpen yĩiyɔbu bu koo koora, à n Gusunɔ susimɔ a bɔ saa Bibelin mεεribun di.​—A Yohanu 17:3; Yudu 21 gario.

Saa ye wunεn yɛ̃ru Gusunɔ sɔɔ ta kpɛ̃amɔ, wunεn naanε dokebu bu koo dam ko. Naanε dokebu bu koo nun somi a ka Gusunɔ wɛ̃re. (Heberu 11:1, 6) Bu koo nun bɔria gɔ̃ru gɔsiabu sɔɔ, kpa a n kɔsi arufaaniginu mɔ̀ wunεn wãaru sɔɔ.​—A Gɔrobun kookoosu 3:19 gario.

2. Amɔsunwa wunεn yɛ̃ru Gusunɔ sɔɔ ta koo kpĩ tu ka turobu arufaani naawa?

Kaa n kĩ a ye a mεεra bonu ko ka turobu—bεsε kpuro ka nuku doba sa ra labaari gea kpare. À n Bibelin keu mɔ̀ a bɔ, kaa mεεri mεsum kaa Bibeli loo ko a ka wunεn naanε dokebu Yehofa sɔɔ ka labaari gea tusia.​—A Romu 10:13-15 gario.

Tɔn dabinu ba ra Labaari gea bonu kobu tore ka ben bɔrɔ n kun mε ben dusibu. A de a n laakari mɔ̀. Ye kaa ka be sɔ̃ ma ben sãaru weesugira, n sanɔ a be Gusunɔn nɔɔ mweenu sɔ̃. A maa yaayo ma kiri kiri tɔmbu ba ra laakari doke wunεn daa gea sɔɔ n kere ye a gerumɔ sɔɔ.​—A 2 Timɔte 2:24, 25 gario.

3. Bɔrɔnu nirà kaa kpĩ a ka Gusunɔ di?

Gusunɔn Garin mεεribu bu koo nun somi a ka wunɛn bɔrɔnu ka Gusunɔ dam koosia. Yen biru, kaa kpĩ a du bɔrɔ geenu sɔɔ ka Yehofa. Kaa kpĩ a n sãa wigii ka gem nge win yεnugii turo.​—A 2 Korinti 6:18 gario.

4. Amɔsunwa kaa kpĩ a n bɔ a n wuswaa dɔɔ?

Wunɛn bɔrɔnu ka Gusunɔ nu koo dam ko ma a win Garin keu mɔ̀ a bɔ. (Heberu 5:13, 14) A Yehofan Seeda Dio turo bikio u ka nun Bibelin keu ko ka tire te ba mɔ̀ Qu’enseigne réellement la Bible? Mεn nɔ a mεεrimɔ a sosimɔ Gusunɔn Gari sɔɔ, mεn nɔra wunεn wãarun tiin arufaani ya koo n sosimɔ.​—A Womu 1:1-3; 73:27, 28 gario.

Labaari gea ya weewa saa Yehofa, Gusunɔ doo nɔɔrugiin min di. Kaa maa kpĩ a wi susi à n win tɔmbu susimɔ. (Heberu 10:24, 25) À n bɔ a hania mɔ̀ a ka Yehofa wɛ̃re, a wãa geeru naamwεmɔwa—wãaru te ta ku ra kpe. Ka gem, gãanu sari ye ya kere a Gusunɔ susi.​—A 1 Timɔte 1:11; 6:19 gario.