Amɔsunwa Kaa Kpĩ a Gusunɔ Susi?

1. Gusunɔ u ra kananu kpuro swaa daki ro?

Gusunɔ u bwesenu kpuron tɔmbu soku bu nùn susi kanaru sɔɔ. (Womu 65:3) Ka mε, u ku ra kananu kpuro wure, n kun mε u ni swaa daki. Nge weenasia, durɔ wi u ra win kurɔ gεm, ma u ra wi wahala doke, win kananu nu koo kpĩ nu gbarara. (1 Piεε 3:7) Mεna, sanam mε Isireliba ba raa swaa taaya kɔ̃sa sɔɔ, Gusunɔ u yina u ben kananu nɔ. Ka gem, kanaru ta sãawa durom bakam. Adama baa durum bakagibu, Gusunɔ u koo ben kananu wura, bà n ben daa kɔsa.​—A Esai 1:15; 55:7 gario.

A fideo ye ba mɔ̀ Gusunɔ u ra kanaru kpuro swaa daki ro? mɛɛrio

2. Amɔsunwa n weenε su kanaru ko?

Kanaru ta sãawa bεsεn sãarun baa, yen sɔ̃ n weenε su bεsεn Taka Kowo, Yehofa tɔna kana. (Mateu 4:10; 6:9) Nge mε sa sãa durumgibu, n maa weenε su kanaru ko ka Yesun yĩsiru, domi u gu bεsεn toranun sɔ̃. (Yohanu 14:6) Yehofa kun kĩ sa n da kana nin keu sa kua, n kun mε ni ba yorua tirenu sɔɔ, wuremɔ. U kĩ bεsεn kanaru ta n wee saa bεsεn gɔ̃run di.​—A Mateu 6:7; Filipi 4:6, 7 gario.

Bεsεn Taka Kowo u koo kpĩ u kananu nɔ ni sa mɔ̀ bεsεn gɔ̃ruɔ, baa sa n kun gari gerua. (1 Samuεli 1:12, 13) U sun soku su kana saa kpuro sɔɔ, nge yam sãreru ka sɔ̃ɔ kpeeru sɔɔ, dĩan dibun koba sɔɔ, ka sanam mε wahalaba yi sun deema.​—A Womu 55:23; Mateu 15:36 gario.

3. Mban sɔ̃na Kirisigibu ba ra mεnnε?

Su ka Gusunɔ susi ya sɛ̃, yen sɔ̃ sa wãa ka tɔn ben naanε dokebu Gusunɔ sɔɔ bu kɔmia, ma ba win nɔɔ mwεεru—bɔri yεndu tem sɔɔ—yaakoru mɔ̀. (2 Timɔte 3:1, 4; 2 Piɛɛ 3:3, 13) Yen sɔ̃, sa tɔn be ba ra mεnnε naanε sɔɔ bu ka dam kɛ̃εnan bukata mɔ, ben tii ba maa bεsεn bukata mɔ.​—A Heberu 10:24, 25 gario.

Mεnnabu ka tɔn be ba Gusunɔ kĩ ya ko sun somi su ka Gusunɔ susi. Yehofan Seeda Diobun mεnnɔsu nu sãawa saa buram ye kaa ka gabun naanε dokebun arufaani di.​—A Romu 1:11, 12 gario.

4. Amɔsunwa kaa kpĩ a Gusunɔ susi?

Kaa kpĩ a Yehofa susi à n ka laakari bwisikumɔ ye a mεεra wi sɔɔ. A bwisikuo win kookoosu, win bwisi kɛ̃nu ka win nɔɔ mwεεnu sɔɔ. Kanaru ka laakari ta koo Gusunɔn kĩru ka win bwisi kpɛ̃asia bεsεn gɔ̃ru sɔɔ.​—A Yosue 1:8; Womu 1:1-3 gario.

Ma n kun mɔ a Gusunɔ naanε sãa ma a wi naanε doke baasi, a ǹ kpɛ̃ a wi susi. Adama, naanε dokebu bu sãawa nge gãa ni nu wasi, bu disiabun bukata mɔ. N weenε a wunen naanε dokebu diisia baadomma, saa a wure a gãa ni a tamaa sãan nuuru mεεrimɔ.​—A Mateu 4:4; Heberu 11:1, 6 gario.

5. Arufaani yerà kaa wa ma a Gusunɔ susi?

Yehofa u ra be ba nùn kĩ nɔɔri. U koo kpĩ u be kɔ̃su saa gãanu kpuron di, ni nu koo ben naanε dokebu ka ben yĩiyɔbu wãaru te ta ku ra kpe sɔɔ, kari doke. (Womu 91:1, 2, 7-10) U ra sun kirɔ ko wãarun swεε yi yi dera bεsεn bwãa dobu ka bεsεn doo nɔɔru yi n wãa kari sɔɔ. Yehofa u sun wãarun swaa ye ya buram bo sɔ̃ɔsi.​—A Womu 73:27, 28; Yakɔbu 4:4, 8 gario.