Tɔn be ba Yesun faagi yorua

A waamɔ tɔn be ba wãa foto ye sɔɔ?— Ben yĩsira Mateu, Maaku, Luku, Yohanu, Piɛɛ, Yakɔbu, Yudu ka Pɔlu. Durɔ be kpuro ba raa wãa sanam mɛ Yesu u wãa temɔ, ma ba win faagi yorua. A de su gia su sosi tɔn be sɔɔ.

Ben suunu sɔɔ tɔmbu ita ba raa sãawa Yesun gɔrobu ma ba waasu kua ka wi sannu. A tɔmbu ita be yɛ̃?— Bera Mateu, Yohanu ka Piɛɛ. Gɔrobu Mateu ka Yohanu ba Yesu yɛ̃ sãa sãa ma ben baawure u tireru yorua Yesun wãaru sɔɔ temɔ. Gɔro Yohanu u maa tirenu yorua ni ba sokumɔ Kãsiru, Yohanun tire gbiikiru, Yohanun tireru yiruse ka Yohanun tireru itase. Gɔro Piɛɛ u tirenu yiru yorua, ni nu maa wãa Bibeli sɔɔ. Ba ni sokumɔ Piɛɛn tire gbiikiru ka Piɛɛn tireru yiruse. Win tireru yiruse sɔɔ, Piɛɛ u tubusia mɛsum Yehofa u gari geruma saa wɔllun di sanam mɛ sɔɔ u nɛɛ: ‘Winiwa nɛn bii. Wi, nɛn kĩnasiwa, wi sɔɔwa nɛn nuku dobu kpuro wãa.’

Tɔn be ba maa tie a waamɔ foto ye sɔɔ, ba sun Yesun gari sɔ̃ɔsi ben tire ni ba yorua sɔɔ. Ben turowa Maaku. Sa tamaa u ko n wãa mi sanam mɛ wɛrɔba Yesu mwa, u ko n wa ye ya koora yen biru Yesu sɔɔ. Ben goowa maa Luku. U raa sãawa dokotoro. Sa tamaa u gɔsia Kirisigii Yesun gɔɔn biru.

Bibelin tire yoro yiru gabu be a waamɔ foto ye sɔɔ, ba sãawa Yesun wɔnɔ gabu. A ben yĩsiru yɛ̃ ro?— Ben yĩsira Yakɔbu ka Yudu. Saa ye Yesu u tie temɔ, ba ǹ daa wi naanɛ doke. Ba raa mam tamaa u wiirewa. Adama, ba raa na ba Yesu naanɛ doke ma ba gɔsia Kirisigibu.

Bibelin tire yoro dãako wi a waamɔ foto ye sɔɔ, wiya Pɔlu. U sere ko Kirisigii, Sɔɔluwa win yĩsiru. U raa Kirisigibu tusa ma u ka be gɔbu. A yɛ̃ mba ya dera Pɔlu u kĩ u gɔsia Kirisigii?— Sɔ̃ɔ teeru, Pɔlu u sanum mɔ̀ u wuu dɔɔ, miya subaru sɔɔ u nɔɔ gagu nua saa wɔllun di. Yesuwa raa ka wi gari mɔ̀. U Pɔlu bikia u nɛɛ: ‘Mban sɔ̃na a be ba man naanɛ doke nɔni sɔ̃ɔmɔ?’ Yenin biruwa Pɔlu u kɔsa ma u gɔsia Kirisigii. Pɔlu u Bibelin tirenu wɔkura nnɛ (14) yorua, saa tire te u Romugibu yoruan di sere ka te u Heberugibu yorua.

Tɔ̃ɔ baatere sa ra Bibeli gari, nge n ǹ mɛ ro?— Saa Bibelin garibun di, sa gãa dabinu giamɔ Yesu sɔɔ. A kĩ a maa gia a sosi Yesu sɔɔ ro?—