Pɔlun sesun bii tɔn durɔ u wɔrugɔru sɔ̃ɔsi

A de su gia aruwaasi goo sɔɔ, wi u win mɛron sesu faaba kua. Aruwaasi win mɛron sesuwa raa gɔro Pɔlu. Sa ǹ aruwaasi win yĩsiru yɛ̃, adama, sa yɛ̃ ma ye u kua ya wɔrugɔru bikia. A kĩ a nɔ ye u kua?—

Pɔlu u raa wãa pirisɔm sɔɔ Yerusalɛmuɔ. Ba raa wi mwa yèn sɔ̃ u Yesun gari kparamɔ. Tɔn kɔ̃so gaba Pɔlu tusa, ma ba kpunaa kɔ̃sa yi. Ba nɛɛ: ‘Su tabu sunɔ kana win tabu kowobu bu ka Pɔlu na siri yerɔ. Sa ko kuke swaa baarɔ, sanam mɛ u sarɔ kpa su nùn go!’

Pɔlun sesun bii u raa na u gari yi nua. Mba u koo ko? U da pirisɔm ɔ ma u Pɔlu gari yi sɔ̃ɔwa. Yande, Pɔlu wi sɔ̃ɔwa u doo u tabu sunɔ ben kpunaa kɔ̃sa yen gari sɔ̃. A tamaa ya ǹ ko Pɔlun sesun bii sɛ̃sia u ka tabu sunɔ gari yi sɔ̃ ro?— Aawo, ya ko sɛ̃sia domi tabu sunɔ wi, u sãawa tɔn giro. Adama, ka wɔrugɔra Pɔlun sesun bii u tabu sunɔ gari yi sɔ̃ɔwa.

Tabu sunɔ u yɛ̃ mam mam ye n weenɛ u ko. U tabu kowobu nge nɛɛra wunɔbu (500) sɔɔru kua bu Pɔlu kɔ̃su! Ma u be sɔ̃ɔwa bu ka Pɔlu doo Sesareɔ wɔ̃ku te. Pɔlu u faaba wa ro?— Oo, tɔn kɔ̃sobu ba ǹ kpĩa ba wi go! Ben kpunaa kɔ̃sa ye ya ǹ sɔmburu kue.

Sɔ̃ɔsi terà kaa kpĩ a sua saa faagi yenin di?— Wunɛn tii kaa kpĩ a n wɔrugɔru mɔ nge Pɔlun sesun bii. Sa wɔrugɔrun bukata mɔ sanam mɛ sa gabu Yehofan gari sɔ̃ɔmɔ. Kaa wɔrugɔru kpĩ kpa a n bɔ a n Yehofan gari kparamɔ ro?— À n mɔ̀ mɛ, kaa kpĩ a gabu faaba ko.