Timɔte sɔ̃ɔsi ma u kĩ u tɔmbu somi

Timɔte raa sãawa aruwaasi wi u nuku dobu mɔ u ka tɔmbu somi. U wusu dabinu da u ka gabu somi. Yen sɔ̃na win wãara yiba ka gãa gee dabinu. A kĩ a nɔ mɛ u ka wãa te diisina?—

Timɔte kpɛ̃a wuu ge ba mɔ̀ Lisitiɔ. Saa win wɛ̃run diya win nikurɔ Loisi ka win mɛro Enisi, ba wi keu sɔ̃ɔsibu torua Yehofa sɔɔ. Saa ye Timɔte u kpɛ̃amɔ, u kĩ u gabu somi bu ka gia Yehofa sɔɔ.

Timɔte tie u sãa aruwaasi, Pɔlu u ka wi bikia ù n koo kpĩ u wi swĩi kpa bu da gan gia bu waasu ko. Timɔte u wisa u nɛɛ: ‘Oo!’ U kpeere u ka wi swĩi kpa bu da bu gabu somi.

Timɔte ka Pɔlu ba wuu ge ba mɔ̀ Tɛsalonika da, Masedɔnin temɔ. Bu ka wuu ge turi, ba sĩa tɔ̃ɔ dabi dabinu yen biruwa ba goo nimkuu sua. Sanam mɛ ba raa tura mi, ba tɔn dabinu somi bu ka gia Yehofa sɔɔ. Adama, gaba ka be mɔru bara ma ba kasu bu be nɔni sɔ̃. Yen sɔ̃ Pɔlu ka Timɔte ba wuu swɛnya ba Gusunɔn gari kpara n da.

Ya ǹ tɛ, Pɔlu u Timɔte kana u wuro Tɛsalonikaɔ kpa u mɛɛri mɛsum Kirisigibu ba mɔ̀ ka ben naanɛ dokebu. Ya Timɔte wɔrugɔ bakaru bikia u ka wura Tɛsalonikaɔ mi kari baka wãa. Adama, u wuu ge da domi u wurure too Kirisigibun sɔ̃. Yen biru, u ka Pɔlu labaari gea naawa saa wuu gen di. Tɛsalonikan kĩnasiba gea mɔ̀ deedee!

Timɔte u ka Pɔlu sɔmburu kua wɔ̃ɔ dabi dabinu. Sɔ̃ɔ teeru, Pɔlu u yorua ma Timɔtewa sãa tɔnu wi u koo kpĩ u yigbɛnu gɔria nù n somirun bukata mɔ̀. Gem ka tia, Timɔte u Yehofa kĩ ma u tɔmbu kĩ.

A tɔmbu kĩ ma a kasu a be somi bu gia Yehofa sɔɔ?— À n sãa nge Timɔte, kaa kpĩ a n bɔri yɛndu ka nuku dobu mɔ wunɛn wãaru sɔɔ!