Rom

8 Alani i, ndang hona uhum be halak na marsada dohot Kristus Jesus. 2 Sasintongna, patik ni tondi parbadia i do na mangalehon hangoluan tu hamu, asa boi hamu marsada dohot Kristus Jesus. Patik i ma na paluahon hamu sian patik ni dosa dohot patik ni hamatean. 3 Diulahon Debata do na so boi ulahonon ni Patik ni si Musa alani hagaleon ni jolma. Disuru do Anakna gabe jolma laho manesa dosa. Marhite i, diuhum Debata ma dosa ni angka jolma. 4 Boi do hita mangulahon na sintong mangihuthon patik i molo taihuthon panogu-noguon ni tondi parbadia, ndang mangihuthon lomo ni roha ni dagingta. 5 Ai halak na mangihuthon lomo ni roha ni dagingna, holan na hombar tu lomo ni roha ni dagingna i do dipingkiri. Alai halak na mangolu mangihuthon panogu-noguon ni tondi parbadia, angka na hombar tu panogu-noguon ni tondi parbadia do dipingkiri i. 6 Molo na hombar tu lomo ni roha ni daging do na sai dipingkiri sasahalak, parohon hamatean do i. Alai molo na hombar tu panogu-noguon ni tondi parbadia do na dipingkiri sasahalak, parohon hangoluan do i dohot hadameon. 7 Gabe musu ni Debata do halak na sai mamingkirhon lomo ni roha ni daging. Ai ndang dioloi ibana patik ni Debata jala sasintongna ndang tarulahon ibana i. 8 Alani i, halak na mangihuthon lomo ni roha ni daging, ndang boi mambahen las roha ni Debata.

9 Molo adong tondi parbadia ni Debata di bagasan dirimuna, ihuthononmuna do panogu-noguon ni tondi parbadia i, ndang mangihuthon lomo ni roha ni daging. Alai molo ndang adong pingkiran ni Kristus di sasahalak, ndang ampuna ni Kristus ibana. 10 Mate do daging alani dosa. Alai molo marsada hamu dohot Kristus, lehonon ni tondi parbadia do tu hamu hangoluan, ala nunga didok Debata hamu mangulahon na sintong. 11 Dipahehe Debata do Kristus Jesus sian hamatean marhite tondi parbadia. Molo adong tondi parbadia ni Debata di hamu, paheheonna do dagingmuna na boi mate marhite tondi parbadia.

12 Alani i angka dongan, adong do na ingkon taulahon, alai ndang mangihuthon lomo ni roha ni daging na ingkon taulahon i. 13 Molo diihuthon hamu do lomo ni roha ni daging, mate ma hamu. Alai molo dipamate hamu do parniulaonmuna na mardosa i marhite pangurupion ni tondi parbadia, mangolu ma hamu. 14 Sude halak na tinogu-nogu ni tondi parbadia, angka anak ni Debata do i. 15 Ndang bahenon ni tondi parbadia hita gabe hatoban manang gabe mabiar. Alai marhite tondi parbadia, bahenonna do hita gabe anak ni Debata. Jala marhite tondi parbadia, taronjar ma rohanta mandok, “Abba,* Ale Amang!” 16 Tondi parbadia i ma na paposhon rohanta molo hita anak ni Debata. 17 Molo nunga anak ni Debata hita, dohot ma hita manjalo parbagianan sian Debata rap dohot Kristus. Jala molo marsitaonon do hita rap dohot Kristus, rap ma hita dipasangap dohot ibana.

18 Ninna rohangku, ndang sadia dope sitaononta saonari martimbangkon pasu-pasu na balga sijaloonta na laho papataron ni Debata. 19 Ai tarpaima do sude tompaan tingki dipapatar angka anak ni Debata. 20 Dipatunduk Debata do sude tompaan i tu na so marguna, ndang alani lomo ni roha ni nasida sandiri, alai alani lomo ni roha ni Debata do. Nang pe songon i, diparade Debata do pangkirimon, 21 asa unang gabe hatoban ni dosa dohot hamatean sude tompaan i. Jala dapot ni nasida ma hasangapon na mansai balga songon na dilehon tu angka anak ni Debata. 22 Ai taboto do, marhoi-hoi* jala manaon hasusaan do sude na tinompa ni Debata sahat tu saonari. 23 Ndang holan nasida na marhoi-hoi, alai dohot do hita, nang pe hita na parjolo manjalo tondi parbadia, i ma parbagiananta i. Jala marhoi-hoi do hita huhut paimahon na laho bahenon ni Debata hita gabe anakna. Paluaonna ma hita sian dagingta na mardosa marhite tobusan. 24 Ala na mangkirim do hita umbahen dipalua. Alai molo dung taida na tahirim i, ndang mangkirim be hita. Ai ise ma halak na mangkirim tu naung niidana? 25 Molo mangkirim do hita tu na so taida, tongtong ma hita sabar paimahon i.

26 Asing ni i, alani hagaleonta, olo do sipata ndang taboto aha na laho tatangiangkon tingki martangiang. Molo ndang taboto sidohononta, di tingki i ma tondi parbadia mangurupi hita paboahon na di bagasan rohanta. 27 Jala botoon ni Debata do aha na dipangido ni tondi parbadia i, ai Ibana do na mamboto roha ni sude jolma. Ala angka na badia do na ditangiangkon ni tondi parbadia i jala hombar do i tu lomo ni roha ni Debata.

28 Taboto do, dibahen Debata do maratur sude ulaonna asa parohon na denggan tu angka na mangkaholongi Ibana. Nasida i ma angka na tarjou hombar tu lomo ni roha ni Debata. 29 Sian mulana, nasida do na parjolo diparrohahon jala nunga ditontuhon nasida asa boi sarupa dohot Anakna i. Alani i, gabe Anakna i ma siangkangan sian sude haha anggina. 30 Asing ni i, nasida na parjolo ditontuhon i, nasida do na dijou ni Debata. Jala nasida na jinouna i, didok do mangulahon na sintong. Ujungna, dilehon Ibana ma hasangapon tu angka halak na didok mangulahon na sintong i.

31 Antong aha ma na boi dohononta taringot tu sudena on? Molo Debata do donganta, ise ma na boi mangalo hita? 32 Ndang diambati Debata Anakna i manaon sitaonon, alai disuru Ibana do Anakna i humongkop hita. Molo songon i, nda lehonon ni Debata dohot Anakna i do tu hita sude na asing i? 33 Ai ise ma na boi manudu angka na pinillit ni Debata? Ndang adong na boi manudu nasida. Ai Debata do na mandok nasida mangulahon na sintong. 34 Ai ise ma na boi manguhumi nasida? Ndang adong! Ai nunga mate Kristus Jesus jala nunga dipahehe sian hamatean. Saonari, nunga hundul ibana di siamun ni Debata laho mambahen pangidoan tu Debata taringot tu hita.

35 Ise ma na boi manirang hita sian holong ni Kristus i? Boi do hasusaan, arsak ni roha, sitaonon alani haporseaon, haraparon, hapogoson,* parmaraan, manang diancam dohot podang, manirang hita sian holong ni Kristus? 36 Songon na nidok ni na tarsurat i, “Alani Ho, naeng dibunu do hami ganup tingki. Ai dibahen do hami songon biru-biru na laho diseat.” 37 Alai di sasudena i, monang do hita alani pangurupion ni Kristus na mangkaholongi hita. 38 Ai pos do rohangku, hamatean, hangoluan, manang suru-suruan, manang pamarenta, angka na adong saonari manang na adong di ari na naeng ro, huaso, 39 angka na adong di ginjang manang angka na adong di toru, manang tompaan na dia pe, ndang adong na boi manirang hita sian holong ni Debata, na tangkas tarida marhite Kristus Jesus Tuanta.