1 Korint

15 Hamu angka dongan, saonari pasingotonku ma hamu taringot tu barita na uli naung hupasahat tu hamu. Dijalo hamu do i jala tongtong do i diihuthon hamu. 2 Boi do hamu malua molo diihuthon hamu barita na uli na hupasahat i tu hamu. Molo ndang songon i, marisuang ma hamu gabe siihuthon Kristus.

3 Ai angka na rumingkot na hujalo i nunga huajarhon tu hamu, i ma taringot tu Kristus na mate alani dosanta songon na tarsurat di Buku na Badia. 4 Nunga dikubur ibana, dung i hehe do ibana di ari na patoluhon songon na tarsurat di Buku na Badia i. 5 Dipatuduhon do dirina tu si Kepas* dung i, tu apostel na 12 i. 6 Dung i dipatuduhon do muse dirina tu lobi sian 500 halak dongan sahaporseaon na marpungu di sada inganan. Godang sian nasida rap dope dohot hita, alai na deba nai nunga mate.* 7 Dung i dipatuduhon ma muse dirina tu si Jakobus, dung i tu sude angka apostel. 8 Jala na parpudi, dipatuduhon do dirina tu ahu, na songon poso-poso na tubu di na so tingkina.

9 Ahu do na ummetmet sian sude apostel, jala ndang tama ahu didok apostel, ai hubahen do na hansit tu huria ni Debata. 10 Alai ala asi ni roha ni Debata na mansai balga i do umbahen na boi ahu songon saonari on. Jala ndang marisuang asi ni rohana na mansai balga i, ai gumodang do na huulahon sian sude angka apostel. Jala ndang alani gogongku umbahen na boi huulahon i, alai alani asi ni roha ni Debata na mansai balga i do na mandongani ahu. 11 Alani i, manang ahu pe na mamaritahon barita na uli i manang nasida, dos do barita na hupaboa hami, jala i do dihaporseai hamu.

12 Molo nunga tabaritahon naung dipahehe Kristus i sian na mate, boasa adong sian tonga-tongamuna na mandok na so adong haheheon tu halak na mate? 13 Molo ndang adong haheheon tu halak na mate, Kristus i pe ndang tutu dipahehe. 14 Alai molo ndang tutu dipahehe Kristus i, marisuang ma barita na uli na tabaritahon i dohot haporseaonmuna i. 15 Asing ni i, molo ndang dipahehe Debata halak na mate, Kristus i pe ndang dipahehe. Alani i, gabe ndang tutu be barita na tapaboa taringot tu Debata, ai tabaritahon do naung hehe Kristus i dibahen Debata. 16 Molo ndang dipahehe na mate, Kristus i pe ndang dipahehe. 17 Dung i, molo ndang dipahehe Kristus i, marisuang ma haporseaonmuna jala tongtong ma hamu mardosa. 18 Jala laos mago ma sude halak naung mate* na mangihuthon Kristus i. 19 Molo holan di parngoluan saonari on do hita mangkirim tu Kristus i, hita ma na dumangol* sian sude jolma.

20 Alai, saonari nunga dipahehe Kristus sian na mate jala ibana do na parjolo dipahehe* sian sude halak na mate.* 21 Ai songon hamatean i ro sian sahalak jolma, suang songon i do haheheon ni halak na mate ro do i sian sahalak jolma. 22 Ai songon sude jolma mate alani si Adam, suang songon i ma sude jolma mulak mangolu alani Kristus. 23 Alai dipahehe do ganup halak mangihuthon urutanna: Kristus ma na parjolo, dung i saleleng ari harorona i, dipahehe ma angka na di ibana. 24 Dung i di ujungna, pasahatonna ma Harajaon i tu Debata Ama i, dung diripashon sude pamarentaon, na marhuaso, dohot na marhagogoon. 25 Ai ingkon mamarenta do ibana gabe raja sahat tu na bahenon ni Debata sude musuna gabe sidege-degean ni patna. 26 Jala musu na parpudi na laho ripashononna, i ma hamatean. 27 Ai dibahen Debata do “tunduk saluhutna tu toru ni pat ni Kristus”. Alai tingki didok, ‘dibahen Debata ibana mangarajai sudena’, tangkas ma ndang dohot Debata dirajai Kristus, alai Debata do na mambahen sudena i dirajai Kristus. 28 Alai dung dibahen tunduk sude tu ibana, Anak i sandiri pe patundukonna do dirina tu Debata na mambahen sude tunduk tu ibana. Alani i, gabe Debata ma na mangarajai sasudena.

29 Molo ndang dipahehe na mate, aha ma na masa tu halak na tardidi na gabe mate? Boasa ma dididi nasida asa gabe halak na mate? 30 Boasa ma ingkon mangadopi parmaraan hami ganup tingki? 31 Ganup ari do ahu mangadopi hamatean. Sintong do na hudok on tu hamu, songon sintong ni las ni rohangku tu hamu ale angka dongan, hamu sisean ni Kristus Jesus Tuanta i. 32 Aha ma gunana hualo angka binatang buas na di Epesus songon na binahen ni halak na asing i?* Molo ndang dipahehe na mate, “ba mangan minum ma hita, ai mate do hita marsogot”. 33 Unang ma olo hamu dioto-otoi. Molo mardongan hamu tu halak na so denggan, sega do hasomalanmuna* na denggan. 34 Dungo ma hamu jala ulahon hamu ma na sintong, unang be sai mardosai hamu. Ai deba sian hamu ndang adong parbinotoanna taringot tu Debata. Hudok pe songon i, asa maila do hamu.

35 Alai, olo do ra adong na manungkun, “Songon dia do halak na mate boi dipahehe? Daging na songon dia do lehononna tu nasida?” 36 E ho na so marroha! Molo disaburhon ho boni tu tano, ndang tubu i anggo so jolo busuk.* 37 Ai ndang suan-suanan na tubu na sinaburhonmi, alai boni do i, dos songon boni ni eme manang boni na asing. 38 Alai Debata do na mambahen boni i tubu hombar tu lomo ni rohana. Jala marasing-asing do dibahen ganup boni na tubu i. 39 Ndang sarupa sude ragam ni daging. Asing do daging ni jolma, daging ni binatang, daging ni pidong, dohot daging ni dengke. 40 Asing do daging ni angka na di banua ginjang jala asing do daging ni angka na di tano on. Asing do hasangapon ni daging ni angka na di banua ginjang jala asing do hasangapon ni daging ni angka na di tano on. 41 Asing do hasangapon ni mata ni ari, asing do hasangapon ni bulan, jala asing do hasangapon ni angka bintang. Gariada, angka bintang i pe marasing-asing do hasangaponna.

42 Songon i ma na masa tu halak na mate. Busuk do dagingna na mate i. Alai dung dipahehe, dapotna ma pamatang na so olo busuk. 43 Lea do tingki dikuburhon,* alai sangap do dung dipahehe. Ndang adong gogona tingki dikuburhon, alai gogo do dung dipahehe. 44 Dagingna na di tano on do na dikubur alai dipahehe ma ibana tu hangoluan na di banua ginjang. Molo adong do hangoluan di tano on, tontu adong do hangoluan di banua ginjang. 45 Songon na tarsurat, “Gabe jolma na mangolu ma si Adam na parjolo.” Alai si Adam na parpudi gabe suru-suruan na mansai gogo na mangalehon hangoluan. 46 Alai hangoluan na parjolo i, ndang songon hangoluan na di banua ginjang i. Ai hangoluan na di tano on do na parjolo i. Dung i pe asa ro hangoluan na di banua ginjang i. 47 Sian tano on do ro jolma na parjolo i jala ditompa sian orbuk. Alai sian banua ginjang do ro jolma na paduahon i. 48 Angka na di tano on sarupa do tu jolma na ditompa sian orbuk i, jala angka na sian banua ginjang i sarupa do i tu ibana na ro sian banua ginjang i. 49 Ala sarupa do hita songon jolma na ditompa sian orbuk i, songon i ma nang hita haduan, sarupa ma hita songon ibana na ro sian banua ginjang i.

50 On do na hudok disi ale angka dongan, ndang adong parbagianan ni sibuk dohot mudar di Harajaon ni Debata. Jala sude na boi busuk ndang mandapot parbagianan di na so boi busuk. 51 Parrohahon hamu ma rahasia na badia na hupaboa on: Ndang sude hita mate,* alai sude do hita paubaonna 52 di bagasan satongkin, holan sangkidop mata saleleng tarbege soara ni tarompet na parpudi. Ai di na tarbege soara ni tarompet i, paheheonna ma halak na mate jala mardaging na so boi busuk ma nasida. Laos di tingki i ma paubaonna hita sude. 53 Daging na boi busuk i, ingkon paubaonna do gabe tu hangoluan na saleleng ni lelengna. Jala daging na boi mate i, ingkon paubaonna do tu hangoluan na saleleng ni lelengna. 54 Tingki dipauba daging na boi busuk i gabe daging na so boi busuk, jala daging na boi mate dipauba gabe daging na so boi mate, saut ma ayat na mandok, “Bondutonna ma hamatean saleleng ni lelengna.” 55 “Ale hamatean, didia do hamonanganmi? Ale hamatean didia do soropmi?”* 56 Sorop na parohon hamatean do dosa i. Jala marhuaso do dosa i alani Patik i. 57 Alai mauliate ma tu Debata na mangalehon hamonangan marhite Tuanta Jesus Kristus!

58 Alani i angka dongan na huhaholongi, ingkon togu ma hamu, jala ndang muba-uba. Sai marsitutu ma hamu mangulahon godang ulaon ni Tuhan* i. Ai diboto hamu do, ndang marisuang halojaonmuna marhobas di Tuhan* i.