Epesus

2 Asing ni i, dipangolu Debata do hamu nang pe naung mate hamu alani hasalaan dohot dosamuna. 2 Diihuthon hamu do najolo na niulahon ni portibi on, mangihuthon parhuaso na mangarajai alogo, i ma pingkiran na mangarajai angka halak na so mangoloi Debata. 3 Sasintongna songon nasida do hita sude najolo, taihuthon do giot-giot ni daging dohot pingkiran na mardosa. Sian mulai tubu do hita patut hona rimas ni Debata songon na asing. 4 Alai, alani asi ni roha dohot holong ni Debata na mansai balga i tu hita, 5 dipangolu ma hita rap dohot Kristus nang pe naung mate hita alani dosanta. Sasintongna, marhite asi ni roha ni Debata na mansai balga i do hamu dipalua. 6 Dung i, dipangolu Debata do hita rap dohot Kristus Jesus jala rap hundul ma hita dohot ibana di surgo ala taihuthon do ibana. 7 Alani i di ari na naeng ro, patuduhonon ni Debata ma asi ni rohana na mansai balga i tingki diulahon ibana na denggan tu hita, angka na mangihuthon Kristus Jesus.

8 Hamu angka na porsea, marhite asi ni roha ni Debata na mansai balga i do hamu dipalua. Ndang alani pambahenanmuna umbahen na malua hamu, alai silehon-lehon ni Debata do i. 9 Nda tung alani pambahenanmuna i, alani i unang ma ginjang rohamuna. 10 Ditompa Debata do hita laho mangulahon angka na denggan ala taihuthon Kristus Jesus. On ma naung ditontuhon Debata asa taulahon.

11 Ingot ma, angka halak sian bangso na asing do hamu najolo. Hea do halak na marsunat, i ma na disunat jolma, manjou hamu halak na so marsunat. 12 Ndang ditanda hamu Kristus di tingki i. Pulik do hamu sian bangso Israel jala ndang parsidohot hamu tu parjanjian i. Ndang ditanda hamu Debata jala ndang adong pangkirimon di ngolumuna. 13 Alai nunga diihuthon hamu saonari Kristus Jesus. Nang pe ndang ditanda hamu najolo Debata, alai nunga ditanda hamu Ibana alani mudar ni Kristus. 14 Ai Kristus do na mambahen hita mardame, na mambahen marsada halak Jahudi dohot na so Jahudi jala ibana do na mangarumpakkon tembok na manirang nasida. 15 Dipaujung ibana do Patik na marisi angka parenta na mambahen nasida marmusu, laho mambahen angka na porsea tu ibana gabe bangso na imbaru* jala mardame tu ibana. 16 Nunga dibahen ibana halak Jahudi dohot na so Jahudi mardame tu Debata marhite hau partinaonan* i. Ai dipaujung ibana do parmusuon i marhite hamateanna. 17 Ro do ibana jala dipaboa ibana do barita na uli taringot tu hadameon tu hamu angka na so mananda Debata dohot tu angka na mananda Debata. 18 Marhite ibana, boi ma hita angka halak Jahudi dohot na so Jahudi martangiang tu Ama na di surgo i, ai nunga rap manjalo tondi parbadia hita.

19 Alani i, ndang bangso na asing be hamu. Alai nunga gabe sabangso hamu dohot angka na badia i jala nunga gabe keluarga ni Debata hamu. 20 Nunga dipajongjong be hamu di ginjang ni fondasi ni angka apostel dohot angka panurirang, jala Kristus Jesus ma batu parsuhi-suhi na gabe fondasi i. 21 Saluhut bangunan na marsada dohot ibana jala na togu marsada ganup bagianna, gabe sada bagas joro na badia ma i di Jahowa. 22 Ala marsada hamu dohot Kristus, dibahen Debata ma hamu gabe ingananna, ai disi do tondi parbadiana.