1 Tessalonik

1 Sian si Paulus, si Silwanus,* dohot si Timoteus. Mandapothon huria na di Tessalonik na marsada dohot Debata Ama dohot Tuan Jesus Kristus.

Sai didongani hadameon dohot asi ni roha ni Debata na mansai balga i ma hamu.

2 Tongtong do hami mandok mauliate tu Debata tingki hutangiangkon hami hamu. 3 Di jolo ni Debata Ama i, tongtong do huingot hami ulaonmuna alani haporseaon dohot holongmuna. Jala huingot hami do songon dia hamu sabar manaon hasusaan alani pangkirimon tu Jesus Kristus Tuanta i. 4 Hamu angka dongan na hinaholongan ni Debata, huboto hami do na dipillit Ibana hamu. 5 Ai barita na uli na hupaboa hami tu hamu ndang holan marhite hata-hata sambing, alai dohot do marhite huaso, tondi parbadia, dohot pos ni roha na togu. Jala diboto hamu do aha naung huulahon hami tu hamu, tingki rap dope hami dohot hamu. 6 Ai diihuthon hamu do sitiruon sian hami dohot sian Tuan i. Nang pe godang sitaononmuna, dijalo hamu do hata ni Debata mardongan las ni roha na sian tondi parbadia. 7 Alani i, gabe sitiruon do hamu tu sude na porsea na adong di Makedonia dohot di Akaya.

8 Ai ndang holan halak na di luat Makedonia dohot Akaya na manangihon hata ni Jahowa alani hamu, alai dohot do tarbarita haporseaonmuna tu sude inganan. Alani i, ndang adong be na porlu dohononnami tu hamu. 9 Ai sai dipaboa nasida do songon dia hamu parjolo sahali pajumpang dohot hami. Jala dipaboa nasida do songon dia hamu manadingkon angka gana-ganaan, asa boi gabe naposo ni Debata na mangolu dohot na sintong i, 10 jala dipaboa nasida do muse songon dia hamu paimahon haroro ni Jesus Anakna i sian banua ginjang, naung hehe sian hamatean jala na laho paluahon hita sian rimas ni Debata na naeng ro i.