Heber
3 Alani i, ale angka dongan na badia, na dohot dijou tu banua ginjang, parrohahon hamu ma apostel dohot sintua ni malim na tahaporseai, i ma Jesus. 2 Marsihohot do ibana tu Debata na mamillit ibana, songon si Musa na marsihohot marhobas di jabu ni Debata.* 3 Umbalga do hasangapon ni Jesus sian si Musa. Ai umbalga do hasangapon ni halak na pajongjongkon jabu sian jabu i sandiri. 4 Ganup jabu, adong do na pajongjongkon, alai Debata do na manompa nasa na adong. 5 Marsihohot do si Musa marhobas di jabu ni Debata, jala i ma na gabe gombaran* tu na laho dipaboa di ari na naeng ro. 6 Alai marsihohot do Kristus i, songon anak na mangaradoti jabu ni Debata. Hita do jabu ni Debata, molo tongtong hita barani mangkatai,* jala gomos tatiop pangkirimon na mambahen las rohanta i sahat ro di ujungna.
7 Alani i, songon na dipaboa marhite tondi parbadia, “Sadari on, molo dibege hamu soarangku, 8 unang ma pajogal hamu rohamuna, songon ompumuna na mambahen Ahu tarrimas, tingki diuji nasida Ahu di padang pasir. 9 Diunjuni jala diuji nasida do Ahu, nang pe nunga diida nasida sude pambahenanku saleleng 40 taon. 10 Alani i do Ahu magigi tu sundut* i, jala hudok ma, ‘Sai dialo nasida do hatangku di bagasan roha ni nasida, jala ndang ditanda nasida Ahu.’ 11 Tarrimas ma Ahu jala marsumpa, ‘Ndang boi nasida masuk tu ari paradiananki.’”
12 Ale angka dongan, manat ma hamu, asa unang adong sian hamu na marroha na jahat, na gabe so porsea jala manadingkon Debata na mangolu i. 13 Alai tongtong ma patogu hamu donganmuna ganup ari, saleleng so marujung dope hata “Sadari on”, asa unang adong sian hamu na gabe jogal rohana ala dioto-otoi dosa. 14 Jaloonta do songon na jinalo ni Kristus i, molo tatiop gomos sahat ro di ujungna haporseaonta na sian mulana i. 15 Ai songon i do didok na tarsurat i, “Sadari on, molo dibege hamu soarangku, unang ma pajogal hamu rohamuna, songon tingki angka ompumuna mambahen Ahu tarrimas.”
16 Ise ma na mambege hata i alai sai dibahen dope Debata tarrimas? Nda nasida na tinogihon ni si Musa kaluar sian Mesir i do? 17 Tu ise ma magigi Debata saleleng 40 taon? Nda tu nasida na mardosa, na bangkena marragean di padang pasir? 18 Jala tu ise do Debata marsumpa na so boi nasida masuk tu ari paradiananna i? Nda tu nasida na so mangoloi Ibana i do? 19 Alani i, nunga taida, ndang boi nasida masuk tu ari paradiananna i ala ndang porsea nasida.