Heber

6 Alani i, dung taparsiajari ajaran na parjolo taringot tu Kristus, marsitutu ma asa toras hita. Unang be holan ajaran na parjolo i na sai taparsiajari, i ma ajaran taringot tu hamubaon sian ulaon na so marlapatan,* ajaran taringot tu haporseaon tu Debata, 2 ajaran taringot tu pandidion, ajaran taringot tu na mangampehon tangan, ajaran taringot tu haheheon ni halak na mate, dohot ajaran taringot tu panguhuman saleleng ni lelengna. 3 Alani i, marhite pangurupion ni Debata, marsitutu ma asa toras hita.

4 Ai adong do deba naung hea manjalo hatiuron na sian Debata, dohot naung manjalo silehon-lehon sian banua ginjang, dohot naung manjalo tondi parbadia ni Debata, 5 dohot naung manjalo hata ni Debata, jala naung manjalo pasu-pasu* na laho lehonon ni Debata tu portibi on di ari* na naeng ro, 6 alai ditadingkon nasida do haporseaon ni nasida. Ndang na boi be nasida diurupi asa muba, ai dipakkuhon nasida do muse Anak ni Debata di hau, jala dipaila do ibana di jolo ni natorop. 7 Pasu-pasu na sian Debata do udan na jotjot turun tu tano on. Ai dibahen udan i do maraek tano on. Alani i, tubu ma angka suan-suanan na marguna tu na mangula tano i. 8 Alai molo suga-suga do na tubu, ndang adong guna ni tano i. Buraanna ma i jala tutungonna.

9 Alai angka dongan na hinaholongan, nang pe hudok hami songon i, pos do rohanami na dumenggan do hamu sian nasida naung manadingkon haporseaonna i. Jala pos do rohanami, diulahon hamu do ulaon na mambahen hamu boi mandapot haluaon i. 10 Ai tigor do Debata, ndang halupahononna ulaonmuna dohot holong na pinatudumuna tu goarna. Dipatuduhon hamu do i marhite mangurupi* angka na badia i sahat tu saonari. 11 Nang pe songon i, lomo do rohanami, asa tongtong hamu ringgas, songon naung binahenmuna saleleng on, asa pos situtu rohamuna tu pangkirimon i sahat tu ujungna. 12 Unang ma gabe malas hamu. Alai tiru hamu ma angka halak naung manjalo janji i, ala sabar nasida jala marhaporseaon.

13 Tingki marjanji Debata tu si Abraham, marhite dirina sandiri do Ibana marsumpa. Ai ndang adong be na umbalga sian Ibana. 14 Ninna Ibana do, “Pasu-pasuonku ma ho jala torop ma bahenonku pinomparmu.” 15 Ala sabar do si Abraham paimahon, dapotna ma janji ni Debata i. 16 Molo marsumpa jolma, bahenonna do sumpana i marhite na tumimbo sian ibana, jala i ma na paujungkon sude parsoalan, ai sumpana i do jaminan laho patoguhon janjina. 17 Songon i ma nang Debata, laho paposhon roha ni halak naung manjalo janji i, marsumpa do Ibana laho patuduhon na so muba janjina* i. 18 Ndang na olo muba janji dohot sumpa ni Debata, jala ndang boi Ibana margabus. Angka on ma na patoguhon hita na marlinggom tu Debata asa marpos ni roha tu pangkirimon na adong di jolonta. 19 Songon jangkar ni kapal do pangkirimon i di ngolunta na mambahen hita togu, marpos ni roha, jala na mamboan hita masuk tu pudi ni tire i. 20 Nunga parjolo Jesus masuk tusi, laho mambungka jala paradehon dalan tu hita. Ibana do sintua ni malim na saleleng ni lelengna na songon si Melkisedek.