Heber
8 On do na rumingkot sian sude naung tahatai i: Nunga adong di hita sintua ni malim na songon i. Jala nunga hundul ibana di siamun ni habangsa ni Debata na Marmulia i. 2 Marhobas ma ibana di inganan na badia di kemah na sasintongna i, na pinajongjong ni Jahowa, ndang na pinajongjong ni jolma. 3 Ganup sintua ni malim dipillit do laho pasahathon silehon-lehon dohot pelean. Alani i, Jesus pe ingkon adong do sipelehononna. 4 Molo di tano on do ibana, ndang boi ibana gabe malim. Ai nunga adong angka malim na asing na pasahathon pelean mangihuthon Patik. 5 Sude na niulahon ni malim gabe gombaran do i laho patuduhon angka na di banua ginjang i. Tarida do i sian parenta ni Debata tingki si Musa naeng pajongjongkon kemah na badia, didok Debata do tu ibana, “Parrohahon ma, asa boi bahenonmu sudena i songon tiruan na hupatuduhon tu ho di dolok i.” 6 Alai saonari, nunga dilehon tu Jesus ulaon na sumurung sian angka malim i. Ai nunga gabe parhitean ibana di parjanjian na dumenggan i. Togu* do dibahen parjanjian i mangihuthon angka janji na dumenggan.
7 Molo ndang adong na hurang di parjanjian na parjolo i, ndang porlu be parjanjian na paduahon. 8 Alai adong do diida Debata na hurang di bangso i, ai “ninna Jahowa do, ‘Ida ma, na ro ma tingkina, bahenonku ma parjanjian na imbaru tu bangso Israel dohot tu bangso Juda.’ 9 Jala didok Jahowa do muse, ‘Parjanjian na imbaru na hubahen i, ndang songon parjanjian na hubahen tu ompu ni nasida i. Hubahen do parjanjian i tingki hutogu nasida kaluar sian Mesir. Alai diose nasida do parjanjian na hubahen i. Alani i, ndang husarihon be nasida.’
10 “‘On ma parjanjian na laho bahenonku tu bangso Israel dungkon na masa i,’ ninna Jahowa. ‘Bahenonku ma angka patikku di pingkiran ni nasida jala surathononku ma i di roha ni nasida. Ahu ma na gabe Debata ni nasida jala nasida ma na gabe bangsongku.
11 “‘Ndang porlu be ajaran ni nasida donganna sabangso dohot haha anggina laho mananda Jahowa. Ai sude ma nasida mananda Ahu, sian angka na sangap dohot angka na so sangap. 12 Salpuhononku ma hasalaan ni nasida jala ndang ingotonku be dosa ni nasida.’”
13 Ala nunga dipaboa Debata taringot tu “parjanjian na imbaru” gabe buruk ma parjanjian naung leleng i. Jala nasa naung buruk dohot naung leleng hatop nama i salpu.