Jakobus
3 Hamu angka donganku, ndang porlu godang sian hamu na ingkon gabe guru. Ai molo gabe guru hita, umbalga do tanggung jawabta tu Debata. 2 Sude do hita jotjot sala. Molo adong halak na so hea sala di pangkataion, halak na so mardosa* do i, na boi mangarajai saluhut dagingna. 3 Molo tabahen kokang tu baba ni hoda asa dioloi hita, boi ma toguonta hoda i. 4 Parrohahon hamu ma angka kapal. Nang pe balga kapal i jala dionjar alogo na gogo, alai marhite amudi* na mansai gelleng do i dipadalan mangihuthon lomo ni roha ni supir ni kapal.
5 Songon i do nang dila i. Metmet do i alai godang do hata-hatana. Ida ma harangan na bidang, boi do i masurbu bahenon ni api na metmet. 6 Songon api do dila i. Gok hajahaton do dila i ala boi do i mambahen ramun saluhut daging. Bahenon ni i do hangoluan ni sasahalak tu api jala sian Gehena* do api i. 7 Boi do jinak angka binatang liar, pidong, binatang na manginsir dohot angka binatang na di laut jala nunga jinak i dibahen jolma. 8 Alai ndang adong jolma na boi pajinakkon dila. Na jahat do i jala maol do mangarajai i, gok do disi rasun na pamatehon. 9 Dila do tapangke mamuji Jahowa Ama i, jala laos dila do tapangke mamburai jolma na ditompa “suman tu Debata”. 10 Sian pamangan do kaluar pasu-pasu dohot bura.
Hamu angka donganku, ndang tama masa angka sisongon i. 11 Boi ma kaluar aek na tonggi dohot aek na paet sian sada mata mual? 12 Hamu angka donganku, tung boi ma hau ara marparbuehon jetun? Manang hau anggur marparbuehon ara? Songon i ma, ndang boi kaluar aek na ansim sian aek na tonggi.
13 Adong do na marbisuk di tonga-tongamuna? Molo adong, ingkon patuduhononna do i sian pambahenanna na denggan. Jala diulahon ma saluhutna i di bagasan lambok ni roha na ro sian habisuhon i. 14 Molo adong di hamu roha na sai mangiburu dohot roha na sai naeng marbada, unang ma patimbo-timbo hamu dirimuna jala margabus mangalo hasintongan. 15 Ndang habisuhon na sian ginjang angka sisongon i, alai sian portibi on do. Nasida ma angka halak na mangihuthon hisap-hisap ni daging dohot suru-suruan na jahat. 16 Molo adong di hamu roha na sai mangiburu dohot roha na sai naeng marbada, disi ma hagaoron dohot sude hajahaton.
17 Alai na parjolo sian sudena i, habisuhon na sian ginjang i mambahen sasahalak marroha na ias, dung i marroha na dame, marbisuk, mangoloi, gok asi ni roha dohot angka ulaon na denggan, ndang paimbar-imbarhon jolma, jala ndang munafik. 18 Asing ni i, parbue ni angka ulaon na denggan disuan di bagasan dame tu angka halak sibahen dame.