1 Samuel
29 Marpungu ma sude tentara ni halak Palistim+ di Apek jala markemah ma tentara ni halak Israel di jonok ni mual na di Jisreel.+ 2 Dung i, maju ma akka pamimpin ni halak Palistim dohot akka punguan ni tentara ni nasida. Adong do 100 sapunguan jala adong do 1.000 sapunguan. Mardalan do di pudi ni nasida si Daud dohot akka tentarana rap dohot si Akis.+ 3 Alai didok akka pamimpin ni halak Palistim i ma, “Boasa dohot akka halak Heber on?” Dialusi Raja Akis ma, “Si Daud do ibana, tentara ni si Saul raja ni halak Israel. Nungnga lobi sataon+ ibana maninggalhon si Saul jala tinggal rap dohot au. Mulai ro ibana mandapotton au sahat tu sadari on, dang adong huida na sala diulahon ibana.” 4 Gabe muruk ma akka pamimpin ni halak Palistim i tu si Akis. Didok nasida ma, “Suru ma ibana mulak+ tu kota na nilehonmu tu ibana. Unang ma paloas ibana marporang rap dohot hita, sotung marbalik ibana mangalo hita.+ Ai molo dipamate ibana akka tentaratta, las ma roha ni tuanna muse tu ibana. 5 Si Daud do ibana kan? Kan manortori do akka halak huhut marende taringot ibana? Diendehon nasida do,
‘Dipamate si Saul do marribu halak,
Jala marpulu ribu do dipamate si Daud.’”+
6 Dung i dijou si Akis+ ma si Daud jala didok ma, “Songon pastina Jahowa mangolu,* huboto do sai sittong na niulahonmu. Jala las do rohakku molo rap marporang ho dohot tentarakku.+ Ai dang adong huida na sala diulahon ho mulai sian na ro ho mandapotton au sahat tu sadari on.+ Alai, dang pos roha ni akka pamimpin on tu ho.+ 7 Alani i, mulak ma ho di bagasan dame. Unang ma bahen sogo roha ni akka pamimpin on.” 8 Didok si Daud ma tu si Akis, “Boasa songon i? Aha huroa na hubahen? Mulai ro naposomon mandapotton ho sahat tu sadari on, adong huroa salakku? Boasa dang boi au marporang rap dohot ho mangalo musum, tuan?” 9 Didok si Akis ma tu si Daud, “Molo di au, songon suru-suruan ni Debata do ho.+ Ai burju do ho. Alai, dang lomo roha ni akka pamimpin on molo dohot ho marporang. 10 Manogot, tibu ma ho dungo rap dohot akka tentarami. Dung i, mulak ma hamu molo dung torang ari.”
11 Manogotna i, tibu ma dungo si Daud dohot akka tentarana jala mulak ma nasida tu huta ni halak Palistim. Alai borhat ma tentara ni halak Palistim tu Jisreel.+