1 Samuel
30 Dung tolu ari, sahat ma si Daud dohot akka tentarana di kota Ziklag.+ Tikki i, nungnga dirampok halak Amalek+ kota Negeb na di sabola selatan dohot kota Ziklag. Jala ditutung halak Amalek do kota Ziklag i. 2 Alai dang adong dipamate nasida pangisi ni huta i. Diboan nasida do akka borua+ dohot sude pangisi ni huta i, mulai sian dakdanak sahat tu na magodang. 3 Tikki sahat si Daud dohot akka tentarana tu kota i nungnga tartutung be kota i. Jala nungnga diboan be istri ni nasida, songon i nang anak dohot boru ni nasida. 4 Gabe mangangguki ma si Daud dohot akka tentarana i sappe suda ilu ni nasida. 5 Dohot do diboan istri ni si Daud na dua i, i ma si Ahinoam halak Jisreel i dohot si Abigail halak Karmel istri ni si Nabal hian.+ 6 Muruk situtu ma akka tentarana ala diboan anak dohot boru ni nasida. Gabe sahata ma nasida lao mandangguri si Daud. Alani i, lam marsak ma si Daud. Alai, diurupi Jahowa Debatana i do ibana asa togu.+
7 Dung i, didok si Daud ma tu Malim Abiatar+ anak ni si Ahimelek i, “Boan ma tuson epod i.”+ Diboan si Abiatar ma epod i tu si Daud. 8 Disukkun si Daud ma tu Jahowa,+ “Ikkon leleokku do akka pangarampok i? Boi do dapottu nasida?” Dialusi Debata ma ibana, “Lao ma ho. Lele ma nasida. Boi do dapotmu nasida jala boi do boanonmu muse sude na binoan ni nasida i.”+
9 Pittor lao ma si Daud dohot 600 tentarana.+ Dung sahat nasida di Sunge* Besor, tinggal ma deba tentarana disi. 10 Ai palojahu do deba tentara ni si Daud i jala dang boi dohot menyeberang sian Sunge Besor. Gabe tinggal ma 200 tentarana disi.+ Alai ditorusson si Daud ma pardalananna rap dohot 400 tentarana.
11 Tikki di pardalanan, juppang ni nasida ma sahalak bawa sian Mesir. Diboan nasida ma ibana tu si Daud jala dilehon ma ibana mangan dohot minum. 12 Dilehon do tu ibana sapponggol kue ara dohot dua kue kismis. Dung diallang ibana i, margogo ma ibana muse. Ai nungnga tolu ari tolu borngin ibana dang mangan jala dang minum. 13 Dung i disukkun si Daud ma ibana, “Ise do tuanmu? Sian dia do ho?” Dialusi bawa i ma, “Hatoban ni halak Amalek do au, alai halak Mesir do au. Na ditadikkon tuanku do au ala marsahit au tolu ari naung salpu. 14 Na mangarampok do hami di huta na di sabola selatan* ni huta ni halak Heret,+ di huta ni marga Juda, dohot di sabola selatan* ni huta ni halak Kaleb.+ Ditutung hami do muse kota Ziklag.” 15 Didok si Daud ma tu ibana, “Olo do ho manaruhon au tu akka pangarampok i?” Dialusi ibana ma, “Olo. Hutaruhon pe ho tu nasida. Alai marsumpa ma ho di bagasan goar ni Debata, na so pamateonmu au jala na so pasahatonmu au tu tuanku.”
16 Dung i, ditaruhon ma si Daud tu inganan ni pangarampok i. Tikki i, dang pungu akka pangarampok i di sada inganan. Mangan minum do nasida jala marpestai. Ai godang do arta na binuat ni nasida sian huta ni halak Palistim dohot sian huta ni marga Juda. 17 Dung sahat disi, dipamate si Daud ma akka pangarampok i mulai sian manogot, tikki golap dope ari sahat tu botari.+ Alai adong do 400 halak pangarampok i na lari mamakke unta. 18 Dibuat si Daud ma istrina na dua i dohot sude na dirampok ni halak Amalek i.+ 19 Dang adong na mago arta ni nasida jala dang adong na mate sian keluarga ni nasida. Diboan nasida ma anak ni nasida, boru ni nasida, dohot arta ni nasida.+ Jala diboan si Daud do sude arta na dirampok ni halak Amalek i. 20 Dibuat si Daud ma sude hambing, biru-biru, dohot lombu ni halak Amalek. Dibahen akka tentarana ma i di jolo ni pinahan ni nasida. Jala didok nasida do, “Na dapot ni si Daud do on.”
21 Dung i lao ma si Daud dohot akka tentarana manjuppangi 200 tentarana na tading di Sunge Besor.+ Ai palojahu do nasida lao mangihutton si Daud. Dung diida nasida si Daud, didapotton nasida ma ibana. Jadi, disukkun si Daud ma songon dia kabar ni nasida. 22 Alai adong do halak na jahat dohot na so hasea na rap dohot si Daud i. Didok nasida ma, “So na dohot nasida lao rap dohot hita, jadi dang pola lehonon di nasida arta na tabuat i. Holan akka istri dohot anakkon ni nasida ma na talehon. Dung i, suru ma nasida lao.” 23 Alai didok si Daud ma, “Dang boi songon i akka dongan. Ai Jahowa do na mangalehon i tu hita. Ibana do na manjaga hita jala na mangurupi hita manaluhon akka pangarampok i.+ 24 Dang adong na olo mangihutton hatamuna i. Ikkon dos do bagian ni sude halak.+ Dos do bagian ni halak na lao marporang dohot bagian ni halak na manjaga akka barang.”+ 25 Mulai sian i sahat tu sadari on, dibahen si Daud ma i gabe sada sian aturan dohot hukum ni halak Israel.
26 Dung mulak si Daud tu Ziklag, dikirim ibana ma deba sian arta na binuat ni nasida tu akka pangituai* ni marga Juda. Ai donganna do nasida. Didok ibana do, “On ma hadiah* tu hamu. Na hubuat hami do i sian akka musu ni Jahowa.” 27 Dikirim ibana ma i tu halak na di Betel,+ tu halak na di Ramot na adong di Negeb,* tu halak na di Jatir,+ 28 tu halak na di Aroer, tu halak na di Sipmot, tu halak na di Estemoa,+ 29 tu halak na di Rakal, tu halak na tading di kota ni halak Jerahmeel,+ tu halak na tading di kota ni halak Keni,+ 30 tu halak na di Horma,+ tu halak na di Borasan, tu halak na di Atak, 31 tu halak na di Hebron,+ dohot tu sude inganan na hea diingani si Daud dohot akka tentarana.