Panguhum

6 Dibahen halak Israel ma muse sogo roha ni Jahowa.+ Alani i, dipasahat Jahowa ma nasida tu tangan ni halak Midian saleleng pitu taon.+ 2 Susa do halak Israel dibahen halak Midian.+ Gabe dibahen halak Israel ma inganan partabunian ni nasida* di akka dolok, di gua, dohot di akka inganan na maol dapot ni halak.+ 3 Molo dung sae halak Israel manabur boni, ro ma halak Midian, halak Amalek,+ dohot halak na sian Timur+ mangalo nasida. 4 Markemah do nasida lao mangalo halak Israel. Disegai nasida do sude suan-suanan ni halak Israel na di luat i sahat tu Gasa. Alani i, dang adong be allangon ni halak Israel, jala habis ma biru-biru, lombu jantan, dohot halode ni halak Israel.+ 5 Ro do nasida lao manegai huta ni halak Israel. Dos songon sihapor*+ do godang ni nasida na markemah i dohot godang ni pinahan ni nasida. Jala dang taretong godang ni nasida dohot godang ni unta ni nasida.+ 6 Gabe pogos hian ma halak Israel alani halak Midian. Dipangido halak Israel ma tu Jahowa asa diurupi nasida.+

7 Tikki dipangido halak Israel tu Jahowa asa dipalua nasida sian halak Midian,+ 8 disuru Jahowa ma sahalak panurirang* mandok tu halak Israel, “On ma na didok Jahowa, Debata ni halak Israel, ‘Nungnga huboan hamu kaluar sian Mesir jala nungnga huboan hamu kaluar sian ingananmuna diparhatoban.*+ 9 Nungnga hupalua hamu sian tangan ni halak Mesir dohot sian akka halak na mambahen hamu susa. Hupalao do akka musumuna sian jolomuna jala hulehon do tano ni nasida tu hamu.+ 10 Jala nungnga hudok tu hamu, “Au do Jahowa Debatamuna.+ Dang boi sombaonmuna* akka debata ni halak Amori nang pe di hutana hamu tading.”+ Alai dang dioloi hamu Au.’”*+

11 Dung i ro ma suru-suruan ni Jahowa.+ Hundul ma ibana di toru ni hau na balga di Opra. Appuna ni si Joas pinoppar ni si Abi-eser+ do hau i. Tikki i, mambatting gandum do anakna si Gidion+ di inganan pamoroan ni anggur, asa unang diida halak Midian ibana. 12 Dipataridahon suru-suruan ni Jahowa ma dirina tu si Gidion jala ninna ma, “Didongani Jahowa ma ho+ ale tentara na gogo.” 13 Didok si Gidion ma, “Sattabi ma tuan! Molo tutu do na didongani Jahowa hami, boasa ma masa on sude tu hami?+ Didia do sude tanda halongangan* na binahenna, songon na pinaboa ni akka ompunami i?+ Didok nasida do, ‘Jahowa do na mamboan hita kaluar sian Mesir.’+ Alai, ditadikkon Jahowa do hami saonari.+ Jala dipasahat Ibana do hami tu tangan ni halak Midian.” 14 Ro ma Jahowa* tu jolona jala didok ma, “Lao ma ho, jala bahen ma sian nasa gogom paluahon halak Israel sian halak Midian.+ Ai Au do na manuru ho.” 15 Didok si Gidion ma, “Sattabi ma ale Jahowa. Boha do bahenokku paluahon halak Israel? Ai keluargakku* do na ummetmet di marga Manasse. Jala au ma na so apala sangap di keluarga ni bapakku.” 16 Alai didok Jahowa ma, “Donganakku do ho.+ Taluhononmu do halak Midian songon na manaluhon sahalak jolma.”

17 Dung i didok si Gidion ma tu Ibana, “Molo lomo do roham tu au, bahen ma sada tanda na patuduhon Ho do na makkatai tu au. 18 Unang ma lao Ho sian on sahat tu na mulak au mamboan pelean na lao hupelehon di jolom.”+ Dialusi Ibana ma, “Dison pe Au sahat tu na mulak ho.” 19 Dung i lao ma si Gidion jala diloppa ma sada anak ni hambing. Dibuat ibana ma hira-hira 22 liter* topung jala dibahen ma roti na so marragi.+ Dibahen ma jagal i tu karanjang jala dibahen ma huana di hudon. Dung i diboan ibana ma tu suru-suruan i jala diparade ma i di toru ni hau na balga i.

20 Didok suru-suruan ni Debata na sittong i ma tu ibana, “Buat ma jagal i dohot roti na so marragi i. Bahen ma i di ginjang ni batu na balga na disan jala usehon ma huana tusi.” Dung i dibahen si Gidion ma songon i. 21 Adong do ditiop suru-suruan ni Jahowa i sada tukkot. Dibahen ibana ma ujung ni tukkot i tu jagal dohot tu roti na so marragi i. Kaluar ma api sian batu manutung jagal dohot roti na so marragi i.+ Dung i, dang tarida be suru-suruan ni Jahowa i. 22 Gabe diboto si Gidion ma na suru-suruan ni Jahowa do ibana.+

Pittor didok si Gidion ma, “Ago Jahowa Tuan Natumimbul, mate ma au. Ai nungnga huida bohi ni suru-suruan ni Jahowa!”*+ 23 Alai didok Jahowa ma tu ibana, “Tenang ma ho.* Unang ho mabiar.+ Dang mate ho alani i.” 24 Gabe dipajongjong si Gidion ma disi sada langgatan di Jahowa. Dibahen ma goarna Jahowa-syalom*+ sahat tu sadari on. Adong dope langgatan i di Opra di huta ni pinoppar ni si Abi-eser.

25 Borngin i, didok Jahowa ma tu ibana, “Buat ma anak ni lombu jantan appuna ni bapakmu. Anak ni lombu jantan na paduahon na marumur pitu taon. Ruppakkon ma langgatan ni Baal appuna ni bapakmi, jala ruppakkon ma tiang sisombaon* na di labbungna i.+ 26 Susun ma akka batu di inganan na timbo* on lao mambahen langgatan di Jahowa Debatam. Dung i buat ma anak ni lombu jantan na paduahon i. Pelehon ma i gabe pelean situtungon di Au. Jala pakke ma tiang sisombaon* naung niruppakkonmi gabe soban lao manutung i.” 27 Ditogihon si Gidion ma sappulu pangurupina jala diulahon nasida ma na nidok ni Jahowa i. Alai dang diulahon ibana i tikki arian. Ai mabiar do ibana tu keluarga ni bapakna dohot tu pangisi ni kota i. Gabe diulahon ibana ma i tikki borngin.

28 Manogotna i, hehe ma pangisi ni kota i. Diida nasida ma nungnga ruppak langgatan ni Baal dohot tiang sisombaon* na di labbungna. Diida nasida do muse anak ni lombu jantan naung dipelehon di ginjang ni langgatan na baru. 29 Masisukkunan ma nasida, “Ise do na mangulahon on?” Dung dilului nasida hatorangan taringot i, didok nasida ma, “Si Gidion anak ni si Joas do na mangulahon i.” 30 Dung i didok pangisi ni kota i ma tu si Joas, “Boan jo tuson anakmi, asa hupamate hami ibana. Ai nungnga diruppakkon ibana langgatan ni Baal dohot tiang sisombaon* na di labbungna i.” 31 Dung i didok si Joas+ ma tu nasida, “Na naeng mangappini Baal do hamu? Na naeng paluaonmuna do ibana? Manang ise na mangappini ibana, ikkon dipamate do manogot on.+ Molo tutu do ibana debata, lok ma ibana na mangappini dirina,+ ai langgatanna do na diruppakkon.” 32 Di ari i dibahen si Joas ma goar ni si Gidion gabe Jerubbaal.* Ai didok do, “Lok ma diappini Baal dirina, ai nungnga diruppakkon langgatanna.”

33 Marpungu ma sude halak Midian,+ halak Amalek,+ dohot halak na sian Timur.+ Manaripar ma nasida sian sunge lao tu Rura Jisreel jala markemah ma nasida disi. 34 Dung i songgop ma tondi parbadia ni Jahowa tu si Gidion,+ diombus ibana ma tarompet na sian tanduk.+ Gabe marroan ma pinoppar ni si Abi-eser+ mangihutton ibana. 35 Disuru si Gidion ma halak manjuppangi marga Manasse, marga Aser, marga Zebulon, dohot marga Naptali. Gabe marroan ma nasida manjuppangi ibana.

36 Dung i didok si Gidion ma tu Debata na sittong, “Molo naeng paluaonmu do halak Israel marhite au songon janjimi,+ 37 lehon ma di au tanda. Peakkonokku ma ibbulu ni biru-biru di inganan pardegean on. Molo matonu do i alani nambur, alai koring tano di sakalilingna, botookku ma na lao paluaonmu do halak Israel marhite au songon janjimi.” 38 Jala songon i ma na masa. Manogotna i, hehe ma si Gidion. Diporo ibana ma ibbulu ni biru-biru i jala dapotna ma aek sian i samakkuk na balga. 39 Alai didok si Gidion ma muse tu Debata na sittong, “Adong pangidoakku sada nai, unang ma muruk Ho. Loas ma au mamakke ibbulu ni biru-biru i sahali nai, lao mamboto na didongani Ho do au manang na dang. Bahen ma koring ibbulu ni biru-biru on, alai matonu ma tano di sakalilingna alani nambur.” 40 Songon i ma dibahen Debata borngin i. Holan ibbulu ni biru-biru i do na koring alai matonu do tano na di sakalilingna alani nambur.