Surat na Parjolo tu Huria na di Tessalonik
1 Sian si Paulus, si Silwanus,*+ dohot si Timoteus.+ Mandapotton huria na di Tessalonik na marsada dohot Debata Ama dohot Tuan Jesus Kristus.
Sai didongani dame ni roha dohot asi ni roha ni Debata na massai balga i ma hamu.
2 Toktong do hami mandok mauliate tu Debata tikki hutangiakkon hami hamu.+ 3 Di jolo ni Debata Ama i, toktong do huingot hami ulaonmuna i. Ai tarida do sian ulaonmuna i na porsea hamu tu Debata jala na holong rohamuna tu Ibana. Jala huingot hami do songon dia hamu sabar manaon hasusaan alani pos ni rohamuna tu janji na lao dipasaut+ marhite Jesus Kristus Tuanta i. 4 Hamu akka dongan na dihaholongi Debata, huboto hami do na dipillit Ibana hamu. 5 Ai tikki dibaritahon hami barita na uli i tu hamu, dang holan hata-hata sabbing i, alai balga do pengaruh ni i tu hamu. Mardongan tondi parbadia do i dipasahat hami tu hamu dohot pos ni roha na togu. Jala diboto hamu do aha naung huulahon hami tu hamu, tikki rap dope hami dohot hamu. 6 Nang pe godang sitaononmuna,+ dijalo hamu do hata ni Debata mardongan las ni roha na sian tondi parbadia. Marhite songon i, nungnga ditiru hamu+ be na dibahen Tuan i+ dohot na dibahen hami. 7 Alani i, gabe sitiruon do hamu tu sude halak na porsea na adong di Makedonia dohot na di Akaya.
8 Ai dang holan halak na di luat Makedonia dohot na di Akaya na manangihon hata ni Jahowa* alani hamu, alai dohot do tarbarita haporseaonmuna tu sude inganan.+ Alani i, dang adong be na porlu dohononnami tu hamu. 9 Ai sai dipaboa nasida do songon dia hamu parjolo sahali pajuppang dohot hami. Jala dipaboa nasida do songon dia hamu maninggalhon akka patung na disomba hamu,+ asa boi hamu gabe naposo ni Debata na mangolu dohot na sittong i. 10 Jala dipaboa nasida do muse songon dia hamu paimahon haroro ni Jesus Anakna i sian banua ginjang.+ Nungnga dipahehe ibana sian hamatean jala ibana do na lao paluahon hita sian rimas ni Debata na naeng ro i.+