ANDUNG-ANDUNG
א [Alef]*
1 Amangoi amang, nungnga tarulang be Jerusalem, kota na massai godang i pendudukna!+
Najolo pendudukna do na unggodang di tonga-tonga ni bangso,+ alai saonari nungnga gabe songon ina na mabalu ibana!
Najolo songon boru ni raja do ibana di tonga-tonga ni akka provinsi, alai saonari nungnga dipaksa be ibana karejo gabe hatoban!+
ב [Bet]
2 Sai mangandungi do ibana saborngin manipat,+ nungnga maraek be bohina i alani ilu-iluna.
Dang adong nanggo sahalak pe sian halletna i na ro tusi lao mangubati rohana.+
Sude do donganna i menghianati ibana,+ sude do nasida gabe musuna.
ג [Gimel]
3 Susa do Juda tikki diboan tu luat ni musu+ jala kejam do halak na mamparhatoban nasida.+
Ikkon tinggal ma ibana di tonga-tonga ni akka bangso,+ jala dang adong dapotna hasonangan.
Marroan do akka halak na jahat tu ibana di tikki susa ibana.
ד [Dalet]
4 Lungun do roha ni akka dalan na tu Sion, ai dang adong be na ro tu perayaan i.+
Tarulang do sude akka gerbangna,+ morong-orong do akka malimna.
Lungun do roha ni akka anak boruna, jala marsak situtu do ibana.
ה [He]
5 Nungnga dirajai akka musuna be ibana, sonang do ngolu ni akka musuna.+
Ai diparo Jahowa do lungun ni roha tu ibana ala diulahon ibana godang dosa.+
Jala nungnga diboan akka musu be anakna.+
ו [Waw]
6 Nungnga mago be sude haulion ni boru Sion i.+
Akka pamimpinna dos songon rusa jantan na so mandapot inganan panjappalan,
Jala nungnga suda gogo ni nasida tikki dilele musu.
ז [Zayin]
7 Di tikki susa Jerusalem i jala dang adong be ingananna tinggal,
Diingot ibana ma sude arta na hea adong di ibana.+
Di tikki ditakkup musu akka pendudukna, jala dang adong na mangurupi ibana,+
Diida akka musuna i ma ibana jala diparekkeli ala nungnga talu ibana.+
ח [Khet]
8 Nungnga diulahon Jerusalem be dosa na balga.+
Alani i do ibana gabe dihagigihon.
Sude halak na pasangappon ibana hian nungnga magigi tu ibana, ai nungnga diida nasida ibana salang-salang.+
Morong-orong ma ibana+ jala dipadao ibana ma bohina alani ilana.
ט [Tet]
9 Kotor do bajuna.
Jala dang parduli ibana tu akka na lao masa tu ibana di ari na naeng ro.+
Massai ngeri situtu do tikki na diruppakkon i ibana, jala dang adong nanggo sahalak pe na mangubati rohana.
Ale Jahowa, ida ma sitaonokkon, ai nungnga ginjang be roha ni akka musu i.+
י [Yod]
10 Nungnga di tangan ni musu be sude arta ni Jerusalem.+
Nungnga diida Jerusalem be masuk akka halak sian bangso na asing tu inganan na badia na adong disi.+
Nasida do akka bangso naung diorai Ho, asa unang adong di tonga-tonga ni bangsomi.
כ [Kaf]
11 Nungnga marhoi-hoi be sude pendudukna, dilului nasida do roti.+
Ditukkar nasida do arta ni nasida na arga tu sipanganon, asa boi toktong mangolu.
Ale Jahowa, ida ma nungnga gabe songon borua* na so marguna be au.
ל [Lamed]
12 Ale hamu akka halak na mardalan, na so diparrohahon hamu do na masa i?
Tatap hamu ma, ida hamu ma!
Adong dope na hea manaon na haccit lobi sian na hutaon on,
Sitaonon na binahen ni Jahowa tu au tikki na marsigorgor i rimasna?+
מ [Mem]
13 Diparo Ibana do api sian ginjang lao manutung sude holi-holikku.+
Dibahen Ibana do jorat di pattu, gabe mulak tu pudi ma au muse.
Dibahen Ibana do au songon borua na ditadikkon.
Sai haccitan do au ganup ari.
נ [Nun]
14 Diappehon Ibana do sude dosakku tu rukkungku dos songon auga.*
Dipasang Ibana do i mamakke tanganna, dipeakkon ibana do i tu rukkungku, gabe mago ma gogokku.
Dipasahat Jahowa do au tu tangan ni akka halak na so taralo au.+
ס [Samekh]
15 Nungnga dipasiding Jahowa be akka halak na gogo na adong di tonga-tongakku.+
Dipapungu Ibana do akka tentara lao manghancurhon doli-dolikku.+
Didege-dege Jahowa do anak boru Juda dos songon na mandege-dege anggur di inganan pamoroan.+
ע [Ayin]
16 Sai tangis ma au alani na masa on,+ sai maraburan ma ilukku.
Nungnga massai dao be sian au akka halak na boi mangubati rohakku, jala na boi paposson rohakku.
Nungnga hancur be akka anakku, ai nungnga monang be musu i.
פ [Pe]
17 Diangkat Sion ma tanganna tu ginjang,+ ai dang adong manang ise pe na olo mangubati rohana.
Nungnga diparettahon Jahowa tu sude halak na di sakaliling ni si Jakkob asa marmusu tu ibana.+
Ai nungnga magigi nasida mangida Jerusalem.+
צ [Tsade]
18 Sai sittong do ulaon ni Jahowa tikki dihukum Ibana au,+ ai nungnga hulanggar parettana.+
Tangihon hamu ma ale sude bangso, ida hamu ma sitaonokkon.
Nungnga diboan musu be akka anak borukku dohot akka doli-dolikku.+
ק [Qof]
19 Hujou do akka hallettu, alai dihianati nasida do au.+
Sai dilului akka pamimpin dohot malimhu do sipanganon,
Asa boi toktong nasida mangolu, alai dipamate do nasida di kota.+
ר [Res]
20 Tatap ma au ale Jahowa, nungnga tung susa hian rohakku.
Nungnga marsak situtu au.
Nungnga malala ate-atekku, ala nungnga mangalo au tu Ho.+
Akka halak na di luar mate do dibahen podang,+ jala na di bagasan jabu pe dang malua sian hamatean.
ש [Syin]
21 Dibege akka halak do orong-orongku, alai dang adong nanggo sahalak pe na mangubati rohakku.
Nungnga dibege sude musukki jea na masa tu au.
Las do roha ni nasida, ala diparo Ho sude na masa i.+
Alai na lao juppang ma tikkina, paroonmu do sude naung didokkon Ho,+ jala ditaon nasida ma songon na hutaon i.+
ת [Taw]
22 Sai anggiat ma diparrohahon Ho sude hajahaton ni nasida,+
Jala sai anggiat ma dibahen Ho hukuman na borat tu nasida, songon borat ni hukuman na dibahen Ho tu au alani sude hasalaakki.
Ai nungnga holan na morong-orong au jala nungnga haccit situtu ate-atekku.
א [Alef]
2 Dos songon ombun, nungnga ditutupi Jahowa be kota Sion dohot rimasna!
Nungnga disappatton Ibana haulion ni Israel sian langit tu tano on.+
Dang diingot Ibana be sidege-degean ni patna+ tikki muruk Ibana.
ב [Bet]
2 Dang dipatuduhon Jahowa asi ni rohana tikki disegai Ibana sude inganan ni si Jakkob.
Di bagasan murukna, diruppakkon Ibana do akka benteng ni Juda.*+
Dihancurhon Ibana do harajaon+ dohot akka pamimpinna+ tu tano, jala dibahen do nasida marlea.
ג [Gimel]
3 Di bagasan rimasna na marsigorgor i diponggolhon Ibana do sude hagogoon* ni halak Israel.
Dang olo Ibana mangurupi hami di tikki ro musu,+
Torus do marsigorgor murukna i tu si Jakkob dos songon api na manutung sude na di sakalilingna.+
ד [Dalet]
4 Dipatoho ibana do anak panahna tu hita, dos songon na binahen ni sahalak musu, nungnga rade be tangan kananna lao mangalo dos songon na binahen ni musu.+
Torus do dipamate Ibana halak na tahalomohon.+
Diusehon Ibana do rimasna na marsigorgor songon api i+ tu kemah ni penduduk Sion.*+
ה [He]
5 Gabe songon musu+ do Jahowa.
Dipamate Ibana do sude halak Israel.
Dihancurhon Ibana do sude menarana.
Diruppakkon Ibana do sude bentengna.
Jala dibahen Ibana do lam godang boru Juda na tangis, jala na mangandungi.
ו [Waw]
6 Diruppakkon+ Ibana do kemahna, dos songon sopo-sopo di ladang.
Dipaso Ibana do akka perayaan+ lao pasangappon Ibana.
Dibahen Jahowa do lupa akka halak na di Sion tu akka perayaan dohot ari Sabat,
Jala di tikki na muruk situtu Ibana, dipatuduhon do na so dijalo Ibana akka raja dohot akka malim.+
ז [Zayin]
7 Dang dijalo Jahowa be langgatanna i.
Nungnga magigi Ibana mangida ingananna na badia i.+
Dipasahat Ibana do akka tembok ni menarana tu tangan ni akka musu.+
Marsurak do akka musu i di jabu ni Jahowa,+ songon di tikki ari perayaan.
ח [Het]
8 Nungnga ditottuhon Jahowa be di bagasan rohana lao mangaruppakkon tembok ni kota Sion.*+
Nungnga diukkur Ibana tembokna mamakke tali pangukkur.+
Dang dipatuduhon Ibana asi ni rohana tikki dihancurhon Ibana i sude.
Dibahen Ibana do mangandungi tembok dohot bentengna.
Dang margogo be sudena i.
ט [Tet]
9 Nungnga diruppakkon akka gerbangna tu tano.+
Nungnga dihancurhon jala diponggolhon akka palangna.
Diboan do rajana dohot akka pejabatna tu tonga-tonga ni akka bangso na asing.+
Dang adong be aturan, jala akka panurirangna pe dang mandapot parnidaan sian Jahowa.+
י [Yod]
10 Sai sip ma akka pangituai* ni Sion* hundul di atas ni tano.+
Dibahen nasida ma orbuk tu ulu ni nasida jala dipakke nasida do abit goni.+
Dibahen akka anak boru Jerusalem do ulu ni nasida unduk sahat tu tano.
כ [Kaf]
11 Nungnga loja matakku ala sai torus tangis.+
Nungnga marsak situtu pakkilalaakku.
Nungnga malala ate-atekku* ala nungnga dihancurhon boru ni bangsokki.*+
Ai pingsan do akka dakdanak dohot poso-poso di akka lapangan na di kota.+
ל [Lamed]
12 Didok nasida do torus tu omak ni nasida, “Omak male au, mauas au.”*+
Marragean do nasida pingsan di akka lapangan na di kota songon akka halak na lukka parah.
Songon i ma nasida gabe mate di abingan ni omak ni nasida.
מ [Mem]
13 Ale boru Jerusalem, aha ma tudosan na boi hulehon tu ho?
Manang tudia ma ho boi disarupahon?
Ale boru Sion, tu ise ma ho boi hupatudos asa malum rohami?
Ai dos songon bidang ni laut do lukkam.+ Ise ma na boi pamaluppon i?+
נ [Nun]
14 Parnidaan na so sittong jala na so marguna do na pinaboa ni akka panurirangmuna i.+
Dang diabbati nasida hamu asa unang diboan musu, ai dang dipaboa nasida hasalaanmuna.+
Alai torus do dipaboa nasida tu hamu akka parnidaan na so sittong jala na mambahen hamu gabe lilu.+
ס [Samekh]
15 Martopak tangan do sude halak na lewat sian dalan mangaleai ho.+ Mangupir-upir do nasida mangida ho.
Jala direhei+ nasida do* boru Jerusalem. Didok nasida do,
“Ai on do kota na didok massai bagak situtu jala na parohon las ni roha tu saluhut tano on?”+
פ [Pe]
16 Sude do musu mambukka pamangan ni nasida lao mangaleai ho.
Direhei nasida do* ho jala diharat nasida do ngingi ni nasida alani murukna. Didok nasida do, “Nungnga huboddut hami be ibana.+
Nungnga saut be ari na tapaima-ima i!+ Ujungna, masa do i jala nungnga taida!”+
ע [Ayin]
17 Nungnga dipasaut Jahowa be sude lomo ni rohana,+ nungnga diulahon Ibana be sude hatana,+
Songon naung dipaboa Ibana hian sian najolo.+
Dang dipatudu Ibana asi ni rohana di tikki manghancurhon.+
Dipasombu Ibana do akka musu marlas ni roha alani hamu, dibahen Ibana do lam gogo* akka musumuna.
צ [Tsade]
18 Ale tembok ni boru Sion, mangangguki do roha ni akka halak tu Jahowa.
Pasombu ma torus maraburan ilu-ilum songon sunge arian nang borngin.
Unang ma maradi ho, torus ma ho tangis. Unang pasombu maradi simalolongmi.
ק [Qof]
19 Dungo ma ho! Marsurak ma ho di tikki borngin, di mula ni giliran jaga malam.
Dos songon aek, usehon ma isi ni rohami tu Jahowa.
Angkat ma tanganmu lao manangiakkon ngolu ni akka anakmu,
Na pingsan di akka dalan alani haraparon.+
ר [Res]
20 Ale Jahowa, ida ma bangso naung massai borat dihukum Ho.
Boasa ma pola ikkon torus diallang akka borua anak ni nasida sandiri, anak na ditubuhon nasida?+
Manang boasa ma ikkon dipamate akka malim dohot akka panurirang* di inganan na badia ni Jahowa?+
ש [Syin]
21 Marragean do bakke ni akka bawa na poso dohot akka bawa na matua di akka dalan.+
Nungnga mate be akka anak borukku dohot akka doli-dolikku dibahen podang.+
Di ari rimasmi, dibunu Ho do nasida. Dang dipatuduhon Ho asi ni roham tikki dipamate Ho nasida.+
ת [Taw]
22 Dos songon tikki dijou Ho akka jolma lao tu sada perayaan,+ dijou Ho do sude na mambahen au mabiar sian sude inganan.
Di ari rimas ni Jahowa i, dang adong nanggo sahalak pe na malua manang na selamat.+
Ai hona bunu do dibahen musukki sude halak naung hutubuhon jala naung hupagodang-godang.+
א [Alef]
3 Au ma halak na mangida haccit ni sitaonon i, ala muruk situtu Debata jala dihukum Ibana hita.
2 Dipalao Ibana do au, dibahen Ibana do au mardalan di na holom, dang di na tiur.+
3 Ganup ari, sai diattuk Ibana do au mamakke tanganna.+
ב [Bet]
4 Habis do dibahen Ibana dagingku dohot kulittu,
Diponggoli Ibana do holi-holikku.
5 Dihurung Ibana do au, dibahen Ibana do di sakalilingku raccun na marbisa+ dohot hasusaan.
6 Dipaksa Ibana do au hundul di inganan na golap, dos songon halak naung leleng mate.
ג [Gimel]
7 Dibahen Ibana do tembok di sakalilingku asa unang boi au lari,
Diikkat Ibana do pattu mamakke ratte na borat na sian tombaga.+
8 Tikki jou-jou au mangido asa diurupi, dang olo Ibana manangihon tangiakku.+
9 Diabbati Ibana do akka dalanku mamakke batu,* dibahen Ibana do dalanku marliku-liku.+
ד [Dalet]
10 Monggop-onggop do Ibana lao manakkup au dos songon beruang, dos songon singa na mangintip mangsana.+
11 Dipaksa Ibana do au* kaluar sian dalanku, jala diribak-ribak Ibana do au,
Nungnga ditinggalhon Ibana be au.+
12 Nungnga ditarik Ibana anak panahna,* jala au do na lao tembakonna.
ה [He]
13 Nungnga dibuat Ibana be anak panah sian ingananna, jala dipanah Ibana do ginjalhu.
14 Sude do halak mamarekkeli au, jala marende do nasida lao mangarehei au ganup ari.
15 Dibahen Ibana do au butong alani akka na paet, jala disuru Ibana do au manginum akka suan-suanan na paet.+
ו [Waw]
16 Dibahen Ibana do ponggol ngingikku alani karikkil,
Jala didege-dege Ibana do au di atas ni orbuk.+
17 Nungnga dibuat Ibana hadameon sian au, jala nungnga lupa be au songon dia las ni roha* i.
18 Alani i hudok ma, “Nungnga mago be hasangapokki, songon i nang haporseaokku tu Jahowa.”
ז [Zayin]
19 Ingot ma susa do au, dang adong inganakku tinggal,+ huallang do suan-suanan na paet jala na marraccun.+
20 Pasti diingot Ho do i, jala gabe dipaunduk Ho do lao mangurupi au.+
21 Sai huingot do i di rohakku, alani i do sai sabar au paima-imahon Ho.+
ח [Het]
22 Alani holong* na pinatudu ni Jahowa i do umbahen dang mate hita,+ ai torus do dipatudu Ibana asi ni rohana i.+
23 Sai dipatudu Ibana do asi ni rohana ganup manogot,+ jala sai dipasaut Ibana do janjina.+
24 Hudok do, “Jahowa do parbagiananku.+ Alani i do sai sabar au paima-imahon Ibana.”+
ט [Tet]
25 Burju do Jahowa tu halak na mangasahon Ibana,+ tu akka halak na sai mangalului Ibana.+
26 Massai denggan do molo sabar sasahalak paimahon+ haluaon na sian Jahowa.+
27 Denggan do molo ditaon sasahalak hasusaan di tikki poso ibana.+
י [Yod]
28 Molo dibahen Debata boban tu sasahalak, sip ma ibana jala hundul ma ibana sahalakna.+
29 Lok ma dipatutoru ibana dirina jala dibahen bohina sahat tu tano,+ atik boha boi dope ibana malua.+
30 Lok ma dilehon ibana bohina lao dipastap halak na mamastap ibana, lok ma ibana maila situtu ala dileai.
כ [Kaf]
31 Ai dang saleleng ni lelengna ditinggalhon Jahowa hita.+
32 Ai nang pe dibahen Ibana lungun rohatta, alai pasti patuduhononna do asi ni rohana alani holongna* na massai balga i.+
33 Ai dang lomo rohana gabe lungun roha ni anak ni jolma i+ manang gabe susa nasida.
ל [Lamed]
34 Manang ise na mandege-dege akka halak na dipenjara di tano on,+
35 Na so mandalatton hukum na tigor di jolo ni Natumimbul i,+
36 Jala halak na mandok hata na so sittong tikki pasaehon parsoalanna,
Dang pasombuon ni Jahowa akka halak sisongon i.
מ [Mem]
37 Ise ma na boi mambahen saut hatana molo dang Jahowa na mamarettahon asa saut i?
38 Dang mungkin rap kaluar na denggan dohot na roa
Sian pamangan ni Natumimbul i.
39 Boasa pola marungut-ungut sasahalak molo dihukum alani dosana?+
נ [Nun]
40 Beta ma tapareso diritta, manat ma tapareso pangalahotta,+ jala beta ma hita mulak tu Jahowa.+
41 Beta ma hita martangiang lao mangelek-elek tu Debata na di surgo+ sian ias ni rohatta.
42 Beta ma taangkat tanganta jala mandok, “Nungnga mardosa be hami, jala nungnga mangalo be hami tu Ho,+ dang disesa Ho dosanami.+
ס [Samekh]
43 Muruk do Ho tu hami, jala dang olo Ho manangihon tangiangnami*+
Dilele Ho do hami, jala dang dipatudu Ho asi ni roham tikki dipamate Ho hami.+
44 Dibahen Ho do ombun lao mangabbati dalannami lao ro tu Ho, alani i dang sahat be tangiangnami i tu Ho.+
45 Dibahen Ho do hami gabe songon kotoran dohot sampah di tonga-tonga ni akka bangso.”
פ [Pe]
46 Sude do musunami mambukka pamanganna lao mangaleai hami.+
47 Sai mabiar do hami jala tarjorat,+ dang tarurus be hami jala nungnga hancur.+
48 Songon doras ni sunge do ilukku torus maraburan, ai nungnga hancur be boru ni bangsokki.+
ע [Ayin]
49 Torus do maraburan ilukku dang hea maradian,+
50 Sahat tu na diida Jahowa hami jala diparrohahon sian surgo.+
51 Massai susa do huhilala tikki huida sude na masa tu boru ni kotakki.+
צ [Tsade]
52 Dilelei akka musukki do au songon na mangalelei pidong, hape so adong alana.
53 Dipamasuk nasida do au tu bagasan ni lubang lao pamatehon au. Sai didangguri nasida do au pakke batu.
54 Nungnga sahat be aek tu ulukku. Hudok ma, “Anggo au, mate nama au!”
ק [Qof]
55 Sian lubang na bagas i,+ sai hujou do goarmu ale Jahowa.
56 Tangihon ma soarakku, jala unang ma padao bohim sian au tikki mangangguki au lao mangido asa diurupi Ho.
57 Di ari tikki na hujou i Ho, dipajonok Ho do tu au. Didok Ho do, “Unang ho mabiar.”
ר [Res]
58 Ale Jahowa, diurupi Ho do au tikki pasaehon parsoalakku, jala nungnga dipalua Ho be hosakku.+
59 Ale Jahowa, diparrohahon Ho do nungnga dibahen na jahat tu au, bahen ma hukum na tigor tu au.+
60 Nungnga diida Ho songon dia nasida mambalos au, dohot sude rencana ni nasida na jahat tu au.
ש [Sin] manang [Syin]
61 Dibege Ho do dileai nasida au ale Jahowa, jala dibege Ho do sude rencana ni nasida na jahat tu au.+
62 Jala dibege Ho do akka hata na kaluar sian pamangan ni akka alokku. Dibege Ho do songon dia nasida marhusip-husip pahata-hata au ganup ari.
63 Parrohahon ma nasida, hundul manang na jongjong nasida sai direhei nasida do au di akka ende ni nasida!
ת [Taw]
64 Ale Jahowa, dibalos Ho do nasida hombar tu pambahenan ni nasida.
65 Diburai Ho do nasida jala dipasombu Ho do lam takkang roha ni nasida.
66 Ale Jahowa, leleonmu do nasida sude di bagasan rimasmi, jala pamateonmu do nasida sude na di toru ni langitmi.
א [Alef]
4 Nungnga pudar be mas murni na marhillong i!+
Nungnga marserakan be akka batu sian inganan na badia i+ di akka dalan!+
ב [Bet]
2 Songon mas murni do akka anak ni Sion i najolo, massai arga do nasida.
Alai saonari, nungnga songon hudon tano be nasida dietong,
Songon hudon na binahen ni sitopa hudon!
ג [Gimel]
3 Haru anjing hutan dilehon do akka anakna manusu,
Alai nungnga kejam be boru ni bangsokki,+ dos songon burung unta na di gurun.+
ד [Dalet]
4 Sappe lokkot do dila ni akka poso-poso na manusu tu langit-langit ni babana alani uasna.
Sai mangido roti do akka dakdanak+ alai dang adong na mangalehon.+
ה [He]
5 Marpeakan ma di akka dalan halak na somal mangallang siallangon na tabo alani haraparon.+
Jala modom di atas ni orbuk ma akka halak na somal mamakke baju na arga.*+
ו [Waw]
6 Ubborat do hukuman* na dibahen tu boru ni bangsokki sian hukuman na dibahen tu Sodom alani dosana,+
Ai di bagasan satokkin do ibana diruppakkon jala dang adong na mangurupi ibana.+
ז [Zayin]
7 Najolo, ummias do halak Nasir+ na di Sion sian salju, unbottar do nasida sian susu.
Najolo ummerah do nasida sian batu koral,* marhillong do nasida songon batu safir.
ח [Het]
8 Alai saonari nungnga birong be nasida lobi sian arang,*
Dang ditanda be nasida di akka dalan,
Jala nungnga lokkot kulit ni nasida tu holi-holi ni nasida+ dos songon hau na koring.
ט [Tet]
9 Tumagon do halak na mate alani podang sian apala halak na mate alani haraparon,+
Ai lam leleng lam gale do nasida jala mate ala dang adong sipanganon.
י [Yod]
10 Nungnga dirobus akka borua na parasi roha be akka anakkon ni nasida.+
Anakkonna i ma na gabe sipanganon ni nasida di tikki diruppakkon boru ni bangsokki.+
כ [Kaf]
11 Nungnga dipatuduhon Jahowa be na muruk situtu Ibana,
Nungnga diusehon Ibana be rimasna na marsigorgor i.+
Jala nungnga dipagalak Ibana be api di Sion na manutung akka fondasina sappe suda.+
ל [Lamed]
12 Dang porsea be akka raja na di tano on dohot sude pangisi ni luat on
Na lao masuk nama akka musu dohot akka alo ni nasida tu gerbang ni Jerusalem.+
מ [Mem]
13 Masa pe songon i alani dosa ni akka panurirang, dohot hasalaan ni akka malim do,+
Na mangusehon mudar ni halak na mangulahon na sittong di tonga-tongana.+
נ [Nun]
14 Dadap-dadap ma akka malim dohot akka panurirang i mardalan+ di akka dalan songon halak na mapitung.
ס [Samekh]
15 Gogo ma soara ni akka halak mandok tu nasida, “Lao hamu, ramun do hamu! Lao hamu, lao hamu, unang jama hamu hami!”
Alani i, marpinda-pinda ma nasida, ai dang adong be jabu ni nasida.
Didok akka bangso ma, “Dang boi nasida tinggal dison rap dohot hita.*+
פ [Pe]
16 Nungnga dibahen Jahowa be nasida marserak,+
Dang lomo be rohana mangida nasida.
Dang dipasangap akka halak be akka malim,+ jala dang lomo be roha ni nasida tu akka pamimpin.+
ע [Ayin]
17 Saonari pe, nungnga loja matanami mangalului akka na boi mangurupi hami,+ alai dang marna ro.
Sai dilului hami do pangurupion sian bangso na so boi paluahon hami.+
צ [Tsade]
18 Sai naeng ditakkup nasida do hami+ sappe dang boi hami mardalan di akka lapangannami.
Ai nungnga jonok ujung ni ngolunami, nungnga suda ari-arinami, ai satokkin nai mate nama hami.
ק [Qof]
19 Ukkatop do halak na mangalele hami sian lali na di langit.+
Dilele nasida do hami di akka dolok, jala monggop-onggop do nasida naeng manakkup hami di gurun.
ר [Res]
20 Halak na pinillit ni Jahowa i do na gabe songon hosa hangoluan di hami.+ Nungnga ditakkup be ibana di bagasan lubang na balga,+
Taringot tu ibana didok hami do, “Marhite-hite parlinggoman na sian ibana, boi do hami mangolu di tonga-tonga ni akka bangso.”
ש [Sin]
21 Ale boru Edom+ na tinggal di luat ni halak Us, marlas ni roha ma ho jala marsonang-sonang ma ho.
Alai na lao minum do ho sian makkuk i,+ gabe mabuk ma ho jala salang-salang.+
ת [Taw]
22 Ale boru Sion, marujung nama hukuman na dibahen tu ho alani hasalaanmi.
Dang na lao diboan be ho tu luat ni musu.+
Alai anggo ho ale boru Edom, hukumonna ma ho alani hasalaanmi.
Jala patuduhononna ma sude akka dosami.+
5 Ale Jahowa, ingot ma aha na masa tu hami.
Ida! Jala tatap ma hami, nungnga marlea situtu be hami.+
2 Nungnga dilehon be parbagianannami tu halak na so ditanda, jala jabunami dilehon tu halak na sian bangso na asing.+
3 Nungnga mate bapaknami jala dang marama be hami, nungnga gabe songon ina na mabalu be omaknami.+
4 Ikkon tuhoronnami do aek lao siinumonnami,+ jala ikkon gararonnami do soban lao pakkeonnami. Hape appunanami do i.
5 Nungnga tung jonok akka halak na mangalele hami,
Loja do hami alai dang boi hami maradi.+
6 Mangido-ido do hami tu Mesir+ dohot tu Asiria+ asa cukkup roti sipanganonnami.
7 Nungnga mate nian akka ompunami na mangulahon dosa i, alai ikkon taononnami dope hasalaan ni nasida i.
8 Saonari, halak na lea do na mangarajai hami, alai dang adong na boi paluahon hami sian tangan ni nasida.
9 Alani akka halak na mamboan podang di gurun, pola do sappe naeng mate hami holan lao mambuat roti.+
10 Mohop situtu do kulitnami dos songon mohop ni parapian, alani posi ni haraparon i.+
11 Nungnga diperkosa nasida be akka istri di Sion, dohot akka anak boru na di akka kota na di Juda.+
12 Nungnga diikkat jala digattung nasida akka pejabat,+ jala dang dipasangap akka pangituai.*+
13 Mangangkat batu gilingan* ma akka doli-doli, jala mardabuan ma akka dakdanak ala paborattu soban na diboan nasida.
14 Nungnga lao be akka pangituai sian gerbang ni kota,+ dang marmusik be akka doli-doli.+
15 Nungnga mago be las ni roha sian hami, jala nungnga muba be tortornami i gabe andung-andung.+
16 Nungnga madabu be mahkota sian ulunami. Marjea nai hami ala nungnga mardosa!
17 Alani i do haccit rohanami,+
Jala alani i do gabe kabur matanami.+
18 Ai nungnga tarulang Dolok Sion i,+ jala nungnga maringanan be anjing hutan* disi.
19 Alai anggo Ho Jahowa, toktong do Ho hundul di tahtami saleleng ni lelengna.
Jala sahat tu saleleng ni lelengna do harajaonmi.+
20 Boasa songon i lelengna dilupahon Ho hami jala ditinggalhon Ho?+
21 Ale Jahowa, togu ma hami muse mulak tu Ho, pittor mulak pe hami tu Ho.+
Bahen ma muse ngolunami songon na uju i.+
22 Alai tahe, dang olo be Ho manjalo hami.
Toktong do marsigorgor murukmi tu hami.+
Pasal 1-4 marisi ende andung-andung na dibahen bentuk akrostik, i ma ende na dibahen mangihutton urutan ni abjad bahasa Heber.
Borua na didok dison manggombarhon Jerusalem.
Ida di Kamus.
As. “boru Juda”.
As. “tanduk”. Ida di Kamus.
As. “boru Sion”.
As. “boru Sion”.
Ida di Kamus.
As. “boru Sion”.
As. “Nungnga diusehon be ate-atekku tu tano”.
Tudosan na dipakke di puisi. Ra lao patuduhon asi ni roha.
As. “Didia do adong gandum dohot anggur?”
As. “Jala marsiul do nasida tu”.
As. “Marsiul do nasida tu”.
As. “timbo tanduk ni”. Ida “Tanduk” di Kamus.
Ida di Kamus.
Manang “batu naung ditokkoki”.
Manang boi do “Dibahen Ibana do au dang marguna”.
As. “Nungnga dipasang Ibana tali ni panahna”.
As. “songon dia na denggan”.
Manang “holong na manoktong”. Ida di Kamus.
Manang “holong na manoktong”. Ida di Kamus.
Manang “jala diabbati Ho do dalannami ro tu Ho”.
As. “baju na rara”, na nidokna i ma baju na rara na arga.
As. “hasalaan”.
Ida di Kamus.
As. “haholomon”.
Ida di Kamus.
Manang “tinggal dison gabe panoppang”.
Ida di Kamus.
Ida di Kamus.
Manang “rubah”. Ida di Kamus.