Debata Mangalehon Paradeiso tu Jolma

HATA pamungka na di toru on, i ma hata na tarbarita na hea disurat. ”Di mula ni mulana ditompa Debata langit dohot tano on.” (1 Musa 1:1) Marhite hata on, Bibel paboahon tu hita adong sada hadirion na sangap—Debata na tumimbul, i ma Jahowa. Ayat na parjolo di Bibel paboahon Debata do sitompa saluhut hasiangan on laho ingananta. Dipaboa muse sadia leleng Debata paradehon tano on, dohot angka na adong di tano on na mambahen longang roha.

Jolma do tompaan ni Debata na sumurung di tano on. Ditompa tumiru rupaNa—boi patuduhon angka parange ni Jahowa, songon holong dohot bisukNa. Dibahen Debata jolma sian orbuk ni tano. Digoari ma ibana si Adam, dibahen ma ibana maringanan di Paradeiso—porlak Eden. Debata sandiri na patupahon porlak i, dipantubuhon Ibana ma angka hau na denggan idaon, dohot na boi panganon parbuena.

Diida Debata ringkot mardongan saripe si Adam. Marhite sada rusukna, dibahen Debata ma sada borua na gabe ripena, digoari ma ibana si Hawa. Sian las ni rohana, didok si Adam ma hata na uli on ”On do sahali holiholi sian angka holiholingku, jala sibuk sian sibukku.” Didok Debata: ”Dibahen i tadingkonon ni baoa do amana dohot inana mandongani jolmana, jadi sada sibuk nasida.”​—1 Musa 2:22-24; 3:20.

Dilehon Debata dua parenta tu si Adam dohot si Hawa. Na parjolo, disuru nasida mangarajai jala mangaradoti tano inganan nasida laos manggohi tano on dohot pinompar nasida. Na paduahon, diorai nasida mangallang parbue ni ”hau parbinotoan ni na denggan dohot na roa.” (1 Musa 2:17) Molo ndang dioloi, mate do nasida. Marhite parenta on, dilehon Debata tingki tu nasida laho patuduhon na olo nasida manjalo Jahowa gabe parhuaso. Pangoloion ni nasida patuduhon holongna tu Debata. Godang do na mambahen ingkon oloanna parenta ni Debata, parholong i. Tompaan na tipak do nasida ndang martihas. Bibel paboahon tu hita: ”Dung i ditilik Debata ma sude na tinompana i, jadi nunga denggan situtu.”​—1 Musa 1:31.

—Dibuat sian 1 Musa bindu 1 dohot 2.